¹ Abale wangu, kana munango akhaphatiwa achitaza chelo kwamushowo uponi bzvawene, imwepo munitsogolelewa naMzimu waMulungu munifanila kumubweza, koma bzviiteni namtima wakudeleka. Ndiye imwepo khalani mudabzvichenjelela kuti naimwembo musayesewe nabzvakuipa. ² Thandizani kutakula mitolo yamunango namunango kana mwaita tenepo muninga matetekela mtetwe wakristu. ³ Kana munthu akabzviwona yekha kuti iye ndimunthu kwenge, koma iye asili kwengwe, munthuyo anenge achibzvinamiza. ⁴ Munthu nganyangane khaphatilo kaniita basa lake kana lili labwino ndipo paungafanile kubzvidumba padzulu pabasa lako asingaenzanise basa lake nalidayitiwa naanzake. ⁵ Pakuti munthu namunthu anifanila kubzvitakulila mutolo wake. ⁶ Munthu ule alikufunda mafala yaMulungu, anifanila kugawana nanyakufundisa wake bzvense bzvabwino bzvanabzvo. ⁷ Lekani kubzvinamiza, palibe munthu angayese Mulungu ulombe. Munthu anikololola bzvadadzvala. ⁸ Munthu anidzvala kuchokela mumakhalidwe yakuipa yakubelekewa nayo, anizakolola impfa koma anibzvala mukuteyeza mzimu wamulungu, anizakolola umuyo usingamale kuchokela Mmzimu waMulungu. ⁹ Saka tisanete kuita bzvabwino, pakuti tikaleka kuneta, nthawe ichafika pamwepo patinizakolola bzvatidabzvala. ¹⁰ Tenepo, nthawe zense patiniwona mpata tinifanila kuitila bzvabwino kumunthu wense maka-maka wathu wale akristu. ¹¹ Wonani mabhii makulu-makulu yandanemba pamwepo, ndikali kukunembelani imwepo najanja langu ¹² chailo.Wanthu akuyesa kukumanikidzani kuti mugwatiwe nsonga yaumuna ndiwo wale anifuna kuti owoneke ninga adakoma pamaso pawanthu, achibzvimenya chititi chawo padzulu pabzvaadaita pathupi lawo . Iwo abzviita kuti asazunziwe tangwe lakulalikila padzulu pamtanda wakristu. ¹³ Nee kana amwewo antezela msambo wakubzvigwata nsonga yaumuna anitetekela lini mtemo iwo anifuna kuti imwepo mugwatiwe nsonga yaumuna kuti iwo abzvimenye chititi kuti imwepo mudatetekela bzvakugwatiwa nsonga yaumuna. ¹⁴ Koma inepo ndini dumba padzulu pamtanda waYesu Kristu yekha basi pakuti thangwe lamutanda ndiniwona kuti bzvinthu bzvapadziko lapansi bzvidafa kwainepo ndiye inembo ndidafa pabzvinthu bzvadziko lapansi. ¹⁵ Kugwatiwa nsonga yaumuna kana kusagwatiwa bzvilibe basa nee, chinifunikana maka-maka ndichakuti Mulungu apase munthu umuyo watsapano. ¹⁶ Kuna awo atezela mafundiso yamweya mtima wawo, mtendele nantsisi zaMulungu bzvikhale pana iwo nakuwanthu wense waMulungu. ¹⁷ Pakumaliza ngapaleke kuwoneka munango munthu ambandishupa pomwe, pakuti mabzvanga yandinayo pathupi langu yaniwonesa kuti inepo ndine mulanda waYesu. ¹⁸ Kukoma mtima kwaMfumu wathu Yesu Klistu ukale naimwepo mwense abale wangu. Amen.