¹ Amubone, Mwami Jehova wamakamu waamba kugwisya kuzwa ku Jelusalemu akuzwa ku Juda lugwasyo abulelo: koonse kupa chibunge akoonse kupa manzi, ² muntu singuzu asikalumamba,mubetesi amusinsimi, ayooyo ulichita anga ngu Leza amupati, ³ silutwe wabali makumi musanu amuntu ulemekeeka ukkala muchisi, amwendelezi, ayooyo uchenjede mulizyakufula ayooyo ulaluzibo azyakulowa. ⁴ ''Ndabikka bachikula banini mbuli beendelezi babaabo, aboobo banini bayobendelezya. ⁵ Bantu bayopenzegwa, boonse kuli umwi akuli umwi, aboonse umwi kuli simayakilane wakwe; mwana uyofutukila mupati, alimwi balibombya bayozunda ulemekeka. ⁶ Mwaalumi uyojata mukulana wakwe mung'anda yawisi akwaamba kuti, 'Ulachikobela; katubeda mwendelezi, abaaba bacheede ubeleke babe mumaanza ako.' ⁷ Mulilelyo zuba uyowoompolola akuti, nsikoyooba musilisi pe; nsikwe zibunge pe nichiba chisamo. Tamukoyondichita muzuluzi wabantu pe.''' ⁸ Nkambo Jelusalemu wazingana, a Juda waawa, nkambo kwaambula kwabo anchito zyabo zilwisya Jehova, balakaka antangaanana kumenso akwe akubulemu bwakwe. ⁹ Kubalangala kumenso abo ngukamboni atala ambaabo; alimwi balaamba zibi zyabo mbuli Sodomu; tabachisisipe. Maawe kulimbabo! Nkambo balimaninsizya mulunyonyooko lupati lwabobeni. ¹⁰ Ngamwambile muntu ululeme kuti kuyobota, nkambo bayoolya michelo yanchito zyabo. ¹¹ Maawe kuli basizibi! Nkambo kuyomubijila, nkambo mpindu yamaanza akwe iyochitwa kuli nguwe. ¹² Bantu bangu - bapenzegwa abana, alimwi bendelezegwa abanakazi. Bantu bangu, aabo bamutondezya nzila balamweenzya chakumusweesya akumusweesya nzila yanu. ¹³ Jehova wanyampuka nkambo kakukazyania; ulinyampukide kuti ape bantu mulandu. ¹⁴ Jehova ulaza alubeta akulwanisya bapati babantu bakwe abeendelezi babo: ''mwakabisya muunda wamasansa; nzimwakanyanzya achanguzu bachete zili mumaanda aanu. ¹⁵ Nkaambonzi nimupwaya bantu bangu akuziya masyu abachete?''' Mbuboobu mbwawamba Jehova wamakamu. ¹⁶ Jehova waamba obu nkambo bana basimbi ba Ziyoni balisumpula, baleenda nsingo zyabo kazyiimvwi, amenso azwide luyando, baleenda antaamo niini nibaya bwinka, kabaya buchita tuzumo twanchooko mungo zyabo. ¹⁷ Aboobo Mwami uyobawumya zilonda mumitwe yabana basimbi ba Ziyoni, alimwi Jehova uyobavumvula meya zyabo. ¹⁸ Kuli elyo zuba Mwami uyogwisya bubotu bwanchoko zyakungo zyabo, atuntambo ntubalyaanga kumitwe, tukozyanio twamweezi twakulibotya munsingo, ¹⁹ malangulangu amumatwi, nchoko, akaputi; ²⁰ misini, amacheni anchoko, amafuta akulyetela zyoolwe. ²¹ Uyogwisya nweenwe achisita chamumpemo; ²² zikobela zibotezya, chisamo, kaputi, atukwama twamujanza; ²³ ziboniboni zyamujanza, malembo mabotu, zipandeeka, azyakulivumbya. ²⁴ Eelyo muchibaka chamyunde inunka kabotu kuyoba bubozi; amuchibaka chalukumba, kuyooba ntambo, muchibaka chamasusu abambidwe kabotu muyoba kankulu, achinowe; alimwi muchibaka chazisamo, bayolivumba masaka; muchibaka chabubotu bayoopya mbuli chisisi chamulilo. ²⁵ Baalumi bako bayowisigwa apanga, abaalumi balanguzu balowa munkondo. ²⁶ Milyango ya Jelusalemu iyolila akoomoka; alimwi uyoba alikke akukkala atala lyanyika.