¹ ''Mubuzuba oobo kasensa kayojulwa kung'anda yaDeviti akubakkali bamu Jelusalemu, akaambo kazibi abusofwaazi bwabo. ² Mubuzuba oobo - ooku nkwaamba kwaJehova wamakamu - njogonka mazina aamituni yamunyika kuti atakayeyeegwi limbi. Ndiyogwisya basinsimi amuuya usofwede kuzwa munyika. ³ Na umwi muntu wiinkilila kunembo akusinsima, wisi abanyina bakamuzyala bayomwambila kuti, 'Tokoyopona pe, nkaambo waamba zyakubeja muzina lyaJehova!' Mpawo wisi abanyina bakamuzyala bayomuyasa aawo natakasinsime. ⁴ Mubuzuba oobo awumwi musinsimi uyofwa bweeme kuchilengano chakwe aawo natakaambe kusinsima. Basinsimi aaba tabakoyozwaata chikobela chaboya pe, kuchitila kweena bantu. ⁵ Nkaambo awumwi uyowamba kuti, 'Nsili musinsimi pe! Ndili muntu buyo uubeleka muse, nkaambo nyika yakaba mubeleko wangu nindakachili mwaalumi muniini!' ⁶ Pesi umwi uyowamba kuti, 'Ani eezi zilonda zili aakati kamaboko nzyenyamanzi?' mpawo uyosandula kuti, 'Ndakachisigwa ababo bakali mung'anda yamweenzuma.''' ⁷ ''Panga! Buka iwe lwako ukalwisye mweembeli, mwaalumi wiima afwifwi andime - ooku nkwaamba kwaJehova wamakamu. Uma mweembeli alimwi mbelele zilamwayika! Nkaambo ndiyoboozya janza lyangu kui baabo bandilwisya. ⁸ Mpawo chiyoosika chiindi chakuti munyika yoonse - ooku nkwaamba kwaJehova - kuti zimpanzi zibili mulizitatu iyogonkwa! Aabo bantu bayoloba; uumwi luzutu muli batatu uyosyaala. ⁹ Ndiyoyeta chimpanzi chatatu akubiinzya mumulilo akubasalazyambuli nsiliva mbiisalazigwa; ndiyobasunka mbuli ngolide mbiisunkwa. Bayoyita zina lyangu, ambebo ndiyobavwiila akwaamba kuti, 'Aaba mbantu bangu!' alimwi bayowamba kuti, 'Jehova nguLeza wangu!'''