¹ Mawene kumbara dhoyita! Mbara dhoyita ne mbodhina pu kwipitha. ² Mbadi ghategherera kudiyi dyaNyambi endi kutambura maroghuthwero ghaFumu Nyambi. Mbadi ghakurupera mwaNyambi mbadi mbogha muhenyena. ³ Hana wamafumu wagho ne yira nyime ghokuvuma mukatji kagho. Ha ghaturi wagho ne mumbungu agha ghana kupara mukuhuma pamathikuthiku. ⁴ Hapumbi wendi ne hakenya nowa heti. Hapristeri wendi ne hayakunuka koyo kupongoka nohatjora muragho. ⁵ Fumu Nyambi ne ghapongoka mwimi dhendi. Mbadi ghepithanga. Kehe mathiku-thiku mboghana yarekera ghuhungami wendi! Mbadi mbogha yundeka kumwedhi ngambi kemo eshi hayiharuri ne mbadi hadimuka nohonyi. ⁶ Nadhongonona mishovo dhodhingi; hakayita wagho hapwa kwipitha nonatenda mambirikatji kagho ghapwe kuhanyaghura, podiyo eshi noyofotji temba ghokutjinaghana mo. Mambara ghagho ghapwa kuhanyaghura podiyo eshi noyofotji temba shogha tunge mo. ⁷ Naghambire ghushemwa eshi mbomuna ni tutukwa. Mutambure maroghuthwero nombadi mboni mutetamo mumaghumbo ghenu nokoyoyiheya eyi narongekire kuruwana kukwenu. Ene agho ne kehe mathiku-thiku hathotere kwipitha yiruwana yagho. ⁸ Yodiyo munitaterere, dyoghana kwedha Fumu Nyambi eshi kate diyuwa edi nakwimana niwa shaghekithe pamuthineneko. Matokwero ghange ne mukughongawedha matunga, kureta pofotji maghufumu, nokuwanotwera ghupata wange, ghoghuheya ghukenya wange; mumudiro ghodifupa dyange kaye kokahe mbokana pu kudhongonona. ⁹ Ame mbona kushura marudimi ghohanu, podiyo eshi wahe mbohethe dina dyaFumu Nyambi muku muruwanena nomapeghe ghagho. ¹⁰ Kutunderera kurware rwa Cushi hakareri wange, hanu wange awa hakuhanya mbohana reta muyambo kukwange. ¹¹ Mudiyuwa dyo mbadi mboni mutura muhonyi kukehe thiruwana ethi mwanipithere, dyodi yidi eshi ruvedhe ro mbona tunditha hanu awa hakunukire mukatji kenu noyoyishi mbadi mbomu kara ghuthururu padirundu dyange dyokupongoka. ¹² Ene mbona thiyi mukatji kenu hanu homaranga nohahepwe no awo ne mbana wana mondo mudina dyaFumu Nyambi. ¹³ Awa hathiyaripo waIsreali mbadi mboha ruwana ghuyi endi kughamba mbango endi hakare norudimi rombango; awo ne mbohana kungera nokurara ndani noyofotji temba oyu mbogha wayapitha. ¹⁴ Mwimbe mwe mwahanendi Zioni hohambuyama! Isreali shamberere nokugherere nomutjima ghoye ghoghuheya, mwana Jerusalemi ghombuyama. ¹⁵ Fumu Nyambi ghashwayithapo mahumbithero ghendi; hayakunutha hanyathi wenu! Nyambi ne yoFumu wa Isreali mumwenu. Mbadi karo mbomuyapa hepithi! ¹⁶ Mudiyuwa dyo mbohana ghamba kwaJerusalemi eshi wayapa Zioni nomwatawedhera manyara ghenu ghakare makashu. ¹⁷ Fumu Nyambi wenu ne nenu ghadi, ghakara nongcamu muku mughamwena. Aye ne mboghana shamberera nenu, mboghana porera kukwenu muruhakitho rwendi; mboghana shamberera kukwenu nokakuwo koyishamberera. ¹⁸ Mbona ghongawedha awa hatokota, awa hopira kukona kukuhatithera mumukandi nombadi mbomutwikera kukuhangana nohonyi dhange. ¹⁹ Mumone, tamba nihanyaghure haka kumupetha. Muruvedhe ro, mbona ghamwena harema nokughongawedha awa hayevura. Mbona watendi hakuyi nokutjindja thihonyi thagho mukaye kokahe. ²⁰ Muruvedhe ru, mbona mupiteritha, muruvedhe roro, mbona mughongawedha pofotji. Mbona munongonitha nokumupa makughero mohanu wahe hamukaye nokuhutha mapethero agha hamupethire mumeho ghenu, dyoghana kughamba Fumu Nyambi.