¹ Mpawo Jehova wakanditondezya Josyuwa mupayizi mupati kayimvwi kunembo lyamungelo wa Jehova alimwi Satani wakalimvwi kulubazu lwajanza lyalulyo lwakwe kukumubejelezya chibi. ² Mungelo wa Jehova wakati kuli Satani, ''Jehova akutapatile webo, Satani; Jehova, oyo wakasala Jelusalemu, akutapatile! Sa oyu teensi chisimbi chagwisigwa kuzwa mumulilo naa?'' ³ Josyuwa kasamide zizwaato zyamatombe nakiimvwi kunembo lyamungelo. ⁴ Mungelo wakambula alimwi wakati kulimbabo bakiimvwi kunembo lyakwe, ''Amugwisye zizwaato zyamatombe kuzwa kulindinywe.'' Mpawo wakati kuli Josyuwa, ''Langa! ndagwisya mulandu wako kuzwa kuli nduwe alimwi njokusamika azyakusama zibotu zyebesi.'' ⁵ Mpawo ndakati, ''Bamusamike chitambala chisupukide amutwe wakwe!'' Aboobo bakasamika chintambala chisambide amuutwe wa Josyuwa akuzwata zizwaato zisupukide, awo mungelo wa Jehova nakachiimvwi ambabo. ⁶ Elyo mungelo wa Jehova wakasungwaala kulayilila Josyuwa aakuti, ⁷ ''Jehova wamakamu mbuboobu mbwawamba: Naa uyende munzila zyangu, alimwi ubambe malayilile aangu, mpawo uyoyendelezya ng'anda yangu akutonga nkuta zyangu, nkambo njokuzumizya kunjila akusika akkati kabaaba bayimvwi kunembo lyangu. ⁸ Swilila, Josyuwa omupayizi mupati, webo abazolwani bako abo bakkede anduwe! Nkambo baalumi aba nchitondezyo, nkambo mebo ndayeta mulanda ii Mutabi. ⁹ Lino langa kubbwe ndindabikka kunembo lya Josyuwa. Kuli menso alimusanu aabili aabbwe lyomwe, alimwi njoolemba bulembo -- oku nkwaambula kwa Jehova wamakamu -- alimwi njogwisya zibi kuzwa kunyika eyi muzuba lyomwe. ¹⁰ Muzuba elyo -- oku nkwaambula kwa Jehova wamakamu -- moonse muyotambana asimabambanwa wakwe muchisiko chamusansa wakwe aamunsi amukkuyu wakwe.''