¹ Yahokokire mukaghonda ka-Nisan, mumwaka ghodikumi nogho ghuwadi ghoghuraghuri wafumu Artaxaxers; ghatorore vinyu nona twarire vinyu nokutapa kwafumu. Ame ne mbadi naneghedha toko-toko rumweya paghutho wendi. ² Yodiyo, fumu ne ghaghambire kukwange eshi; "Pashanye ghuna kashera, apa yidi mbadi ghuna kukorwa?" Eyi ne mbadiko yimweya ngeshi mbadi ndundumena dhomumutjima. Nayapire thikuma. ³ Naghambire kwafumu eshi; "Fumu ngo ghupare rure! Pashanye shoni pire kutokota ngeshi thitata omu harara hakerekango wange ne thapwa kuhanyaghura nomakorogho ne ghapwa kutumekera nomudiro." ⁴ Fumu ne ghaghambire kukwange eshi; "Yinu munye ghuna kukumbera?" Naraperera kwaNyambi ghomuwiru. ⁵ Naghambire kwafumu eshi; "Ngeshi kukona yishambererithe fumu, namupikoye ne ghuna muhimena yikumbera yendi, nakumbera eshi ngo kuni tuma ku-Juda, kuthitata omu yakara yipiro yawa kuru wange, podiyo eshi ngoni kathi tendurure. ⁶ Nafumu ne ghani huthire eshi: "Rure rokukuma kupi rwakushimba ruyendo roye noruvedhe munye mbokahuka? Oku herekadhi ne ghana hungumana pambadi dhendi. Fumu ne ghani tawedhere nona mupire ruvedhe. ⁷ Shime naghambire kwafumu eshi; "Ngeshi ghayi tawedhere fumu ne ngokunipa rukwaro rokutamba kwanguvuru ghokumikunda dhokumbombwa dhorware, podiyo eshi ghakuni tawedhere kate nakakume ku-Juda. ⁸ No rukwaro rumweya rokutamba kwa-Asaph, mukungi ghomuthitu, podiyo eshi gha kuni tawedhere kuteta yitondo nakutenditha mitambo dhomakorogho agha ghatamba kungirishe, nodho ditete dyothitata nodho ndhugho edhi nakutunga, nafumu ne ghayi nipire kukutha ghuwa ghodyoko dyaNyambi edi dyakarire papange. ⁹ Ndani ghona yendire kwanguvuru kumikunda dhokumbombwa dhorware noka tapa rukwaro rwafumu. Fumu ne ghatumine mukuru wawa mashurundate nawa dhini tukambe heye nange. ¹⁰ Apa Sanballat ghomu Horote naTobiah ghomu Ammonite ho hapiterithi hayuvire yinu ne hakashire thikuma yoyishi hamonine eshi katughuru yu ghaneya ne maghuwa ghawa Esreali ghana kushana. ¹¹ Yodiyo, nakeyire ku-Jerusalem nonana karire ko mayuwa mahatu. ¹² Ndani napindukire ghuthiku, name nawa tutughuru hohapu; mbadiko yu natongwere eyi ghani pire Nyambi mumutjima wange eshi kuna ruwana mu-Jerusalem nombadi nakarire nothimuna temba, kushwayitha ko ethi nadhinine. ¹³ Nayendire ghuthiku kudikorogho dyoku muronga nitambe kudithima edi hatire eshi dithima dyothiyoka nokudithima dyodiyara nokamona ditete dya-Jerusalem edi habonyona nomakorogho ghapo agha hatumekire nomudiro. ¹⁴ Ndani ghona yendire kudikorogho dyodithima nokudirombe dyafumu ene mbadiko mapitero ghothidhina thange pamurandu eshi dyango dyapo ne dithoropoto dyakarire. ¹⁵ Nayendire ghuthiku kumuronga nokamona ditete; ghona kapirukire nokwingenena kudikorogho dyokumuronga nona kahukire. ¹⁶ Haraghuri ne mbadi hadimukire eshi kupi nayendi endi eshi hadimuke eyi natendire; shime mbadi natongwere ha-Juda, hapristeri, hapiterithi, mayami no hamweya awa haruwanine yiruwana yi. ¹⁷ Ghona ghambire kukwagho eshi; "Kumona muna kumona toko-toko edhi tudi mumwadho, edi ghana hanyaghuka Jerusalem nomakorogho ghapo ne ghapwa kutumekera nomudiro. Mwiye tutende ditete dya-Jerusalem podiyo eshi tupire kufa honyi. ¹⁸ Nonawa tongwere eshi ngepi nyara dhishaghuwa dhaNyambi edi dhakarire nange noyighamba yafumu eyi ghaghambire kukwange; Awo ne haghambire eshi; "Twimanganye noturuwane" Yodiyo, hakukwatithire thiruwana thi. ¹⁹ Ene apa Sanballat ghomu Horonite naTobiah ghomu Ammonite na-Geshem ghomu Arab hoha piterithi hayuvire yi, hatu hekire nokutunyatha nokughamba eshi; "Yinu munye muna kutenda, ghomuna kutjora muragho wafumu ndi? ²⁰ Yodiyo ne nawa huthire eshi; "Nyambi ghomuwiru ne mboghana tughamwena, yodiyo, hapikendi ne hana kwimanganya nokutenda ene mwe ne mbadi mudi noghupingwa, ngcamu ngambi nunderero mu-Jerusalem."