¹ Kwakaba kuti mumwaka wamusanu ayine wakwendelezya kwamwami Zedekkiya, mumwezi wakkumi mubuzuba bwakkumi bwamwezi, Nebbugadineza mwami wa Bbabbiloni wakeza ampii yakwe yoonse kuzolwisya Jelusalemu. Wakakkala kalangene anguwe , alimwi bakayaka akuzyungulusya bulambo. ² Nkokuti munzi wakali bayilidwe mane do mumwaka wakkumi alimwi mwami wakwe kwendelezya kwamwami Zedekkiya. ³ Mubuzuba bwamusanu aane bwamwezi wane wamwaaka oyo. Inzala yakaba mpati mumunzi zyakuti takwe nikwakali chakulya kwabantu bamunyika. ⁴ Mpawo munzi wakondomoka wakanjililwa alimwi boonse baalumi basikulwana bakachija mansiku kabayinda kumulyango akkati kamalambo aabili, kumbali achilili chamwami, nikuba boobo ba Chalidiya bakali zyungulukide munzi. Mwami wakatola lubbazu lwakuya ku Alabba. ⁵ Pesi impi yaba Chaludiya bakandilila mwami Zedekkiya akumujata mumasena amumulonga Jolodani kunkunukizi ya Jelikko. Impi yakwe yoonse yakaanzana kuzwa kuli nguwe. ⁶ Bakamujata mwami akumutola kumwami wa Bbabbiloni ku Libbina, ooko nkwakakupedwa chisubulo alinguwe. ⁷ Zyabana balombe ba Zedekkiya, bakabanenguula kunembo lyamenso akwe. Eelyo wakadonkolwa menso akwe, kawangidwe nketani amukuba, amuletela ku Bbabbiloni. ⁸ Lino mumwezi wasanu, muzuba lyamusanu aabili, lyamwezi, wakali mwaka wakkumi amusanu ayine wabwendelezi bwa Nebbugadineza mwami wa Bbabbiloni, Nebbuzalandani, mulanda wamwami wa Bbabbiloni asilutwe wankamu yabalindizi, wakeza ku Jelusalemu. ⁹ Wakatenta ng'anda ya Jehova, ng'anda ya mwami, amaanda woonse abulemu mumunzi ngwakatenta. ¹⁰ Kumakani amalambo woonse azyungulukide Jelusalemu, yoonse impi yaba Bbabbiloni abo bakkalansi a silutwe wabalindizi wakabanyonyoona. ¹¹ Kumakani abantu boonse bakachala, mumuunzi, abo bakachija kumwami wa Bbabbiloni, abakasyala mubwingi bwabo - Nebbuzalandani, silutwe wabalindizi, wakababweza wabatola mubuzike. ¹² Pesi silutwe wankamu yabalindizi wakasiya bachete loko bamunyika kuti kababeleka muzilili zyamasansa amumyunda. ¹³ Zyamakani aminsemo yamikuba yakali mung'anda ya Jehova, antomwe azibikilo alwizi lwa mukuba elyo zyakali mung'anda ya Jehova, ba Chaludiya bakapwachula muzimpanzi mpanzi akubweza mukkuba kujosya ku Bbabbiloni. ¹⁴ Mpoto, mafocholo, zinenzyo zyamalampi, bachooncho, azimwi zyoonse zilongo zyamukuba azezyo zyakali kubelesegwa abapayizi muntempele-ba Chaladiya bakazibweza batola. ¹⁵ Impoto zyakali zyakuyolela idyota antomwe azisuwo zyakapangidwe angolida, antomwe azezyo zyakapangidwe ansiliva-silutwe wabasikulinda mwami wakazibweza wazitola azilazyo. ¹⁶ Imisemo yobile, alwizi, alimwi azyimikizyo ezyo Solomoni nzyakapanga zya ng'anda ya Jehova zyakalijisi mukuba munji uteleki. ¹⁷ Bulamfu bwamusemo mutanzi atukokola tulikkumi amusanu atutatu, alimwi mukuba waatala wakali ajulu anguwo. Bulamfu bwamunsemo bwakali tukokola tutatu, kachila mulimu wazibelesyo ama pomegilanayiti azyunguluka chimikililo, zyonse kazipangidwe amukkuba. Awumwi munsemo ayimwi milimu yakali kozyenie ayakusanguna. ¹⁸ Silutwe wankamu yabalindizi wakatola Selayeyi mupayizi mupati, antomwe a Zefaniya, mupayizi wachibili, abasikulinda milyango botatwe. ¹⁹ Kuzwa mumuunzi wakatola sintolongo mupati wakali mukosoli waba silumamba, mwami, abo bakachili mumunzi. Alubo wakatola sintolongo silutwe wampi yamwami sichuno wakulanga baalumi mumpi, antomwe abaalumi bazyandamene bali makumi musanu alimwi kuzwa munyika bakali mumunzi. ²⁰ Mpawo Nebbuzalandani, silutwe wankamu yabalindizi, wakaba bweza akubaleta ku mwami wa Bbabbiloni ku Libbila. ²¹ Mwami wa Bbabbiloni wakababika kulufu ku Libbila munyika ya Hamati. Muliyeyi inzila, ba Juda bakazwa muliyabo nyika akunjizigwa mubuzike. ²² Zyamakani abantu ibakasyede munyika ya Juda, aabo Nebbugadinezala mwami wa Bbabbiloni mbakasiide, wakabika Gedaliya mwana mulombe wa Ahikkamu, mwana mulombe wa Syafani, kuti abazulwide. ²³ Lino boonse basilutwe babsilumamba, bo abalumi babo, bakamvwa kuti mwami wa Bbabbiloni wakabika Gedaliya mwendelezi, bakayinka kuli Gedaliya ku Mizipa. Balumi aba bakali Isyimayeli mwana mulombe wa Netaniya, Selayila mwana mulombe wa Tanumetu mu Netofati, a Jazaminiya mwana mulombe wa Makkatite-lwabo antomwe abalumi babo. ²⁴ Gedaliya wakachita chikonke kuli mbabo akubaluumi babo, akwamba kuti kulimbabo, mutabayowi ba Chaludiya basilutwe. Mukakkale munyika akuyomubelekela mwami wa Bbabbiloni, alimwi ziyomwendela kabotu lwenu.'' ²⁵ Pesi chakachitika nkuti mumwezi wamusanu ayibili Isyimayeli mwana mulombe wa Netaniya mwana mulombe wa Elisama, uzwa mumpuli yabwami, wakeeza abalumi balikkumi akulwisya Gedaliya. Gedaliya wakafwa, antomwe abalumi mbaakalabo ku Mizipa. ²⁶ Eelyo boonse bantu kuzwa kumunini kuyosika kumupati, abasilutwe baba silumamba, bakanyampuka akuya ku Ijiputi, nkambo bakali kuyoowa ba Bbabbiloni. ²⁷ Kwakachitika musule mumwaka wamakkumi otatwe amusanu aabili wabuzike bwa mwami Jowayakkimu mwami wa Juda, mumwezi wakkumi ayibili, muzuba lyamakkumi obile amusanu aabili bwamwezi, kuti Awelu-Maduku mwami wa Bbabiloni wakagwisya Jehoyakkimu mwami wa Juda kuzwa muntolongo. Echi chakachitika mumwaka elyo Awelu- Maduku nakatalika kwendelezya. ²⁸ Wakaambula chalweetelelo kulinguwe akumupa chuuno chabulemu kwinda eezyo zyabwami bami abo mbakalabo mu Bbabbiloni. ²⁹ Awelu-Maduku wakazumina Jehoyakkimu zigogo zyamuntolongo, alimwi Jehoyakkimu wakali kulya kwalyonse kutebuli lyamwami kwabuumi bwakwe boonse. ³⁰ Chaabilo chakulya kwakwe chakali kupegwa kulinguwe zuba abuzuba kwabuumi bwakwe boonse.