¹ Eeli ndejwi lya Jehova lyakasika kuli Jowelu mwana mulombe wa Petuwelu. ² Mumvwe eechi, nywebo nobapati, alimwi amuswiilizye, moonse nywebo nimukkala munyika eeli. Kuli chiliboobu na chakali chachitika na mumazuba anu na kumazuba a abamawuso? ³ Amwaambile bana banu aatala anchicho, alimwi bana banu baambile bana babo, a bana babo izyalane liza. ⁴ Eecho chakasiigwa a chisozi, chisozi chipati chakalya; eezyo zyakasiigwa a chisozi chipati, mpasu yakalya; alimwi chakasyaala kumpasu, chivwinyu chakalya. ⁵ Amubuke, nywebo nobachankolwa, alimwi mulile! Amoompolole, moonse nobanywi ba wayini, nkaambo wayini munono wagwisigwa kulindinywe. ⁶ Nkaambo chisi chasika aatala anyika yangu, basimide alimwi batabaliki. Meno aakwe meno a mulavu, alimwi uli aameno a mulavu muzyazi. ⁷ Wachita lubuwa lwa masansa aangu kuba busena bwatongo alimwi mukuyu tuchikwe chintu. Wakakwampa makwa aawo akwasowa; intabi zilatuba bu. ⁸ Woomoka mbuli nakalindu uuzwete masaka nkaambo kalufu lwa sibwinga wakwe muniini. ⁹ Chituzyo chazilyo a chituzyo chakunywa zyakagwisigwa kuzwa mung'anda ya Jehova. Bapayizi, balanda ba Jehova, amulile. ¹⁰ Myuunda yaba matongo; nyika yalila nkaambo zilyo zyanyonyooka. Wayini mupya wayuminina; mafuta taachiwo pe. ¹¹ Amuuse nsoni, nywebo nobalimi, alimwi moompolole, nywebo nimubyala, nkaambo ka bulotwe a bbali. Nkaambo butebuzi bwamumyuunda bwamana. ¹² Misaansa yapusama, alimwi mikuyu yayuma; mi pomegilenati, a mikunka, a mimbula - amisamu yoonse yamumuunda yapusama. Nkaambo lukondo lwapusama kuzwa kumukowa wabantu aaba. ¹³ Amuzwaate masaka alimwi mulile, nywebo nobapayizi! Amoompolole, nywebo nobalanda ba chipayililo. Musike, mukalale busiku boonse mumasaka, nywebo nobalanda ba Leza wangu. Nkaambo chituuzyo chazilyo a chituuzyo chakunywa zyakalesegwa kuzwa kung'anda ya Leza wanu. ¹⁴ Amwiitilile kulyiimya kusalala, alimwi akuswaanana kusalala. Mukabunganie basilutwe abakkali benyika ku ng'anda ya Jehova Leza wanu, alimwi mukalile kuli Jehova. ¹⁵ Maawe kubuzuba! Nkaambo buzuba bwa Jehova bwaamba kusika. Buyooza alunyonyooko kuzwa kuli Singuzuzyoonse. ¹⁶ Sa teensi chakulya chakasigwa na kumenso eesu, alimwi lukondo akubotelwa kuzwa kung'anda ya Leza wesu? ¹⁷ Inseke zilabola munsi lyamaganga aazyo, zitula zyakasiigwa a matala akanyonyoonwa, nkaambo zilyo zyakayuma. ¹⁸ Mbuli ng'ombe mbuzitongela! Matanga aabo ayobweenda mukubulikilwa nkaambo taakwe machezezyo. Nikuba matanga aambelele alikoomba. ¹⁹ Jehova, ndalila kulinduwe. Nkaambo mulilo wakatenta machezezyo woonse amulusaka, alimwi mabangabanga akatenta yoonse misamu yamumyuunda. ²⁰ Nikuba banyama bamusokwe balilila nduwe, nkaambo maanzi amutulonga akayuminina, alimwi mulilo wakatenta machezezyo amulusaka.