Thimingwa 3
1
Ame ne nokatughuru yu ghamonine maghukukutu ghoghupata ghomburo dhaFumu Nyambi.
2
Ghani parandandire panunda nokunithiya mudikokore.
3
Yaghushemwa, ghapirure dyoko dyendi mukunirwitha shime nokaro, diyuwa dyodihe.
4
Ayondekire yipo yange nothitumba nokwipitha yishokora yange.
5
Ghaturithirepo yiruwana yomakwatero ghange no kuni dhingumwetwedha nomaghukukutu nomuremena.
6
Ghatendire nikare mudikokore, yira awa hatuthiya kare.
7
Ghani dhingumwetwedhere ditete podiyo eshi mbadi nomboroke. Ghatendire menge ghange ghakare ghuremu,
8
ngambi kemo eshi nethire nokudirera maghamweno ene ndapero dhange mbadi dhayuvekire.
9
Ghayandhera mayira ghange noditete dyomawe ghokutetaghura; ghatenda mayira ghange ghapete.
10
Aye ne yira didjidjikwe dina kutaterera kuni homokera, yira nyime yu ghana kutaka-takera.
11
Ghapetitha mayira ghange nokuni yevura.
12
Ghapetithire ndamba dhendi nokuni nomonona nodighonga dyendi.
13
Ghatetire mathiyo ghange nodighonga dyokushwagha muthirungo thomaghonga.
14
Hani shererire hanu waheya nomembo ghomushedho diyuwa dyodihe.
15
Ghani yarithire noghuwanga ghoghururu nokuni thineneka ninwe yikunyi yoghuyenyu.
16
Ghabonyaghurire mayegho ghange nomawe nokuni fikerera nomutwitwi.
17
Ghani kungure mudhimu wange ghothiraro; navurama ghushwi wange.
18
Yona kughambera, Madhidhimekero ghange ne ghafa nomakurupero ghange mwaFumu Nyambi.
19
Vuruke maghukukutu ghange nomayowero ghange, yikunyi yokuyenya notoko-toko.
20
Kehe pano me ne kuyivuruka nomudhimu wange ne wafa.
21
Ene nakuvuruka yi mumaghano ghange nokakukara nomakurupero.
22
Ruhakitho rondjikiti rwaFumu Nyambi ne mbadi wakuhura noruhakitho rwendi ne mbadi wakuhura,
23
Aro ne rupya kehe mathiku-thiku; noghutawedhi ghoye ne wangcamu.
24
Fumu Nyambi ne yoghupingwa wange, dyoghuna kughamba mudhimu wange. Yodiyo mbona kurupera mumwendi.
25
Fumu Nyambi ne muwa kwawa hataterera mumwendi, kumudhimu oghu ghuna kumushana.
26
Ghuwa thikuma kutaterera makomweneno ghaFumu Nyambi muthipore.
27
Ghuwa kwamunu yu ghana kushimba joko dhendi oku ye ne murereya.
28
Ngogha hungumane ne muthipore ngeshi oku hana yimuturera.
29
Ngogha ture kanwa kendi mudikungu podiyo eshi pakare makurupero.
30
Ngogha tape thindjumu thendi kwakehe yu ghana kumurwitha nogha muyaritherere nomatuka.
31
Fumu ne mbadi mbogha tunyatha kuroruhe.
32
Ene ngambi tudi mutoko-toko, mboghana kara shime noruhakitho kukutha kughukuru ghoruhakitho rwendi rondjikiti.
33
Aye ne mbadi wakurwitha muwina endi ghahumbithe mwana munu.
34
Muku gcuvurura nomapadhi wahe hakara mukashitiko mukaye.
35
Mukupirura ghuwa wamunu paghutho dhaFumu Nyambi Shokuru
36
endi kushwayitha munu mughwa wendi ne mbadi wakuyitawedhera Nyambi yokemo.
37
Yidye ghokughamba ndani ghoyihokoke ngeshi mbadi ghana yitawedhera Nyambi?
38
Nane mbadi yokushwagherera mukanwa kaFumu Nyambi yikare eshi maghukukutu endi maghuwa yokuhokoka ndi?
39
Ngepi shoyikare eshi kehe yu ghadi ghuyumi naye kunyeghenye? Ngepi edi shogha nyeghenye munu kumahumbithero ghomaharwero ghendi?
40
Mutukona-kone mayira ghetu notupiruke kwaFumu Nyambi.
41
Mutuyeyure moko ghetu kwaFumu Nyambi mudiwiru.
42
Twaharura nokutenda widhi ghomukungu, nombadi wathirera.
43
Wakufikerera ghupata noghuna kutukutha-kutha nowatupayire ene mbadi watu yuverere po.
44
Dyakuviva divuyi podiyo ghana kudhira kupita mandapero ghetu.
45
Watutenda yira hanu hokunyata nokutunyatha hanu.
46
Wahe hanyathi wetu ne kuna kutukuta.
47
Woma noghutjirwe papetu yidi nomahanyaghukero.
48
Meho ghange ne kuna kupoposha mo marware ghomahodhi pamurandu ghomahanyaghukero ghawanu wange.
49
Meho ghange mboghana rokwitha mahodhi kupira kushayekera endi kuturumutha.
50
Kate Fumu Nyambi kudiwiru ghakukenge pamuve nokumona.
51
Meho ghange kuna kureta yinyanda kumudhimu wange pamurandu ghohanange hohambuyama mumbara.
52
Hanyathi wange kuna kuni shana yira kanyunyi nohana kuni shana kupira thitambo.
53
Awo ne hatetera moyo wange mudikwina nokunivukuma nomawe.
54
Meyu ne ghana ngambwera mutwi wange no nakughamba eshi hana nitetiko!
55
Nethire dina Dyoye Fumu Nyambi kutunderera mughudhungi ghodikwina.
56
Wayuvire diywi dyange apa naghambire eshi wayandhera matwi ghoye kuthidiro thange.
57
Wahenyine pepi mudiyuwa edi nakwithire nowa ghambire eshi wayapa.
58
Fumu, wa ghamwene mudhimu nowa komononine moyo wange!
59
Fumu Nyambi wamonine ghuyi oghu hanitendire; watheke.
60
Wamonine matuka ghomahe nomandhira ghomahe ghokuni rwitha.
61
Wayuva matuka ghagho ghmahe Fumu Nyambi nomandhira ghagho ghkuni rwitha.
62
Miromo noyithotera yawa nyathi wange ne kukwange diyuwa dyodiheya.
63
Mone edi hana hungumana nomatuke; awo ne kuna kunisherera nomembo ghagho.
64
Wahuthere ghuyi oghu hana roghera kuwana, Fumu Nyambi kukutha kuyiruwana yonyara dhagho.
65
Mboghuna tura mutjima dhagho dhipire honyi! Ngo mahumbithero ghoye ghakare papagho!
66
Wakuthe noghupata nokuwa dhongonona po pamuve dhomawiru.