¹ Nkamboonzi zyiindi zyakubeteka bantu basizibi nizitabikidwe asinguzu? Nkamboonzi abo basyomeka kuli Leza nibatakonzyi kubona mazuba akwe akusika kwakubetekwa? ² Kulibantu basizibi abo bagwisya impa zyamigaano; kuli bantu basizibi abo batola nutanga achakwaangila alimwi balabubika mumachelelo aabo beni. ³ Balabinga madonki ababo batakwe bamawisi; balabweza basune babamukabafu mbuli balindizi. ⁴ Balaangila bantu babulide kuzwa munzila yabo; bantu bafwaba baanyika boonse balaliyubika kuzwa kuli mbabo. ⁵ Bona, aba bantu bafwaba balayinka kumilimu yabo beni mbuli madonki amusokwe munkanda, kabalanguula chakulya chaku chenjela; chimwi chindi ba Alabbu bakabape chakulya kubana babo. ⁶ Bantu bafwaba balatebula mumansiku munkuba zyabamwi bantu; balachela misansa kuzwa kubutebuzi bwabaabo bantu basizibi. ⁷ Balalala chinswe mansiku woonse nkabatakwe zisamo; tabakwe zyakulivumba kumpeyo. ⁸ Balinabide atuvula twamuzilundu; balalala kufwafwi kumabwe mapati nkambo tabakwe maanda. ⁹ Kuli bantu basizibi aabo balagwisya bamuchaala kuzwa kunkolo zyabamanyina, alimwi bantu basizibi abo balatola bana mbuli balindizi kuzwa kubantu bafwaba. ¹⁰ Pesi bantu bafwaba balendeenda nkabali chinswe nkabatazweete nekuba beenda anzala, bala bweza misunta yazilyo zyabamwi bantu. ¹¹ Bantu bafwaba balachita mafuta akkati kama olifa aababo basizibi; baladina wayini yabasizibi, pesi beni bayofwa anyota. ¹² Kuzwa mumadolopo bafwa balatongela, alimwi myuuya yabayaswa ilakwilila lugwasyo. Pesi Leza taipenzyi kububi. ¹³ Bamwi babaaba bantu basizibi balapapila kumumuni; tabazi inzila zyawo, nunka kukkala munzila zyawo. ¹⁴ Sikujaya ulabuka nkabutana kucha alimwi ulajaya bafwaba ababulide bantu; mumansiku ulimbuli mubbi. ¹⁵ Alubo, linso lyasimamambi lilalindila kabbundibundi; ulati, 'Takwe linso litakandibone.'Ulavumba busyu bwakwe. ¹⁶ Mumudima bantu basizibi balasya mumaanda; pesi balayuba muzyiidi zyamasikati; nkambo tabayandi mumuni. ¹⁷ Nkambo bonse akkati kabo, mudima usiya mbii ulimbuli mafumina; nkambo mbazolwani aziyoosyo zyamumudima usiya. ¹⁸ Balakukulwa, nekuba boobo, mbuli fulu lyamanzi; chimpanzi chanyika yabo chilitukidwe; takwe naba omwe uya kumisansa yakwe kukubeleka. ¹⁹ Mbuli bbalangwe aachikkasalizi mbuziyeemusya sikunkwe kuba maanzi, aboobo tubanda tulatola abo bakabisya. ²⁰ Izyalilo elyo lyakamuzyala liyomuluba; isenda liyomulya chakunonelwa kulinguwe; takoyoyeyegwa limbi; muleyinzila, basizibi bayotyolwa mbuli musamu. ²¹ Sizibi ujaya mukayintu oyo utazyede bana; wachita bubi kuli mukamufu. ²² Nekubaboobo Leza ulatanda bantu basinguzu anguzu zyakwe; ulanyampuka alimwi tabayumyi mubuumi. ²³ Leza ngabachita kuti bayeye anga bali kwabilidwe, alimwi bali boteledwe atala ababo, pesi menso akwe ali atala lyanzila zyabo. ²⁴ Aba bantu balisumpukide; pesi, mukayindi kanini, bayoofwa. Ninchobeni, bayoyetwa ansi; bayobunganisigwa mbuli boonse bamwi; bayogwisigwa mbuli ngala. ²⁵ Na tembukubede, ngwani ukonzya kundamba mubeji; ngwani uunga ulachita majwi angu abe abuyo?''