¹ Majwi aamwana Lemuyeli - mulazyo banyika ngubakamuyeezya. ² Niinzi, mwanaangu mulombe? ³ Utaabili ngizu zyako kumwanakazi, naa nzila yako kulibaabo banyonyona baami. ⁴ Teensi zyabaami pe, Lemuwelu, teensi zyabaami kuti banywe wayini, na bazuluzi kubeenkosya yachakunywa chileenguzu, ⁵ nkaambo eelyo nibanywa balaluba eezyo nzibakakonka, akunyonganiya zyeelelo zyaboonse basalidwe. ⁶ Pa chakunywa chileenguzu kumuntu baabo bapengede mumoyo. ⁷ Ulanywa alimwi ulaluba buchete bwakwe alimwi takoyoyeya mafwabi aakwe. ⁸ Ambwiida aabo bataambuuli, kumilandu yaboonse balikupengana. ⁹ Ambuula akubeteka mumweele ooyo ulikabotuakumwayisya milandu yabafwaba abayanda lugwasyo. ¹⁰ Ngwani ukonzya kujana mwanakazi mubotu? Bulemu bwakwe bulikule kwiinda nchoko. ¹¹ Moyo wamulumaakwe ulasyomena mulinguwe alimwi takoyooba muchete pe. ¹² Uchita zintu zibotu mulinguwe alimwi kutakwe bubi mumazuba aakupona kwakwe. ¹³ Ulasaluula nchinda aboya, alimwi ulazibeleka anguzu zyamaboko aakwe. ¹⁴ Ulimbuli maato abasambazi; uleeta chakulya chakwe kuzwa kule. ¹⁵ Ulanyampuka nikuba mansiku akupachakulya kumulumaakwe alimwi ulaboniya milimu kubalanda bakwe bachanakazi. ¹⁶ Ulayeeya muunda akuwula; amuchelo wamaboko aakwe ulabyala masaansa. ¹⁷ Ulalizwaatila nguzu akuchita maboko aakwe asime. ¹⁸ Ulabona zimuchitila mpindu mbotu, boonse busiku bulamfu lampi lyakwe talizimi. ¹⁹ Ulabika kuboko kwakwe kumusako, alimwi ulalujata luchinda lwakoosa. ²⁰ Ulatambika kuboko kwakwe kubantu bachete; ulasikila akuboko kwakwe kubantu bafwaba. ²¹ Tayoowi mpeyo kunganda yakwe, nkaambo nganda yakwe yoonse isamide zizwaato sisalala. ²² Ulachita zyakuvumba bulo bwakwe, alimwi ulazwaata zyamweemvwe. ²³ Mulumi wakwe ulizibinkene aamulyango, eelyo nakala abazululi banyika. ²⁴ Ulachita zisamo zyeebeka akuzyuuzya, alimwi kubasambazi ulapa inkumba. ²⁵ Ulisamikidwe manguzu aabulemu, alimwi ulaseka kuzyiindi ziza. ²⁶ Ulajula mulomo wakwe abusongo alimwi mulawu waluzyalo ulaalulimi lwakwe. ²⁷ Ulalangilizya nzila zyabenganda yakwe akutalya chinkwa chabutolo. ²⁸ Bana bakwe balanyampuka akumwiita kuti ulilongezegedwe, alimwi mulumaakwe ulamutembawula, nkati ²⁹ ''Banakazi biingi bakachita zibotu, pesi ulabiinda boonse,'' ³⁰ Kubotezya kuleena, kubota nkwabiyo, pesi mwanakazi uuyowa Jehova, uyotembawulwa . ³¹ Mumupe michelo yamaboko aakwe alimwi milimu yakwe ikatembawulwe mumilyango yakwe.