¹ Ndakali bambilide mukuyanduulwa abaabo batakwe nibakali kubuzya pe; Ndakali bambilide mukujanwa abaabo bakata ndiyanduula. Ndakamba kuti, 'Mebo Ndilaano!'Mebo Ndilaano!' kuchisi echo chakatitide zina lyangu. ² Ndakayala maanza angu zuba lyoonse kubantu batamvwide pe, abo bendela munzila eyo italikabotu pe, aabo bakeenda kuzwa mumiyeeyo amabambe aabo! ³ Bolwabo mbantu bakkala kabandibisizya, bapeda zipayizyo muzilili, alimwi akutenta tununkilizyo atala lyazitina. ⁴ Bakkala akati katubanda kabalinda busiku boonse, alimwi akulya nyama yangulube antomwe anyama isofwede mumbede zyabo. ⁵ Baamba kut, 'Mwinkilile oko, mutasiki afwifwi kuli ndime, nkambo ndilasalalisya kwinda ndinywe.'zintu ezi mbusi mumpemo zyangu, mulilo uuyaka zuba lyonse. ⁶ Langa, kulilembedwe kunembo lyangu: Nsikoyowumuna pe, nkambo Ndiyobaliya; ndiyobaliya lubo kunembo lyabo, ⁷ akambo kezibi zyabo azibi zyabamawisi babo antomwe, ''Mbwawamba Jehova. Njobaliya nkambo kakutentela tununkilizyo aatala amalundu akundinyansya atulundu. Ndiyoyela zichito zyabo zyakale kunembo lyabo.'' ⁸ Obu mbombubo mbwawamba Jehova, ''Mbuli kuti muswnswi wajanika munkanyina yamasansa, umwi nawamba kuti, 'Utachinyonyooni, nkambo muli chibotu mukati kecho,'eechi nchicho nchindiyochitila balanda bangu: Nsikoyo banyonyoona boonse. ⁹ Njoyeta lunyungu luzwa kuli Jakobo, alimwi akuzwa muli Juda abo bayovuba zilundu zyangu. Nobasale bangu muyovuba nyika, alimwi balanda bangu bayokkala mumo. ¹⁰ Syeloni uyoba machezezyo amatanga, alimwi musena wako mbusena bwakulyokezezya kwabutanga, nkambo kabantu bangu bandiyanduula. ¹¹ Pesi webo nukaka Jehova, waluba chilundu changu chisalala, oyo ubambilila ntafula yachoolwe, alimwi uzuzya nkomeki yawayini uswanizigilwe awayini ya Bukkalo. ¹² Ndiyokubikkila panga, alimwi moonse muyokotamina sikujaya, nkambo nindakayita, tewakandisandula pe; nindakaambula, tewakaswilila pe. Pesi wakachita chibi kunembo lyangu akusala kwiita echo chisesemya ndime.'' ¹³ Mbuboobu Mwami Jehova mbwawamba, ''Langa, balanda bangu bayolya, pesi muyoba enzala; langa balanda bangu bayonywa, pesi muyoba anyota; langa, balanda bangu bayokondwa, pesi muyobikwa mumawuse. ¹⁴ Langa, balanda bangu bayowompolola chaluyando nkambo kabubotu bwamoyo, pesi muyolila nkambo kamachise amoyo, alimwi bayowongelwa nkambo kakuuma kwamuya. ¹⁵ Uyosiya musule izina lyako mbuli lutuko kubasale bangu kukwambula; Mebo, mwami Jehova, uyokujaya; Njobayita balanda bangu azina limbi. ¹⁶ Kufumbwa uyowambilizya zilongezyo aano anyika uyolongezegwa andime, Leza wanchoonzyo. Kufumbwa uyobweza chikonke ansi ano uyosamikwa andime, Leza wakasimpe, nkambo mapenzi akiinda ayolubigwa, nkambo zinosisidwe kumenso aangu. ¹⁷ Nkambo ngamubone, Mebo ndamba kulenga julu pya anyika mpya; azintu zyachiindi taziyoyeyegwi limbi nanak kuzibikila mumizezo. ¹⁸ Pesi muyokondwa akubotelwa kwalyonse kulizezyo nzindiyakuyolenga, Bona, Ndaamba kuyolenga Jelusalemu mbuli lukondo, alimwi bantu bakwe mbuli kuyoyelwa. ¹⁹ Ndiyokondelwa ku Jelusalemu akubotelwa akubantu bangu; kowoomoka akukwila kwakutakkalinkana takukoyomvwika limbi kulinguwe. ²⁰ Takukoyoba alimbi mwana muniini uyopona mazuba mache, naaba mwalumi mupati uyofwa chindi chakwe kachitanasika. Umwi ufwida kumyaanda yamyaaka uyolumbulwa amwana muniini. Kufumbwa umwi utakabule kuyosisya myaaka ili mwanda yakupona ngunoli wambwa kuti ulitukidwe. ²¹ Bayoyaka manda akukkala mulingawo, alimwi bayobyala minsamu yamasansa akwilya michelo yayo. ²² Takuchikwe limbi nibachiyoyaka maanda akuyokkala mulingawo, tabachiyobyali, alimwi akuyolya limbi, mbuli kumazuba aminsamu ayoba mazuba abantu bangu. Basale bangu bayoponena kumilimu yamanza aabo. ²³ Tabakoyobeleka chabuyo, naa kuyochita chabuyo. Nkaambo mbana babaabo balongezezegwe a Jehova, alimwi alunyungu kabalaamwi. ²⁴ Kabatanayita, Njobavwiila, alimwi kayindi kaniini kabachaambuula; Ndiyomvwa. ²⁵ Mwaaba amwana wambeele ziyochela aamwi, alimwi mulavu uyolya sokwe mbuli musune; pesi lusuko ndoluyoba chakulya chanzoka. Takuyobi limbi chichisa nanka kumwayisigwa atala achilundu chisalala,'' mbwaamba Jehova.