¹ Elyo Solomoni wakatalika kuyaka ng'anda ya Jehova mu Jelusalemu kuchilundu chitegwa Moliya, Oko Jehova nkwakalibonia kuli Davida wisi wakwe. Wakabamba busena oobo Davida nkwaka chibambilide, muchipolelo cha Onani mu Jebbusayiti. ² Wakatalika kuyaka mubuzuba bwabili mumwezi wabili, mumunyaka waane wakwendelezya. ³ Lino obu mbobusasa bwantalisyo eyo Solomoni njakayaka bwang'anda ya Leza. Kabelesya chiyanza chachindi tukokola, bulamfu bwayo bwakali tukokola makumi musanu akkumi lyomwe, alimwi busasa bwacho bwakali makkumi abili aatukokola. ⁴ Bulamfu bwalukonkono bwang'anda nkwili kunembo bwakali tukokola tuli makumi obile, kabwelene abusasa. Akulampa kwayo kwakali tukokola tuli makkumi obile alimwi Solomoni wakazilulula mukati angolida loko. ⁵ Wakibotya mukati azisamu zyamulombe, eyo njakazilulula angolida loko, alimwi akwivumbya misamu yamikunka anketani. ⁶ Wakisakatizya ng'anda amabwe meebesi; ingolida yakali ngolida yaku Paluvayimu. ⁷ Alimwi wakanzika minseende, maseketi, bulambo, amakkoma ali angolida, wakabeza chelubbimu kubulambo bwayo. ⁸ Wakayaka busena busalalisya. Bulamfu bwayo bwakalelene abusasa bweng'anda tukokola tuli makkumi obile. Wakizilulula angolida yanchoonzyo, zyakali kusika ku myaanda ilimusanu awumwi wamatalenta. ⁹ Ikulema kwenembe bwakali mashekeli alimakkumi musanu amashekeli angolida. Wakiziliulula mabbazu ayo amujulu angolide. ¹⁰ Wakachita zitombe zyobile zyaKkelubbimu zyabusena busalalisya; basikubeza bakazizilulula angolide. ¹¹ Mababa a kkelubbimu akalimakkumi abili atukokola bulamfu boonse antomwe; ibbaba lyomwe lyakkelubbimu lyakali tukokola tuli musanu bulamfu, kalisikila kubulambo bwang'anda; limwi bbaba lyakalikozyenie lyakali musanu tukokola, kalisikila kubbaba limbi. ¹² Ibbaba limbi lya kkelubbimu lyakali tukokola musanu, kalisikila kubulambo bwa ng'anda; alimwi ibbaba lyalyo kalili tukokola musanu lubo, kaliguma ibbaba tanzi lyakkelubbimu. ¹³ Mababa amakkelubbimu akalanzeene kusika kumweelwe wa makumi abili atukokola. Ikkelubbimu lyakimikila amawulu abo, masyu abo kalangene ang'anda mpati. ¹⁴ Wakachita chilisitilizyo chamusyobo wamuteme, chamuntumbula, alimwi achamusinza wanyangu amasani atubatuba, alimwi wakabotya botya kkelubbimu alinjiyo. ¹⁵ Alimwi Solomoni wakachita minsi ibili, umwi kawuli tukokola tuli makumi otatwe amusanu kukulampa, nkambo nkunembo lyang'anda; chimikililo chakali atala lyayo twakali tukokola musanu bulamfu. ¹⁶ Wakachita inketani yaminsi alimwi wibika atala lyayo; alimwi wakachita mwanda omwe wama pomegilanayiti akwaswanizya amwi kunketani, ¹⁷ Wakayimikizya minsi kunembo lyachikombelo, limwi kuchilisyo, alimwi kuchimweensi; wakawuzika munsi wakali kuchilisyo kuti Jakkini, alimwi munsi wakali kuchimwensi wakuti Bbowazi.