Mwanakazi waambula kumwalumi, ¹ Ndalikulombozya kuti nwali mbuli mukulana wangu, wakanyonka kunkolo zyabaama. Mpawo kufumbwa nindali kukuswaana anze, ndali kukumyonta, alimwi takukwe wali kundinyansya. ² Ndali kukuzulwida akukuleta mung'anda yabaama - oyo wakandiyiisya. Ndalikukupa wayini ununkilila kuti unywe amusinza wama pomegilanayiti aangu. Mwanakazi kalyambuzya lwakwe mwini ³ Janza lyakwe lyachimwensi lichegwide mutwe wangu ajanza lyakwe lyachilisyo lili ndikumbete. ⁴ Mwanakazi kaambula kuli bamwi banakazi, Ndiyanda kuti mukonke, bana basimbi ba Jelusalemu kuti tamukoyobusya naa kuyosukutizya luyando kusikila lwabotezya. ⁵ Banakazi ba Jelusalemu kabambuula, Ngwani oyu ulikuza kuzwa kunkanda, uyeeme amuyandwi wakwe? Mwanakazi kawambula kumwalumi ngundakabusya aansi lyamusamu apulikkoti; awo banyoko mpuba kakumintila; awo mpaba kakutumbukila. ⁶ Ndibikke mbuli chinamatizyo amoyo wako, mbuli chinamatizyo kujanza lyako, nkambo luyando lulanguzu mbuli lufu. Kuyanda kwalo taluzulili mbuli kabanda; mulilo walo ulavwilima; mulilo uyaka, mulilo winda kuumpa nikuba umwi mulilo. ⁷ Maanzi miingi taakonzyi kuuzima luyando, nikuba mazambangulwe kuti anga alaluyila. Naa mwalumi wapa zintu zyonse zya mung'anda yakwe kuluyando, chipo chilanyansigwa kapati. ⁸ Banyanduumi bamwanakazi bala lyambuuzya akati kabo. Tulaamuchizi muniini, alimwi nkolo zyakwe tazina komena pe. Niinzi nchitunga tulachitila muchizi wesu mubuzuba nayoosyomezegwa kukwatwa? ⁹ Naali bulambo, twali kuyaka kakunka alinguwe kansiliva. Naali kkoma, twali kulipanga amapulanga amu seda. ¹⁰ Ndakali bulambo, alimwi nkolo zyangu lino zyaba mbuli tukunka; Aboobo mumenso aakwe ndaba mbuli umwi uyeta luumuno. Bamwi bayiiyi babala kuchiHebbulu bbala lya ''Luumuno''' akuli sandulula antela: Ndili mumenso akwe mbuli umwi uleta luumuno naa: aboobo ndajana choolwe mumenso akwe. ¹¹ Mwanakazi kalyambuuzya, Solomoni wakali amuunda kuBbaalu Hamoni. Wakuupa kuli baabo balikukonzya kuubamba. Awumwi walelede kuleta masyekeli alichuulu ansiliva kumichelo yawo. ¹² Muunda wangu, wangu loko, ulikunembo lyangu; chuulu chamasyekeli ngaako, Solomoni, alimwi myaanda yobile yamasyekeli ngaababo babamba michelo yawo. ¹³ Mwaalumi kaambuula kumwanakazi, Webo nuukkala muzilili mbendilabo balaswiilila ijwi lyako; leka ndilimvwe. ¹⁴ Fwambaana, muyandwi wangu, alimwi ube mbuli mwana waseekwa naa musune muniini muzilundu zyatununkilizyo.