¹ Chinthu chanifuna kukuuzani , ndichakuti Nyakusiiliwa nthaka kana ali mwana , iye adangofanana nakapolo , nee bzvake achizakhala mwenchilo wanthaka. ² Koma iye ali mung'ono anikhala anli pantsi paanimuchengeeta kana animumililila paka kufikila panthawe idalewedwa naAayi wake. ³ Bzvibodzi-bodzi naifepo, patikhali wana tikhali akapolo wamizimu initonga dziko lapantsi. ⁴ koma nthawe nakudzala kwayene paidakwana, Mulungu adatuma mwana wake, Adabadwa namkazi, adabadwa alipantsi pamulawu ⁵ ,Adachita ibzvi nandawa yakuti apulumuse awo akhali pantsi pamulawu kuti tikhale wana waMulungu ⁶ Pakuti ndimwe wana, Mulungu adatuma Mzimu wamwana wake mkati mwatima yathu kuti timuchemele kuti ''Abba, ⁷ Apayi.''Nakutenepo ndimwelini akapolo, koma mwana, Mulungu azakupasani nthaka yentse idachengetelewa wana wake ⁸ Kale mukhali ,wanthu asingadziwe Mulungu mukhali akapolo waawo akhali namphambvu wakubzviti ana Mulungu asili ana Mulungu chaiwo. ⁹ Pakuti tsono mwakudziwa Mulungu kana kuti Mulungu wakukudziwani, nakutenepo mungachungunukile tani pomwe kubzvakuyipa namalamulo yapezi-pezi ile? mukufuna kukhala akapolo wayene pomwe? ¹⁰ Munipemphela ntsuku zidasankhulika, mwezi,nthawe nabzvaka! ¹¹ Ndinigopa kuti mabasa yentse yandidaphata ndinaimwe ndidayaphatila fovholo. ¹² Nikukumbilisani, abale, mukhale ninga inepo, Pakuti ndininga imwepo, mulibe chamudandidzongela. ¹³ Imwepo mubzvidziwa kuti kulalikila kwangu kwakuthoma mafala yabwino kwaimwepo ndidakuyita thangwe lakuti ndikaduwala. ¹⁴ Kana bzvabzvene utano wangu ukaninga mayeso kwaimwepo, mulibe kundinyanganila pantsi, kana kundilamba, mudanditambila ninga ngilozi inchokela kwaMulungu, ninga ndikhali Kristo Yesu Pachake. ¹⁵ Imwepo tsono madaliso yanu yalikuponi? inepo ndinikwanisa kuwa kamboni, ko ndichani tsono chilipo ? inepo ndekha ndikwanisa kukuyitilani umboni wakuti mukakwanisa kufonokola maso yanu, mukadafonokola kuti mundipase. ¹⁶ Ko tsapano ndakhala mudani wanu nathangwe lakuti kukuwuzani chadidi? ¹⁷ Wanthu anango amwewa alikubzviwonesa ngati akukonda, koma iwo alibe nzelu zabwino naiwepo chaalikutsungila kukupatulani kwainepo tsono bzvabwino kuwamphandupandu pabzvinthu bzvanzelu yabwino, ¹⁸ Bzvabwino kuyita bzvimwebzvi nthawe zentse, nee kuti pamwepo pandinenge ndili naimwe. ¹⁹ Wana wangu wapamutima ndilikuwawikana ninga ndili kubeleka, ndiko kuwawa kwaninimbva padzulu panu. ²⁰ Ndina shungu ninga ndakala naimwe ntsono, kuti peno ndikadasandula mafala yangu pakuti ndilikukugopelani. ²¹ Ndiuzeneni,amwewo afuna kukhala pansi pamulawu, ko munibva lini bzvilewa mulawu. ²² Bzvinilewa kuti Abhurahamu akhana wana wachimuna awili, mubodzi adaita namukazi kapolo , munango namukazi asili kapolo. ²³ Mwana munango adabadwa nakapolo adabadwa ninga mabelekelewo yaniita wense .Mubodzi adabadwa namukazi akasili kapolo adabadwa bzvikadalewewa naMulungu. ²⁴ Bzvimwebzvi bzvili ninga mufanikiso, pakuti akaziwa awili adamililila bzvipangano bzviwili , mukazi ule ana wana adabaliwa muulanda ndiHagali, iye adamililila chipangano chidaitiwa paphili lapaSinai. ²⁵ Hagala, ule alikumililila pili laSinai mudziko laAlabiya. Animilila pomwe guta laJelusalema, tangwe lakuti iye nawana wake ndaakapolo. ²⁶ Koma Jelusalema lakudzulu lilini pansi paulanda-ndiye ilo ndiwo amayi wathu. ²⁷ Pakuti Manembo yanilewa kuti, ''Kondwa iwe mukazi alibe kubala, yimba pomwe, menya mbulungwe nakukondwela, iwe ukanati wabva kuwawa kwakubala. Pakuti mukazi adasiiwa namamuna wake anizabala wana adawanda kuposa mukazi,ule alibe kusiiwa namamuna wake.'' ²⁸ Tsapano, imwepo abale wangu, ninga bzvidaita Isaki, ndimwe wana waMulungu kuchokela kubzvintu bzvidalewa Mulungu kuti anizayita. ²⁹ Panthawe imweyo mwana adabaliwa ninga kubaliwa kuniyitiwa munhtu wense adasawusa ule adabaliwa thangwe laMuzimu waMulungu; ndiye ndibzvo bzvibodzi-bodzimbo tsapano. ³⁰ Ko Manembo yaniti tani? Yanilewa kuti ''Thamangisa mukazi mulanda namwana wake ; pakuti mwana wa mkazi mulanda angankale lini na ntaka ya apayi wawo pabodzi namwana wa mkazi asili mulanda.'' ³¹ Tsapano abale wangu, ifepo ndife lini wana wa mkazi, koma wa mkazi ule asili mulanda