¹ Bana balombe babasinsimi bakambila Elisha kuti, ''Busena mbotukkala antomwe anduwe bwacheya loko kulindiswe toonse. ² Twakumbila utuzumizye tuye ku Jodani, alimwi umwi awumwi mwalumi akateme ziyako nkuko, alimwi utuzumizye tukayake busena oko nkotuyokkala.'' Elisha wakasandula, Ámwinkilile kunembo.'' ³ Umwi wabo wakati, ''Ndakumbila mwinke abalanda benu.'' Elisha wakasandula, ''Ndilayinka.'' ⁴ Aboobo wakayinka ambabo, alimwi nibakasika ku Jodani, bakakutalika kugonka misamu yaziyako. ⁵ Pesi umwi nibakali kugonka, museke wakaleba waka kwikkukila mumaanzi; wakakwiila alimwi wakati, ''Ooh pepe, simalelo wangu, kali kakukkumbila biya!'' ^{6 7} Elyo muntu wa Leza wakati, Mpaali loko mpokinkilila ? Mwalumi wakatondezya Elisha busena. Mpawo wakatema kasamu, wasikukawalila mumaanzi, alimwi wakachita kuti museke wakaleba uyibuke. Elisha wakati, ''Kanune ubweze.'' Elyo mwalumi wakatandabika kuboko kwakwe alimwi wakakoobola wakanuna. ⁸ Lino mwami waba Alamu wakasokola inkondo kuba Izilayeli. Wakabuzya balanda bakwe, kuti, ''Chilawo changu chiyobeda kunyomfwi buli kunyomwii.'' ⁹ Elyo muntu wa Leza wakatuma kumwami wa Izilayeli, wakati, ''Uchenjelele kuti utakayindi kubusena obiya, nkambo ba Alamu bayobukunukila nkukokiya.'' ¹⁰ Mwami wa Izilayeli wakatumina mulumbe kubusena bwakali bwambiigwa amuntu wa Leza mbwakambide akupa nchenjezyo kulinguwe. Kutali lumwi kupela pe na tubili, muchiindi mwami nakiinka oko, zyakali zyaba zyakuyolibonena. ¹¹ Mwami wa Alamu wakakatazika akambo kanchenjeezyo, alimwi wakiita balanda bakwe alimwi wakati kulimbabo, ''Tamukondambila na kuti ngwani akati kesu ulikubbazu lyamwami wa Izilayeli?'' ¹² Elyo umwi wabalanda bakwe wakati, ''Pepe, mwami, simalelo wangu, nkambo Elisha musinsimi ukkede mu Izilayeli ngulokubuzya mwami wa Izilayeli majwi woonse ngowambula nimuba mung'anda yako yakoona. ¹³ Mwami wakasandula, ''Kamuya mukabone Elisha nkwakkala kuchitila kuti ntume bantu bakamujate.'' Nkabela wakambilwa, ''Bona, ulimu Dotani.'' ¹⁴ Mpawo mwami wakatumina mabbiza ku Dotani, nkalaki, antomwe aampi mpati. Bakasika mansiku alimwi bakazyunguluka chisi. ¹⁵ Muchindi mulanda wamuntu wa Leza nakabuka chifumo akuzwida anze, alange, wakabona impi mpati amabbiza ankalaki zyakazyungulukide chisi. Mulanda wakwe wakati kulinguwe, Ooh, simalelo! Mpo tulachita biyeni?'' ¹⁶ Elisha wakasandula, ''Utayowi, nkambo abo bali aswebo mbiingi kwinda aabo mbibali aabo.'' ¹⁷ Elisha wakakomba wakati, ''Jehova, ndakukomba kuti ujule menso akwe kuchitila kuti abone.'' Mpawo Jehova wakajula menso akwe, alimwi wakabona. Wakabona chilundu chakazwide mabbiza antomwe ankalaki zyamulilo kazizyungulukide Elisha. ¹⁸ Muchindi ba Alamu nibakakunukila kuli nguwe, Elisha wakakomba kuli Jehova alimwi wakati, ''Kobawuma aboofu bantu aba, ndakumbila.'' Elyo Jehova wakabawofwazika, mbubonya mbuli Elisha mbwakali wakumbila. ¹⁹ Mpawo Elisha wakambila ba Alamu, ''Eyi tensi njenjiyo pe nzila, nechiba chisi. Kamunditobela mebo, alimwi ndilamutola kumwalumi oyo ngomulokuyandula.'' Alimwi wakabatola ku Samaliya. ²⁰ Kwakaba kuti muchindi nibakasika mu Samaliya, Elisha wakati, jula menso abalumi abo kuti bakonzye kubona.'' Jehova wakajula menso abo alimwi bakabona, alimwi amubone, bakali baba akkati kachisi chaku Samaliya. ²¹ Mwami wa Izilayeli wakati kuli Elisha, kuchiindi nakababona, ''Ndeende wangu, mbajaye na? Mbajaye na?'' ²² Elisha wakasandula, ''Toyelede pe kubajaya. Nga ulajaya abo mbiwakabika mubuzike kale amuvwi wako abuta? Kobabikila biyo chinkwa amaanzi kunembo lyabo, kuti balye akunywa, alimwi biinke kuli simalelo wabo. ²³ Elyo mwami wakababambila chakulya chiingi, alimwi nibakalya akunywa, wakabaleka biinka, alimwi bakeenda babweda kuli simalelo wabo. Elyo impi zyaba Alamu tezyakakubola limbi pe kwachiindi chilamfu munyika ya Izilayeli. ²⁴ Musule azeezi Bbeni Hadadi mwami waku Alamu wakabungania iimpi zyakwe zyoonse akuyolwana aba Samaliya akuyobasinkilizya. ²⁵ Elyo kwakaba nzala mpati mu Samaliya. Amubone, bakachisinkilizya chisi mane lumwi mutwe wadonki wazosambalwa amakkumi aane ansiliva, alimwi chimpanzi chane chachipimino chamukotwe wanziba chakawuzigwa ansiliva musanu. ²⁶ Lino mwami wa Izilayeli nakali kwinda kumbali abulambo, mwanakazi wakamukkwilila, wakati, ''Ndigwasye, simalelo wangu, mwami.'' ²⁷ Wakati, ''Kuti Jehova takugwasizya webo, mbobuli mbwenga ndakugwasizya? Kuli chintu na chitazwe kuchipolelo na kuchidinino chawayini?'' ²⁸ Mwami wakinkilila kunembo, ''Ninzi chilokukupenzya webo?'' Wakasandula, ''Oyu mwanakazi wakandambila kuti, 'Peda mwanako mulombe kuti tulye sunu, alimwi tuzolya wangu mwana ijunza.''' ²⁹ Elyo twakajika wangu mwana alimwi twakalya, alimwi ndakamwambila kuti mubuzuba bwakatobela, ''Peda wako ayebo mwana mulombe kuti tulye nguwe, pesi wakali wakumusisa wakwe mwana.'' ³⁰ Mpawo mwami nakamvwa majwi amwanakazi oyu, wakadelula zizwaato zyakwe ( lino wakali kwinda kumbali lyabulambo ), alimwi bantu bakamulanga alimwi bakabona kuti wakali achizwato chesaka kunsi, amubili wakwe. ³¹ Mpawo wakati, ''Leza andichitile mbubonya, alimwi akwindilide, kuti mutwe wa Elisha mwana wa Safati usyale alinguwe sunu.'' ³² Pesi Elisha wakali kkede mung'anda yakwe, alimwi bazuluzi bakalikkede anguwe. Mwami wakatuma mwalumi kunembo lyakwe, pesi muchindi simweta twambo nakasika kuli Elisha, wakati kubazuluzi, ''Amubone oyu mwana mulombe wamujayi mbwaza kuzondigonka mutwe wangu? Amulange, muchindi simweta twambo natasike, mujale kkoma amulyango, musiminine. Sa musoso wamawulu a simalelo wakwe tulimvwisyi musule lyakwe?'' ³³ Nakachili kwambula ambabo, amulange, mutumwa wakakunukila kunsi kuli nguwe. Mwami wamba kuti, ''Amubone, aya mapenzi azwa kuli Jehova. Nkambonzi nenchinolindila Jehova alimwi?''