¹ Fumu Nyambi ne gha ngambwere mwana Zioni ghombuyama mudivuyi dyoghupata. Ghafukumenine thishe tha Isreali kutunda kuwiru thiwe pamuve nombadi ghavurukire madjatero ghandi mudiyuwa dyoghupata wendi. ² Fumu ghana mana kurowedha nokuthiyerera temba madoropa ghomahe ghaJacob. Mudiyuwa dyoghupata wendi ghanatekire mambara ghongcamu ghohana Juda hohambuyama; noghawa withere pamuve maghufumu nohapiterithi wamo. ³ Noghukenya wendi ghatetire ko kehe nyiha dhaIsreali. Aye ne ghashwayitha ko dyoko dyendi kwawa nyathi. Aye ne ghatumeka Jacob yira mudiro ghokumwarura kehe thi ghuna dhingumwetwedha. ⁴ Ghapetekire dighonga dyendi nodyoko dyorudyo kukwetu yira twanyathi. Aye ne ghathathure wahe awa hamukuyire mukakurwera kamwana Zioni ghombuyama; no Aye ghanotwere ghupata wendi yira mudiro. ⁵ Fumu Nyambi ne ghakarire yira munyathi. Ghangambwere Isreali noku ngambwera mambara ghendi. Ghahanyaghura mangcamu ghendi nokuwedherera maghukukutu nomadiro mwa mwana Juda ghombuyama. ⁶ Aye ne ghana reta mepithero kuthinyaku thendi yira thinyamo. Ghahanyaghurire dyango dyendi dyo makuwaneno. Fumu Nyambi gharetedhere hanu havurame mapongo noma sabata muZioni, pamurandu eshi ghadhimbire hama fumu nawa pristeri mughukenya ghoghupata wendi. ⁷ Fumu ne ghana nyatha thinyaku thendi nokushwena thinyaku thendi. Aye ne ghatapa matete ghombara dhendi munyara dhawa nyathi. Awo ne kuyererire nokayoghototo kokakuru mundhugho dhaFumu Nyambi yira mudiyuwa dyomukandi ghomatoyedhero. ⁸ Fumu Nyambi ghatokara kurundumuna ditete dyombara dhamwana Zioni ghombuyama. Ghaghonyononine mururwani nombadi ghanyohekire kupira kwipitha ditete. Aye ne ghatenda mutuya dhomatete nomatete gharundumuke pofotji. ⁹ Makorogho ghendi ne ghadhamine mumuve; Aye ne ghahanyaghura mayonga ghomakorogho. Hafumu nohanagho ne mohadi mumatunga nomuragho ne mbadipo nohapumbi wendi ne mbadi hana kupita muyimona meho. ¹⁰ Hakuru wamwana Zioni ghombuyama hana hungumana mumuve thipore. Awo ne hakututhere rukungu mumitwi dhagho nokukughanga yighudjovoro. Hambuyama awa hapira kukundama kwawa tutughuru ne hanyongekire mitwi dhagho mumuve. ¹¹ Meho ghange ne ghakangire nomahodhi; mutjima wange ne ghuna ndundumena nodira dyange dina shukukera pamuve pamurandu ghomahanyaghukero ghambuyama ghomwana Zioni hanu wange; hanuke no tumbututu ne kuna kupwererera mumbirikatji dhombara. ¹² Agho ne kughamba kwawa nyokwagho eshi kupi mushungwa novinyu? Thika dyodi hana kupwerera yira katughuru ghomurema mumbirikatji kombara nomoyo dhagho ne dhapwa kupingwerera mudiva dyawa nyokwagho. ¹³ Ngepi edi shoni kuhenngaghure we? Nokwadye shoni kurikanyithe we mwana Jerusalema ghombuyama? Kuthinu munye shoni kurikanyithe we, podiyo eshi nikuhengaghure we mbuyama yu ghapira kukundama kwakatughuru? Yidye mbogha kwirukitha we? ¹⁴ Hapumbi wenu ne hamona mbango noyimona meho yombango yenu. Awo ne hondekire maharwero ghoye mukuhuthedherapo mukwato ghoye ene kukoye hapumbere mbango nomayongarithero. ¹⁵ Yomuhe ghana kupita kundhira ne hana kumukanderera. Hana kutothima nokupunga-punga mitwi dhagho kwamwana Jerusalema nokughamba eshi; Edhi ne dhombara hethire eshi "Maghuwa ghokuhungamenena." Yishamberera yokaye kokahe. ¹⁶ Wahe hanyathi ghoye ne hana yahura tunwa twagho kukoye. Hana kukwetjura mayegho ghagho mughukenya nokughamba; Twa mungambwathana! Edi ne dyodiyuwa twatatererire! Tuna hengi mukuna mona yi. ¹⁷ Fumu Nyambi ne ghana tendi eyi gharongeka. Aye ne ghana yaritherera yighamba yendi, eyi gharawere mayuwa gho pashakare. Aye ne ghamuwithire kupira nyeke nogha tawedhera hanyathi hashamberere nokuyeyura nyiha dhawa nyathi wenu. ¹⁸ Mitjima dhagho dhadirere kwaFumu, matete ghamwana ghombuyama waZioni! Mahodhi ngogha poposhe yira rware mutenya noghuthiku. Mwaturumutha, nomeho ghenu temba eshi ghaturumuthe. ¹⁹ Mupinduke, mudire mughuthiku nopakatji koghuthiku! Munotore mitjima dhenu yira meyu paghutho dhorupara rwaFumu. Muyeyure manyara ghenu kukwendi kumoyo dhawanenu awa hana kupwerera kundhara mumashonga ghomambirikatji. ²⁰ Mone Fumu Nyambi, ghamwene awa ghuna humbitha mundhira dhi. Hambuyama ne mbohana di yomukogha dhagho ndi. hanagho awa hapakera thinga? Hapristeri nwa pumbi hawa peghere muthinyaku thaFumu ndi? ²¹ Wahe hanuke nawakuru hana rara mumbirikatji. Hanange hombuyama awa hapira kukundama kwawa tutughuru nawa ngaghu ghana ne hawera kudimende; wawa payire midyuwa dyoghupata ghoye. ²² Wawa ranyine thika dyodi ghuna kwitha hanu kudiyuwa dyomukandi, woma wange kumitara dhodhiheya, mudiyuwa dyoghupata waFumu Nyambi yoyishi noghofotji temba yu ghayokokire mo; awa napakere thinga nawa narerire hapwire kupagha hanyathi wange.