¹ Nakutenepo, abale wangu wakukondedwa pomwe wandinawo chifundo, imwepo mumbandikondwelesa chaibzvo pomwe ndinidumba chaibzvo naimwepo tangwe lanu. Imwepo abale wangu wapamtima, limbikilani pakumila kwanu mukakhalidwe yanu mwaChawuta. ² Ndaphata minyendo, Yuodia naSintike, ndinikukumbilani kuti muyese kuphatilana pawubale bwanu mwaMpfumu. ³ Ndinikumbilambo pomwe mwanzangu wakukhulupililika kuti uthandize akhazi awo, pakuti iwo adaphata basa mwakulimba pabodzi nainepo pakulalikila mafala yabwino, pabodzi naKremenzi naanyabasa anzangu wentse, wale anamadzina yalimubhuku lawumoyo. ⁴ Kondwelani mukuphatana kwanu naMpfumu nthawe zentse, ndinibwelezela pomwe, mumbakondwa. ⁵ Yitani kuti wanthu wentse awone kudelekha kwamtima yanu, Mpfumu alipafupi. ⁶ Lekani kubzvidya mtima yanu pachinthu kana chibodzi chokha, koma nthawe zentse mumaphemphelo yanu yentse kumbilani Mulungu bzvinthu bzvamunisaya imwepo, ndiye nthawe zentse mumbaphemphela namtima yakutenda, ⁷ pamwepo mtendele waMulungu, ule uniposa nzelu zawanthu, unizabhasopewa bwino mitima nanzelu zanu mukuphatana naKristu Yesu. ⁸ Pakumalizila , abale wangu, dzadzani nzelu zanu nabzvinthu dzabwino, bzvinthu bzvinthu bzvinibwelesa kuthukuziwa, bzvinthu ninga bzvachadidi, bzvinthu bzvinibwelesa kulemekezeka,bzvakulungama, bzvakuchena, bzvakukoma pomwe bzvina ndemela. ⁹ Yitani bzvinthu bzvile bzvamudafunda nakutambila kwayinepo, kuchoka pamafala yangu naibzvo bzvamudawona ndichichita, nakutenepo Mulungu umweyo anipasa wanthu mtendele, anizakhala naimwepo. ¹⁰ Inepo ndakondwa kwene-kwene nakuphatana kwathu naChawuta ndinikumbukila pomwe pakundithandiza kwanu. kukumbuka mukandikumbuka bzvanu, koma mukasaya mpata. ¹¹ Ndinilewa lini bzvimwebzvi thangwi lakuti ndasaya chinthu nee, pakuti inepo ndidafunda kukwaniliwa nabzvinthu bzvandinenge ndinabzvo mubzvinthu bzventse. ¹² Inepo ndinidziwa chiniyitiwa umphayi, pomwe chiniyitiwa kudala ndichidziwa, pabzvinthu bzventse ndidafunda kukhala ndida kwaniliwa, peno ndikakhuta, nee ndina njala, nee kukhala nabzvinthu bzvinyinji nee bzvin'onong'ono. ¹³ Ninikwanisa kuchita bzventse nakufuna kwauyo animpasa mphambvu. ¹⁴ nakutenepo mudachita chinthu chatengo wapatali kundithandiza pakusawuka kwangu. ¹⁵ Imwepo Afilipi munidziwa chaibzvo kuti pandidachoka ine kuMakedoniya ntsiku zakuthoma zile zakulalikila mafala yabwino, palibe mpingu udandithandiza, kusiya kwampingu wanu udamila naiye pankani yakupasa nakutambila. ¹⁶ Nee pandikhali muTesalonika, mudapeleka thandizo kadawanda kwen-kwene kuzhula kabodzi. ¹⁷ Bzvinilewa lini kuti inepo ndikafuna bzvipo bzvanu, nee, zhayi ndikafuna kuwona mabasa yabwino yadawanda yachimbathimiziliwa padzulu pabzvile bzvamudayita kale. ¹⁸ Ndidatambila bzventse tsapano ndinabzvo bzvizinji, pomwe nakuzhula. nakutenepo ndinabzvo bzventse bzvandinifuna , ibzvo bzvamudanditumila imwepo naEpafrodito. mphaso zimwezi zakhala ninga mnunkho wabwino uninunkhila, ntsembe idatambiliwa pomwe nakukondwelesa Mulungu. ¹⁹ Mulungu wangu anampfuma yidawanda kwene-kwene, ndiye mwaKristu Yesu anizakupasani bzventse bzvamufuna. ²⁰ Nakutenepo kwaMulungu pomwe Apayi kukhale nandemela kufika lini na lini. Ameni. ²¹ Mupasembo moni kuna wanthu wentse munaKristu Yesu. Atenedi alipadzi naiyinepo kuno alikukupasani moni. ²² Wanthu wentse waMulungu alikuno alikukupasani moni maka-maka wale aniphata basa kunyumba yaSiza. ²³ Kukoma ntima kwaMPfumu wathu Yesu Kristu kukhale naimwepo mumuzimu wanu.