¹ Yahokokire apa Sanballat, Tobiah na-Geshem ghomu Arab nawa nyathi wetu waheya eshi namana ditete nombadiko apa pana thiyarera, noruvedhe ro ne oku shime mbadi naturako mathero kumakorogho. ² Podiyo Sanballat naGeshem hatumine mbudhi kukwange ghughamba eshi; "Wiye tukuwane pofotji mumuronga wa-Ono ene haghayarire eshi haka tende yoyimango kukwange. ³ Yodiyo, natumine mbudhi kukwagho eshi; "Ame ne nidi muyiruwana yoyikuru, eyi yina kuni shweneka eshi mbadi nighuruke koko. Pashanye shoyimanene yiruwana, pamurandu ghokwiya vene kukwenu ndi?" ⁴ Ene hani tumene mbudhi dhofotji yikandho yine ene name nawa huthere mundhira dhofotji. ⁵ Ndani Sanballat ne ghogha tumine mupikendi kukwange thika pakutanga, thikandho thoghukwoko nombapira munyara dhendi. ⁶ Mumbapira dhi ne ghatjangiremo eshi: Twawana mbudhi muditunga na-Geshem ne ghaghamba eshi; "Yowe nawa Juda ne mwakuroyithera kutjora muragho; Yodiyo, kukutha kunguyunganyi dhi, ghoghuna kutenda dirapa podiyo eshi wakukare ghofumu wagho. ⁷ Watorora karo hapumbi hahanyithe mbudhi dhokuhatera kukoye muJerusalem, ghuninga eshi moghadi fumu mu-Juda! Mbudhi dhi ne mbotuna dhikumitha kwafumu. Wiye podiyo eshi tukuwane." ⁸ Ghona mutumene mbudhi ghuninga eshi; "Mbadiko mbudhi dhahokoka kuno, thika edi ghuna kuyighamba ene mumutjima ghoye yina kutunda. ⁹ Waheya hakodjere hatuyapithe ghuninga eshi; Manyara ghagho ne mboghana pu kukashitha payiruwana yagho nombadi mboha yimanitha.Yodiyo Fumu, Nanarithe nyara dhange. ¹⁰ Munyima dhopo, neyire kundhugho dha-Shemaiah, mwana ghokatughuru wa-Delaiah, ghomwana Mehetabel, oyu hatjaperere mundhugho; Nogha ghambire kukwendi eshi; "Tuyende pofotji mundhugho dhaNyambi, mungirishe notuyandhere mathero ghongirishe, yoyishi hana kumu noha kupaghe, yoyishi ghuthiku ne hana kwiya noha kupaghe. ¹¹ Ene namuhuthire eshi; "Katughuru yira me ne ghoni tjire ndi? Nokatughuru munye ghokuninga yira me, oyu shogha tjirere mungirishe podiyo gha kaghamwene moyo wendi? Mbadi shoni yende mo!" ¹² Ndani nana nongonone eshi mbadi Nyambi ghana mutumu, ene ghahokore yinu yi muku nimanganyena, pamurandu eshi Tobiah naSanballat ne hamuruwere hani hete. ¹³ Pamurandu ghothitambo thi ne ghapwire kuruwera, podiyo eshi niyape nokutjira-tjira ne ghoni harure, nodiyo eshi hanite dina dyodiyi noni shwahuke. ¹⁴ Nyambi wange vuruke Tobiah na-Sanballat, kukutha kuyiruwana yagho, na-Noadiah ghomupumbi nawa pumbi waheya, awa hashanine kuni yapitha. ¹⁵ Ditete ne dyapwire kutenda mudiyuwa dyodikumi nodyo ghukwoko dya-Elul, mumayuwa makumi kwoko nomayuwa mawadi. ¹⁶ Noyahokokire oku hanyathi wetu waheya ne hayi yuva, no matunga agha gha tudhingumwetwedha ne hayimonine nohayapire thikuma mumeho ghagho hathinda yoyishi hadimukire eshi yiruwana yi ne ngayiruwana Nyambi wetu. ¹⁷ Shime karo, mumayuwa gho ne; hamayami gha-Juda ne ghatumine mambapira ghomengi kwaTobiah nomambapira ghomengi ghaTobiah ne gheyire kukwagho. ¹⁸ Hengi mu-Juda awa hatapire medhero kukwendi, yoyishi ye hemwenya Shechaniah, ghomwana Arah namwanendi ghokatughuru ne ghayekire mbuyama ghomwana Meshullam ghomwana Berechiah. ¹⁹ Shime karo hana tapire yiruwana yendi yoyiwa kukwange, noha katapire yighamba yange kukwendi ene Tobiah ne ghatumine mambapira ghokuni yapitha.