¹ Lino Jefuta mu Giliyadi kali silumamba sintaanze, pesi kali mwana mulombe wamwanakazi simamambe. Giliyadi kali ngowisi. ² Mwanakazi wa Giliyadi alakwe wakazyala mwana kulibamwi bana bakwe balombe kuchiindi bana bamukayintu nibakakomena, bakatanda Jefuta kuti asiye ng'anda alimwi bakati kulinguwe, ''Iwebo tokoyooba achaabilo pe chalukono mumpuli yataatesu. Uulimwana wamwanakazi uumbi.'' ³ Aboobo Jefuta wakachija kuzwa kubakulana bakwe alimwi wakakukkala munyika ya Tobbu, mpawo baalumi babuyo bakabunganina Jefuta akuyobwenzyania anguwe. ⁴ Nikwakiinda mazuba, bantu ba-Amoni bakabusya inkondo aatala aba-Izilayeli. ⁵ Kuchindi bantu ba-Amoni bakiinka kuyogwisya ba-Izilayeli, bapati ba-Giliyadi bakiinka kuyogwisya Jefuta munyika ya-Tobbu. ⁶ Bakaambila Jefuta kuti, ''Kweza mpawo ube musololi wesu kuti tulwisye bantu ba-Amoni. ⁷ Jefuta wakambila basololi baku Giliyadi kuti, ''Wakandisula akundikakatizya kusiya ng'anda yataata. Nkamboonzi niwasika kulindime chiindi echino nolimupenzi?'' ⁸ Bapati baku-Giliyadi bakaambila Jefuta kuti, ''Nkiinkako nchitwaabola kulinduwe lino; kuza andiswe mpawo tukalwisye bantu ba-Amoni, alimwi uyooba musololi waboonse bakkala mu-Giliyadi.'' ⁹ Jefuta wakati kubapati ba-Giliyadi, ''Naa mwandiboozya lubo kumunzi kuyolwisya ba-Amoni abantu ba Amoni, mpawo na Jehova watupa kuzunda kulimbabo, ndiyoba musololi wanu.'' ¹⁰ Bapati ba-Giliyadi bakati kuli Jfuta, ''Ndalomba Jehova abe kamboni aakati kesu kuti tetwalichita mbuli mbutwaamba!'' ¹¹ Aboobo Jefuta wakeenda abapati ba-Giliyadi, mpawo bantu bakamuchita musololi alimwi amubetesi wabo. Chiindi naakali kunebo lya Jehova mu-Mizipa, Jefuta wakiindulula zyoonse zisyomezyo nzyakachitide. ¹² Mpawo Jefuta wakatuma batumwa kumwami wabantu ba-Amoni, wakati, ''Njaanzi eeyi inkondo ilakkati kesu? Nkaambonzi niwasika changuzu kuzobweza nyika yesu?'' ¹³ Mwami wabantu ba Amoni wakasandula batumwa ba-Jefuta, ''Nkambo chiindi Izilayeli niyakazwa munyika ya-Ijiputi, bakabweza nyika yesu kuzwa kuba Alinoni kusikila ku-Jabboki, kusika ku Jodano. Lino muziboozye nyika ezyo muluumuno.'' ¹⁴ Alubo Jefuta wakatuma batumwa kumwami wabantu ba-Amoni, ¹⁵ alimwi wakaamba kuti, ''Mbuboobu mbwawamba Jefuta: Izilayeli tibwezede nyika ya Mohabbu anyikwa yabantu ba-Amoni, ¹⁶ pesi bakasika kuzwa ku Ijipita, mpawo Izilayeli yakiinda munkanda kumulonga walwizi lwamataata akuyosika ku-Kkadesyi. ¹⁷ Izilayeli niyakatuma batumwa kumwami wa-Edomu, bakati, 'Weenche atwiinde munyika yanu; mwami wa-Edomu takaswilizya pe. Bakatuma alubo batumwa kumwami wa-Mohabbu, pesi wakakaaka. Aboobo Izilayeli yakakkala mu Kkadesyi. ¹⁸ Eelyo bakiinda munkanda akuzwa munyika ya Edomu aanyika ya-Mohabbu, alimwi bakeenda kutobelezya kusika kubbazu lyakujwe lyanyika ya Mohabbu akuyaka zilawo zyabo kumbali lya-Alimoni. Pesi tebakanjila muchisi cha-Mohabbu, nkambo Alimoni ngomugaano wa Mohabbu. ¹⁹ Izilayeli yakatuma batumwa ku-Sihoni, mwami waba Amoni, ooyo wakeendelezya mu Hezibboni; Izilayeli wakati kulinguwe, 'Weenche, atwiinde akkati kanyika yenu kuyosika kunyika yesu.' ²⁰ Pesi Sihoni teyakasyoma Izilayeli kuti iyinde akkati kachisi chabo. Aboobo Sihoni yakabungania basilumamba bakwe boonse aamwi alimwi bakeenda ku-Jahazi, mpawo ooko wakalwisyania aba-Izilayeli. ²¹ Mpawo Jehova, Leza wa-Izilayeli, wakapa Sihoni abantu bakwe boonse mumaanza aaba Izilayeli akubazunda. ²² Aboobo Izilayeli yakabweza yoonse inyika yaba Amoni bakakkede muchisi chaba-Amoni, kuzwa ku-Alinoni kusikila ku-Jodani. ²³ Aboobo Jehova, Leza wa-Izilayeli, wakatanda ba-Amoni kubusyu bwabantu ba-Izilayeli, alimwi kwalino mukonzya kuvuba nyika yabo? ²⁴ Sena tamukoyobweza nyika ya-Chemosyi, Leza wanu, njaamupa? Aboobo kufumbwa nyika Jehova Leza wesu njaakatupa, tuyoyibweza. ²⁵ Sena lino inywebo mwabota loko kwinda Bbalakki mwana mulombe wa Zipoli, mwami wa-Mohabbu? Sena wakabusya nkazyano aaba-Izilayeli? Sena wakabalwisya? ²⁶ Kakuli kuti ba Izilayeli nibakakkede kwamyaaka mwaanda yotatwe mu-Hezibboni alimwi amumagunzi, mpawo mu Aloyeli amagunzi aayo, alimwi yoonse myuunzi itobelezya nkomwe zyamilonga ya-Alinoni-nkamboonzi eelyo niwakatababweza kubajosya kuchiindi echo? ²⁷ Tendakachita bubi kuli nduwe, pesi wandichitila bubi mebo akundilwisya. Jehova, mubetesi, wasaluuzya sunu aakati kabantu ba-Izilayeli abantu ba-Amoni.'' ²⁸ Pesi mwami wabantu ba-Amoni bakakkaka kuchenjezegwa Jefuta nkwakabatumina. ²⁹ Mpawo muuya wa Jehova wakasika aali Jefuta, mpawo wakiinda akkati ka-Giliyadi a Manase, alimwi aakuzwa ku-Mizipa ku Giliyadi wakiinda akkati kabantu ba-Amoni. ³⁰ Jefuta wakachita chikonke kuli Jehova alimwi wakati, ''Naa wandipa luzundo kubantu ba-Amoni, ³¹ eelyo kufumbwa chizwa aanze kumakkoma ang'anda yangu kuyondiswania chiindi nindijoka muluumuno kuzwa kubantu ba-Amoni bayooba ba-Jehova, mpawo ndiyoba mbuli chipayizyo chakuumpa.'' ³² Aboobo Jefuta wakayinda akkati kusika kubantu ba-Amoni kuyobalwisya, alimwi Jehova wakamupa luzundo. ³³ Wakabalwisya akuchitya kujaya kupati kuzwa ku-Aloli kusikila ku-Miniti, myuunzi ili makkumi obile-akuyosika ku-Abbelu Kkelani. Aboobo bantu ba-Amoni bakabikwa aansi abuzuluzi bwabantu ba-Aizlayeli. ³⁴ Jefuta wakasika kumuunzi wakwe ku-Mizipa, mpawo ooko mwana musimbi wakwe wakasika waswanana anguwe kazaabuuma nsaka akuzyana. Wakali mwana wakwe musimbi uumwi biyo, mpawo kutaamba nguwe takalamwana mulombe pe naa musimbi. ³⁵ Mbwakamubona biyo, wakadeluula zyakusama zyakwe akwaamba kuti, ''Maawe! Mwanangu musimbi! Wandeetela mapenzi, mpawo nduwe wakaba umwi wakachitya machise mulindime! Nkambo ndasamununa mulomo wangu kuli-Jehova, alimwi tandikonzyi kujosya musule zisyomezyo zyangu.'' ³⁶ Wakamwambila kuti, ''Taata wangu, wachita chikonke kuli Jehova, ndichitile zyoonse nziwakandisyomezya, nkambo Jehova waka kubwedezezya aatala abasinkondonyokwe, ba-Amoni.'' ³⁷ Wakaamba kuti kuli wisi, ''Lekela chisyomezyo eechi kuti undibambile. Ndisiye mebo andikke kwamyeezi yobile, kuti ndikeende akukunukila kutulundu akukwilila bunakalindu bwangu, Lwangu abenzuuma.'' ³⁸ Wakamwambila kuti, ''Koya.'' Wakamutuma kwamyeezi yobile. Wakamusiya, lwakwe abenzinyina, mpawo bakalilila bunakalindu bwakwe mutulundu. ³⁹ Wakachita mbuli chisyomezyo chachikonke nchaakachita. Lino taakwe nakali waswanana amwalumi, mpawo chakaba chiyanza mu Izilayeli ⁴⁰ kuti ibana basimbi ba-Izilayeli myaaka yoonse kwamazuba aane, bayoyibuluka lwaano lwamwana musimbi wa-Jefuta ku Giliyadi.