¹ Mbudhi dha-Nehemiah ghomwana Hachaliah. Yahokokire mukaghonda ka-Chislev{kaghonda koghukwoko-no koghune}, mumwaka ghodikumi nogho ghuwadi apa nakarire ku-Shushan. ² Hanani, ghumweya gho pawa minange ne gheyire nawa tutughuru kutunda ku-Juda, nawepure kuhatera kwawa Juda, awa hathiyarire mu-Jerusalem munyima dhomuhomo. ³ Haghambire kukwange ngeno; "Awa haparire kumuhomo ne mohadi momo mumukunda ene hadi muwoma nohonyi. Yoyishi, ditete dya-Jerusalem ne dyawa nomakogho ghapo ne ghapwa kutumekera nomudiro." ⁴ Popa nayuvire mbudhi dhino, nahungumanine nona dirire mumayuwa ghomengi; Nadhirerekedhire nokuraperera kwaNyambi ghomuwiru. ⁵ Naghambire eshi; "Nakuraperera kukoye Fumu Nyambi ghomuwiru, Nyambi Shokuru nogho Muwa thikuma; Owe gho kukumithamo makuyuvero nomathiyerero nawa hakuhaka nokukumithamo marawero Ghoye. ⁶ Nakumbera eshi matwi Ghoye ngogha yuve nomeho Ghoye ghayandhuruke, podiyo eshi Ghuyuve ndapero dhaMupikoye edhi nina kuraperera kenge pano, ghuthiku nomutenya; Dhohanoye ha-Esreali, hapikoye nokutongonona maharwero gha-Esreali agha twaharura kuKoye, twaheya ndhugho dhatate name naharura. ⁷ Twatenda ghushatani kuKoye nombadi twakutekera marawero Ghoye, nomayendithitho nothitjo eyi Warawere mupikoye Moses. ⁸ Vuruke no nakuraperitha eyi Warawere Mupikoye Mosesi eshi; "Ngeshi mbomupire kukara ghutawedhi, Ame ne mbona muharanganya mumatunga. ⁹ Ene ngeshi ghamuhuka kukwange nokukumithamo Marawero Ghange nokughatenda, ngambi kemo eshi mwamweya ne kayenda komawiru mukadi ene mbona Waghongawedha nokamureta kudyango edi Natororire eshi matungo ghawa hetha padina Dyange." ¹⁰ Awo ne Hapikoye nohanu Woye; Awa wakomononine nongcamu Dhoye Dhishokuru nodyoko Dyoye dyongcamu. ¹¹ Hekudyange, nakukumbera eshi matwi Ghoye ne ngogha yuve eyi ghana kumbera Mupikoye, oyu ghana rumbera muku kutekera Dina Dyoye; Ninge keho mupikoye yimutomboke mudiyuwa di no nakukumbera eshi Mupe ghunongo paghutho dhakatughuru yuno, yoyishi ame ne nakarire muhindi wafumu.