¹ Ghomuwa muhakwa wange ghodirura; gho muwa shemwa. Meho ghoye ne yira ghodikutji munyima dhotuku ghoye. Huki dhoye ne yira mutanga gho nombo dhina kughurumuka kutunda kudirundu dyaGilead. ² Mayegho ghoye ne yira mutanga ghondji edhi hana kukurura, nodhina kushwagha mudyango dyodhiyoghera. Nokehe yu ghadi notwanendi tuwadi no noyofotji temba ghodicimbe. ³ Miromo dhoye ne yira diya dyodikuruviya dyodikihu; kanwa koye ne ruhakitho. Matama ghoye ne yira mbuyo dhodihenda munyima dhotuku ghoye. ⁴ Thingo dhoye ne yira mushoke waDavid oghu ghatendera pamawe ghokuramakanya, nodiyovi dyoyingandekitho yina kundhendherera no eyi ne yingandekitho yawa mashurundate. ⁵ Mere ghoye mawadi ne yira tuyama ghana tuwadi otu tuna kudyera mumutemo. ⁶ Kate dive diyuwa nodikokore ne dishwaghe ko, nakuyenda kudirundu dya Myrrh endi dirundu dyohapo dhothiwe mwene. ⁷ Ghomuwa muhakwa wange ghodirura nomadiko dikongo papoye. ⁸ Tuyende pofotji kutunda kuLebanon, mwenga wanga. Wiye nange kutunda kuLebanon noshuruke pandundu dha Amana, kutunda kundundu dhaSenir naHermon nokutunda kudikwina dyonyime nokudirundu dyomakwina ghondhogho. ⁹ Wedha mutjima wange, minange ghombuyama, mwenga wange; wedha mutjima wange nomukengero ghofotji kukwange nothiyengitha thoye thofotji thomuthingo. ¹⁰ Ngepi ghuwa ghoruhakitho roye, minange ghombuyama nodidhiko dyange! Ngepi kughuwa ghoruhakitho roye, rwapiterera vinyu nothiwe thomunde ghoye ne kupiterera munuko ghoyiwe yoyiheya. ¹¹ Miromo dhoye mwenga wange ne kuhoyitha wiki ghomuka; wiki ghomuka nomanhwe ne murudimi roye; nothiwe thoyishupata yoye ne yira munuko gho kuLebanon. ¹² Minange ghombuyama, mwenga wange ne thinyamo ethi hatjapera, meyu ghokuka agha hayandhera. ¹³ Mite dhoye ne diyandja dyoyitondo yombuyo nombuyo dhisha ghuwa nothiwe thokumutemo ghoHenna noNard. ¹⁴ Nard, Saffron, Calamus, Cinnamon nomitemo dhodhihe dhomunuko ghothiwe mwene, Myrrh noDishshanova nokehe munuko ghothiwe mwene. ¹⁵ Ghodiviya dyonyamo, dithima dyomeyu ghasha ghuwa, kamushorondondo aka kana kupuka kutunda kuLebanon. ¹⁶ Pinduke we mupepo ghokumbunda, wiye we mupepo gho kughucuma; pungere munyamo dhange podiyo eshi mitemo dhamo ne dhirete thiwe mwene. Muhakwa wange ghodirura ne ngogheye munyamo dhendi nokuna dya mbuyo dhimweya dhisha ghutowi.