¹ Tongwere haminoye hoha tutughuru, 'Hanu wange!" haminoye hohambuyama, "Eshi wawa neghedha ghunongo." ² Rete mirandu dha nyoko; yoyishi ye ne mbadi mbuyama wange endi eshi ngwa me ne nokatughuru wendi! Ghashayeke rungu rwendi, nogha shayeke kutjora yiyeka pakatji komere ghendi; ³ Ngeshi mbadi kemo, mbona muhurura ghakare thiheha nokushwahuka yira diyuwa dyodi hamuwanine; nokumutenda yira mamboreya nokumutenda yira dyango dyorukukutu nokumupagha kudinota. ⁴ Mbadi mboni thiyerera po hanendi, yoyishi awo ne hana mbuyama ghorungu. ⁵ Nyokwagho ne ghatenda rungu, oyu ghamuwana ne ghana mufitha honyi. Yoyishi aye ne ghaghamba eshi ame ne nakukutha hahakwa wange, awa hanipanga yidya nomeyu. Wanda, yishupata yoyikenu, munde noyinwa yange. ⁶ Yodiyo, Ame ne mbona ghumbu mundhira dhoye noruthito romunga, nokumutura mwishi, podiyo eshi mbadi ghawane dhira dhokushwagha. ⁷ Mboghana kuthu hahakwa wendi ene mbadi mbogha wapiterera; kemo, mboghana wakuthu ene mbadi mbogha wawana ndani pombo ghaghamba eshi nakuhuka kwakatughuru wange ghokutanga. Yaredhupire kukwange kupiterera pano. ⁸ Mbadi ghayidimuka eshi namupire ghuheke, vinyu ghomupya nomunde. Nokuwedherera muyangu wendi gho Siliveri noNgorondo, eyi haroyithere kwa-Baali. ⁹ Yodiyo, nakuhuka noka yimushwayitha, ghuheke wange paruvedhe rwagho novinyu wange ghomupya pathivaka thendi. Mbona hutha wanda wange noyishupata yange yoyikenu, eyi namupire ghafike thiheha thendi. ¹⁰ Pano keho ne nakumu hurura ghakare thiheha paghutho dhohahakwa wendi, noyofotji temba mbogha mughamwena munyara dhange. ¹¹ Mbona shayekitha yishamberera yendi, mayuwa ghendi ghoyirika yokukushamberera, yirika yotughonda totupya nomayuwa ghomaturumuthero ghendi. yoyiheya yirika yendi. ¹² Mbo nepitha mapya ghendi noyitondo yoghukuyu, eyi ghaghambire eshi; "Oghu ne muyangu wange oghu hani pire hahakwa wange nokughutenda ghukare muthitu noyiyama yomumuthitu ne mboyina yivoto. ¹³ Mbona muhumbitha. Mayuwa ghaBaali, oku ghakatapire nokuyamba hapo. Ghakuyengire thinda nomanyunyani, yiyonga nokuyenda kwawa hakwa wendi ene Me ne ghani vuramine, dyoghana kughamba Fumu Nyambi. ¹⁴ Yodiyo; mumone, nakumutenda ghadovaghukere nombona mureta mumamboreya nokughamba yomahengewero kukwendi. ¹⁵ Mbona mupa dipya kokuya nomuronga wa-Achor, eshi thero dhomakurupero; Mbogha nembi kudyango di, thika mumayuwa ghokuye ne murereya shime, nothika dyodi ghakashwayire mudyango dya-Egyptena. ¹⁶ Nomboyina kara mudiyuwa dyo; edi mboghu Nitha eshi nokatughuru ghoye, dyoghana kughamba Fumu Nyambi, nombadi mboghu Nitha eshi; "Muhona wange!" ¹⁷ Mbona shwayitha dina dya-Baali mukanwa kendi, mena ghagho ne mbadi mbogha ghavuruka karo. ¹⁸ Mudiyuwa dyo ne mbona tendi makuyuvero ghagho noyiyama yomumuthitu, yinyunyi yomuwiru noyo yiheya yokukokawa pamuve. Mbona shwayithapo pakaye mandamba noyimende yokurwitha, nakuwa tenda hakare mumakungero mwene. ¹⁹ Mbona kukuruperitha nikare nokatughuru ghoye kuroruheya. Shemwa, mbona kukuruperitha ghukare kukwange, mughupongoki nomughuhungami, muruhakitho nomughunongo. ²⁰ Mbona kukuruperitha kukwange mughutawedhi nomboghuna dimuka Hekudyoye. ²¹ Mboyina hokoka mudiyuwa dyo, eshi Ame ne mbona kuhuthera; dyoghana kughamba Fumu Nyambi; Mbona kuhuthera mawiru nombohana huthera kaye. ²² Kaye ne mbokana hutha ghuheke, vinyu ghomupya nomaghadhi. Mbohana huthera Jezreel. ²³ Mbona mukunu noThinda mukaye, nombona thiyerera oyu ghapirire kuwana mathiyerero, mbona ghamba kwawa hakarire eshi mbadi hanu Wange, amwe ne mwahanu Wange, nagho mbohana ghamba eshi Owe ne ghoNyambi wetu.