¹ Mughuthiku paghudidi wange ne namurumbera oyu wahaka mudhimu wange; ene mbadi nakona kumuwana. ² Naghamba eshi; nakwimana niyende mumbara, mumambirikatji nomahuka; nakushana oyu wahaka mudhimu wange. Namushanine ene mbadi namuwanine. ³ Hakungi ne ghani wanine apa hadhingurukire mbara, ghona wepurire eshi; Mbadi muna mono ko muhakwa wange ghodirura ndi? ⁴ Kapupi kamanana, apa nawa poghorokire, nakuwanine nawange ghodirura. Namukwatire nombadi namutawedhere eshi ghani thiye kate naka muretire kundhugho dhanawe, endi mungonda dhoyu ghani wanine. ⁵ Nakumurawera mwahana Jerusalem hohambuyama, mumutemo nomuyiruwana yomudipya. eshi perere penu mupinduthe ruhakitho ene kate ghayihafere. ⁶ Yidye yu ghana kushwagha mumamboreya, yira maghundhi ghomwithi nomunde ghothiwe thomunde ghoghuheya haghuritha mudyango dyomaghurithero dyomushandja? ⁷ Mone, ghudidi waSalomon nowa kayita haghudhingumwetwedha, handwarume waEsreali. ⁸ Wahe hakwaterera yimende nohandwarume muyita. Kehe yu ghadi nodimende paditami dyendi pamurandu ghowoma ghomughuthiku. ⁹ Fumu Salomoni ne ghatendire thipura thishaghuwa kutunderera kuyitondo eyi yashwayire kwaLebanon. ¹⁰ Ghatendire maghundhi ghatho no siliveri, makwatero ghongorondo nomahungumaneno ne ghodikehe dyothina diwiru. Mwishi dhatho ne mwapwire kuyenga noruhakitho hana hohambuyama waJerusalem. ¹¹ Muyende amwe mwahana Zioni hohambuyama nomukamone fumu Salomoni nodishukeka edi ghana mushukeka nyina mudiyuwa dyomayekero ghendi, mudiyuwa dyoyishamberera yomutjima wendi.