¹ Amulizye mweembo mu Ziyoni, alimwi amuume mubila a chilundu changu chisalala! Bantu boonse bamunyika ngabakankame mukuyowa, nkaambo buzuba bwa Jehova bwasika; nchoonzyo, buli afwifwi. ² Mubuzuba bwamudima akusiya, mubuzuba bwa mayoba amakumbi aasiya mbi. Mbuli gonta lizuzizye chilundu, impi mpati iili amanguzu iyoobuza. Takwe nikwakali kwaba mpi ili mbuli njiyo, alimwi takwe niyooba pe limbi, nikuba musule la mazyalane miingi. ³ Mulilo ulikutenta zyoonse kunembo lyayo, alimwi musule lyayo mabangabanga ali kutenta. Nyika yaba mbuli muunda wa Ideni kunembo lyayo, pesi musule lyayo kuli nkanda yakanyonyoonwa. Nchobeni, takwe chiyoonzwenga kuzwa kulinjiyo. ⁴ Impi yakaboneka mbuli mabbiza, alimwi balachijaana mbuli ba simabbiza. ⁵ Balasotoka amuzuzuzmo mbuli oowo wankalaki aajulu azilundu, mbuli muzuzuzmo wa mabangabanga aamulilo aayo aatenta misunta, mbuli mpi yamanguzu ilibambilinde kulwana. ⁶ Mubuliwo bwabo bantu balimukulila alimwi masyu aabo boonse aliwuside. ⁷ Balachijaana mbuli basikulwana banguzu; balatanta malambo mbuli basilumamba; baleenda, woonse mukululama, alimwi tabatyoli milongo yabo pe. ⁸ Kakutakwe naba womwe uutontela umwi kumbali; baleenda, umwi awumwi munzila yakwe; baliinda mukulwisya alimwi tabawidi anze kwa muzila. ⁹ Baafwambaana muchisi, balachijaana abulambo, balatanta mumaanda, alimwi baliinda muzimpulunguzyo mbuli babbi. ¹⁰ Nyika ilazungana kunembo lyabo, majulu alakankama, izuba a mweezi zilasizigwa, anyenyeezi zilaleka kumweka. ¹¹ Jehova wanyampula ijwi lyakwe unembo lya mpi yakwe, nkaambo basinkondo bakwe bavula; nkaambo balisimide, aabo babweza malayilile aakwe. Nkaambo buzuba bwa Jehova mbupati alimwi bulayoosya. Ngwani uunga ulafutuka? ¹² ''Pesi nikuba lino,'' mbwaamba Jehova, ''Amuboole kulindime amoyo wanu woonse. Mulyiimye, mulile, alimwi musintikile.'' ¹³ Mudelule myoyo yanu kutensi zikobela zyanu luzutu, alimwi muboole uli Jehova Leza wanu. Nkaambo uli aluse a luzyalo, tafwambanai kunyema alimwi kazwide buuya buli aluyando lwiingi, alimwi ulalilesya kukubapa chisubulo. ¹⁴ Ngwani uuzi? Kujana waboola na akuba aluzyalo, akusiya chilongezyo musule lyakwe, chipo chakunywa a chipo chazilyo cha Jehova Leza wanu? ¹⁵ Amulizye mweembo mu Ziyoni, mwiitilile kulyiimya kusalala, alimwi mwiite mbungano iisalala. ¹⁶ Mubunganie bantu; mwiite mbungano iisalala. Amubunganie bazululi; mubunganie bana abanikenike. Basibwiinga ngabazwe mumaanda aabo, abanabwiinga bazwe muzikalilo zyabo. ¹⁷ Bapayizi, balanda ba Jehova, ngabalile aakati kamanjililo a chipayililo. Ngabaambe kuti, ''Lekelela bantu bako, Jehova, alimwi mutachiti lukono lwanu kuchintu chansesya, kuti zisi zikabasampawule. Nkaambonzinibatakaambe aakati kamanyika kuti, 'Nguli Leza wabo?''' ¹⁸ Mpawo Jehova wakasungwaalila nyika yakwe alimwi wakaba aluzyalo aabantu bakwe. ¹⁹ Jehova wakasandula bantu bakwe, ''Amubone, ndiyomutumizya zilyo, wayini mupya, a mafuta. Muyokutisikana anzizyo, alimwi nsichiyomuchiti chisesemyo aakati kamaasi. ²⁰ Ndiyogwisya basikumulwana bakunyika kule andinywe, alimwi ndiyobatandila munyika njumu alimwi yakasiigwa. Basinembo ba mpi yabo bayooya mulwizi lwa kujwe, abali musule bayooya mulwizi lwa kumbo. Bweema bwayo buyoonyampuka, alimwi chigunsu chayo chiyoonyampuka.'' Nchobeni, wachita zintu zipati. ²¹ Utayowi, nyika; sekelela a kukondwa, nkaambo Jehova uyookuchitila zintu zipati. ²² Mutayowi, nobanyama bamusokwe! Nkaambo machelelo amusokwe ayoosyuka, misamu iyoozyalamichelo, mikuyu a misaansa iyochita butebuzi bwayo buzwide. ²³ Amusekelele, nobantu ba Ziyoni, alimwi mubotelwe muli Jehova Leza wanu. NKaambo uyomupa mvula ntulukwa muchiindi cheelede akumweetela lunywanywa, mvula ntulukwa ayamusule mbuli chiindi chiinda. ²⁴ Mbuwa zyakupolela ziyozula bulotwe, aziyobwedo ziyofwasuuka a wayini mupya a mafuta. ²⁵ ''Ndiyomubozezya minyaka yazilyo zyakalyigwa a chisozi - chisozi chipati, nswabanda, a chamusokonya - impi yangu yanguzu njindakatuma aakati kanu. ²⁶ Muyolya zyiingi alimwi muyookuta, alimwi muyolumbayizya zina lya Jehova Leza wanu, ooyo wachita zigambyo aakati kanu, alimwi nsikoyoyeta limbi kuusa abantu bangu. ²⁷ Muyoziba kuti ndili aakati ka Izilayeli, alimwi kuti ndime Jehova Leza wanu, akuti takwe umbi pe, mpawo nsikoyoyeta kuusa abantu bangu. ²⁸ Kuyoochitika musule lya zeezi kuti ndiyotila Muuya wangu aanyama yoonse, alimwi bana benu balombe a bana benu basimbi bayosinsima. Manene banu bayoolota ziloto; baalumi banu baniini bayobona zilengano. ²⁹ Alubo ndiyotila Muuya wangu kubalanda a kubalanda banakazi. ³⁰ Ndiyootondeezya zigambyo kujulu aanyika, bulowa, mulilo, a misumpuululu yabusi. ³¹ Izuba liyooba mudima amweezi uyooba bulowa, buzuba bupati buyoosya bwa Jehova nkabutanaasika. ³² Kuyooba kuti woonse wiita muzina lya Jehova uyoofutulwa. Nkaambo a Chilundu cha Ziyoni a mu Jelusalema kuyooba aabo batakanzwensegwe, mbuli mbakaamba, alimwi aakati basikufutuka kuli baabo Jehova mbatakiite.