¹ Edhi ne mbudhi dhaFumu Nyambi edhi dheyire kwaZephaniah ghomwana Cushi, mwana Gedaliah, mwana Amariah, mwana Hezekiah mumayuwa ghaJosiah ghomwana Amon fumu wawa Juda. ² Ame ne mbona dhongonona po yoyiheya pakaye, dyoghana kughamba Fumu Nyambi. ³ Mbona dhongonona hanu noyiyama; nombona dhongonona yinyunyi yomuwiru nothi dhomu dikuruviya no mboyina pu kuhanyaghura nawayiharuri. Mbona shwayitha munu pakaye, agha ne medhero ghaFumu Nyambi. ⁴ Mbona ghonyonona dyoko dyange mukurwitha Juda nowahe awa hatunga muJerusalemu. Mbona hanyaghura hatawi wahe haBaali hashwaghe mudyango di, nomena ghawa kareri hanyambi hambango mwawa pristeri. ⁵ hanu awa hana kukarera yirama yodhimupepo dhomuwiru nokutapa medhero kwaFumu Nyambi ene mohatapa karo medhero kohama fumu wagho. ⁶ Nombona dhongonona awa hayakunuka kwaFumu Nyambi, awa hapira kushana Nyambi nomakonekitho ghendi temba. ⁷ Muturumuke paghutho wafumu Nyambi! Diyuwa dyaFumu Nyambi ne dina kokera; Aye ne gharoyitha ndupu edhi ghapungwera hagenda wendi. ⁸ Adyo ne mbodineya mudiyuwa dyomuyambo wendi, aye ne mboghana humbitha hana wamafumu nokehe yu ghana shupata yawa mutunda kure. ⁹ Mudiyuwa dyo, mbona taghuruka dikorogho dyawa hana kutura hahona wagho mumepithero nomumangerekero. ¹⁰ Ayo ne mboyina kara modyo diyuwa, agha ne medhero ghaFumu Nyambi eshi madiro ghayinyanda mbogha neya kutunderera kudikorgho dyothi, yidira kutunderera kuthiko thoghuwadi nomighuma dhomepithero kutunda kumarundu. ¹¹ Mudire amwe mwadiko edi dyakara mumangeshefa nohanu wahe ho mu Canani mbohana pu kuhanyaghura; nawahe awa hana kuviha siliveri mbohana pu kuhanyaghura po. ¹² Mboyineya muruvedhe oru mbonifuna Jerusalemu nomunyenge nokuhumbitha hanu awa hahungumana muvinyu nokughamba mumitjima dhagho eshi; Fumu Nyambi ne mbadiko eyi mbogha tenda, yikare eshi yoyiwa endi yoyiyi. ¹³ Ghushwi wagho ne mboghuna yunguruka nomandugho ghagho mboghana pitura agha hayevura! Mbohana tendi mayuwo ene mbadi mboha tunga mo nombohana dimi ene mbadi mbohanwako vinyu. ¹⁴ Diyuwa dishokuru dyaFumu Nyambi ne dina kokera, pepi-pepi nodina tambukerera! Mughuma ghodiyuwa di ne ghomadiro ghashokuru! ¹⁵ Adyo ne mbodina kara diyuwa dyomakwetjura ngaghayegho nodiyuwa dyodingundunga nodikokore, diyuwa dyomavuyi nodikokore. ¹⁶ Mbodina kara diyuwa dyomanyiha ghondjwi ghomurume nomanyangedhekero komambara agha ghayara hakayita nomangandekitho ghamukuma. ¹⁷ Mbona reta tokotoko mwawanu, podiyo eshi hakuyende yira hanu hohakunga apa yidi eshi hani harwera Ame Nyambi. Manyinga ghagho mbona ghanotora yira rukungu noyipo yagho yomwishi yira rutoko. ¹⁸ Yikare eshi siliveri wagho, endi ngorondo eshi yakughamwene kodidi diyuwa dyaFumu Nyambi dyomadiro. Mumudiro ghodifupa dyendi kaye kokaheya mbokana pu kudhongonona, Aye mboghana reta ghuhura ghothitetu nokuyapitha kwakeheyu ghatunga pakaye.