¹ Ngwani ooyu uzwa ku Edomi, uzweete majansi asalala kuli Bbozila? Ngwani oyu, usamide zisamo zyabo zyebesi, zyendelana mumanguzu aakwe? ''Ndendime, ningwambula mubululami, mupati ugwasya.'' ² Nkambonzi zisamo zyako nizisalala, alimwi nkamboonzi nalangika mbuli chikandilo chamisansa? ³ ''Ndakalyatuuka misansa achikkandilo chayo achilikke, alimwi takwepe naba umwi wamuzisi wakaba andime. Ndakabalyata changuzu mukunyema kwangu akweenda mulinchicho amukunyema loko. Mabata-mabata abulowa bwabo akazula azisamo zyangu akudyabila kwakazula azisamo zyangu zyoonse. ⁴ Elyo ndakalangilila lyakunembo kuzuba lyakubwedezya, akumunyaka wakunununwa wakasika. ⁵ Ndakalanga, alimwi takwe naba omwe wakandigwasya. Ndakagamba kuti takwepe umbi sikundigwasya, pesi kuboko kwangu kwaketa lufutuko kulindime, bukali bwangu bwakanditola kunembo. ⁶ Ndakalyatawuka bantu ansi mukunyema kwangu akubachita kuti bakolwe mubukali bwangu, alimwi ndakatila bulowa bwabo anyika.''' ⁷ Njomwambila nchito zya Jehova achizuminano chakusyomekana, amilimo ya Jehova itembawulika. Njomwambila zyoonse Jehova nzyakatuchitila, bululami abubotu kung'anda ya Izilayeli. Buuya bwakwe wakabutondezya kulindiswe nkambo kaluzyalo lwakwe, anchito nyiingi kuchizuminano chakusyomekana. ⁸ Nkambo wakati, ''Nchobeni mbantu bangu, bana balibombya.'' Wakaba mufutuli wabo. ⁹ Mumapenzi aabo woonse, wakapengana alakwe, abangelo kuzwa mubuliwo bwakwe wakabafutula. Muluyando lwakwe amuluzyalo wakabafutula, akubasumpula akubabweza lwabo wakababweza muzyindi zyabo boonse zyakale. ¹⁰ Pesi bakapapila akunyemya muuya Uusalala. Elyo wakaba sinkondonyina akubalwisya mwini. ¹¹ Bantu bakwe bakayeeya aatala azyindi zyakale zya Mozesi. Bakaamba kuti, ''Ulikuli Leza, ooyo wakababoozya kuzwa kulwizi beembeli abutanga? Ulikuli Leza, oyo wakabikka muuya wakwe Uusalala mukati kabo? ¹² Ulikuli Leza, oyop wakanza bulemu bwakwe busalalisya wakeenda akuboko kwalulyo lwa Mozesi, akwandania maanzi kuli mbabo, akuchita kufumbwa chitamani muzina lyakwe? ¹³ Ulikuli Leza, oyo wakabazulwida akati kamaanzi malamfu? Mbuli bbiza lichijana anyika kutakwe chintu, alimwi tibakali gubbula pe. ¹⁴ Mbubhonya mbuli ng'ombe ziya mukkuti, muuya wa Jehova wakabapa kulyokezya. Mbuboobo mbwakazulwida bantu bako, kuti ulichitile zina lilumbayizigwa. ¹⁵ Langa ansi akujulu ulangisisye kuzwa kubusena bwako busalala abulemu. Buli kuli busungu bwako anguzu zyako mpati? Mapenzi anu aluzyalo anchito zilibambidwe kulindiswe. ¹⁶ Nkambo nduwe taata wesu, mbunga Abbulahamu tatuzi pe, a Izilayeli tatuyeyi pe, iwe, Jehova, nduwe taata wesu. 'Mumuni wesu'nizina lyako kuzyindi zyakale. ¹⁷ Jehova, nkambonzi notulesya kuzwa munzila zyako akuyumya myoyo yesu, kuti tatukulemeki? Boola nkambo kabalalanda bako, kuzogwasya misyobo yabavubidwe. ¹⁸ Bantu bako bakavuba busena busalala mukayindi kanini, pesi basinkondonyina bakabalyatawuka. ¹⁹ Twaba mbuli abo batana kwendelezegwa, mbuli aabo batana bunsi bitwa muzina lyako.''