¹ Jowasi wakali aminyaka musanu ayibili naakatanguna kweendelezya; wakeendelezya kwaminyaka makumi aane mu Jelusalemu. Izina lyabanyina wakali Zibbiya, waku Bbiyashebba. ² Jowasi wakachita ziluleme kumenso a Jehova mazuba oonse a Jehoyada mupayizi. ³ Jehoyada wakamubwezela banakazi babili, mpawo wakazoba wisi wabana balombe abasimbi. ⁴ Kwakaba kuti kwiinda echi, kuti Jowasi wakayeya kubambuulula n'anda ya Jehova. ⁵ Wakabungania antomwe bapayizi aba Levi, alimwi wakaamba kuti kuli mbabo, ''Kamwinka aanze amunyaka kumagunzi a Juda akuyobunganya mali izwa ku Izilayeli yoonse mukamamike n'anda ya Leza wenu. Mube anchonzyo mutangune ndilyo lino.'' Ba Levi takwepe nzibakachita kumasangunino. ⁶ Mpawo mwaami wakayita Jehoyada mupayizi mupati akwamba kuti kulinguwe, ''Nkambonzi niwakatabuzya ba Levi kweeta mukati zyakazwa kwa Juda aku Jelusalemu mutelo wakatelesegwa a Musa mulanda wa Jehova antomwe ambungano ya Izilayeli kubbunganino lyechizuminano chamilawu ?'' ⁷ Kwabana balombe ba Ataliya, ulya mwanakazi mubi, bakapwaya n'anda ya Leza alubo bakapa zintu zyoonse zisalala zyamun'anda ya Leza kuli ba Bbaala. ⁸ Eelyo mwaami wakalayilila, mpoo bakachita bbokesi balibika aanze kumulyango wan'anda ya Jehova. ⁹ Mpawo bakachita chizibisyo kwiinda mu Juda amu Jelusalemu, kubamba kwetela Jehova mutelo Musa mulanda wa Leza ngwakatelesya boonse bantu ba Izilayili munkanda. ¹⁰ Bazulwidi boonse abantu boonse bakabotelwa akweta mali mukati akwibika mubbokesi mane bakamaninsya kulizuzya. ¹¹ Zyakachitika kuti kufumbwa bbokesi nilyakali kweeta kuli basilutwe baMwaami mumaboko abaLevi, Alimwi kufumbwa nibali kubona kuti kwaba nyingi mukati, mulembi waMwaami abapayizi bapati balajulu balikuza, kuzogwisya zilimubbokesi akulibweza, akunyampula akulibwedezya kubusena bwalyo. Balikuchita echi buzuba abuzuba, kubungania mali inyingi loko. ¹² Mwaami Jehoyada bakapa mali kuli babo balikuchita mulimu wakukutawuka mun'anda ya Jehova. Baalumi aba balikubeleka babezi bamabwe ababezi kukubukulusya n'anda ya Jehova, alimwi abaabo bakali kubeleka mulubulo amubutale. ¹³ Mpawo basimilimo bakabeleka, alimwi mulimu wakumamununa wakayinkilila kunembo kwinda mumaboko aabo; bakalulamika n'anda ya Leza mubweebe bwayo bwachiindi akuyisimya. ¹⁴ Nibakamaninsya, bakeeta mali yoonse kumwaami akuli Jehoyada. Eyi mali yakabelesegwa kukupanga zibelesyo zyamun'anda ya Jehova, zibelesyo zyankombelo zyazi payizyo - bachooncho azibelesyo zyangolida ansiliva. Bakali kupeda zipayizyo zyakuumpa mun'anda ya Jehova kwalyoonse mazuba ngakapona Jehoyada. ¹⁵ Jehoyada wakacheembala alubo kalamazuba mayingi, mpawo wakafwa, wakala minyaka 130 nakafwa. ¹⁶ Bakamuzikka mumunzi wa Devidi akkati kabaami, nkambo wakachita ziluleme mu Izilayeli, kunembo lya Leza, akun'anda ya Leza. ¹⁷ Lino kuzwa alufu lwa Jehoyada, basilutwe ba Juda bakeeza akulemeka kumwaami. Mpawo mwaami wakabaswilila. ¹⁸ Bakaleka n'anda ya Jehova, Leza wabasikale babo, akukomba baleza ba Asela amizimu. Bukali bwa Leza bwakeza ali Juda a Jelusalemu akambo kakuchita bubi bwabo. ¹⁹ Mpawo wakatuma basinsimi kuli mbabo kuti bakeete lubo kulinguwe, Jehova; basinsimi bakapa bukamboni aatala abantu, pesi bakakaka kuswilila. ²⁰ Muuya wa Leza wakeeza ali Zakkaliya mwana mulombe wa Jehoyada, mupayizi; Zakkaliya wakabukila ajulu lyabantu akwamba kuti kulimbabo, ''Leza wawaamba bobu: Nkambonzi nimwataluka milawo ya Jehova, nchiichecho chiyomulesya kujana choolwe ? Kuzwa mpuwakaka Jehova, alakwe wamukaka.'' ²¹ Pesi bakavwiya atala anguwe; kuzwa kukulayilila kwamwaami, bakamutulula mabwe mulubuwa lwen'anda ya Jehova. ²² Mubwiime obu,, Jowasi, mwaami, wakanyansya buuya obo Jehoyada, wisi Zekkaliya, mbwakachita kulinguwe. Nikuba obo, wakajaya mwana mulombe wa Jehoyada. Elyo Zekkaliya nakalimukufwa, wakati, ''Jehova ngachibone eechi akukupa kambo.'' ²³ Kwakaba kuti kumamanino amwaka basilumamba ba Alamu bakasika kuzolwanisya Jowasi. Bakaza ku Juda aku Jelusalemu; bakajaya zisalo zyoonse kuzwa kulimbabo kumwaami wa Damasikkasi. ²⁴ Nikuba kuti iimpi yaba Alamu bakeza abasilumamba bache, Jehova wakabapa luzundo atala ampii mpati loko, nkambo Juda bakamukaka Jehova, Leza wabasikale babo. Muli eyinzila ba Alamu bakaleta lubeta ali Jowasi. ²⁵ Achindi echo ba Alamu, kabeendaede, Jowasi wakaliyasidwe kapati loko. Balanda bakwe bakavwiiya atala anguwe nkambo kakujaya bana balombe ba Jehoyada, mupayizi. Bakamujayila mubulo bwakwe, akufwa; bakamuzikka mumunzi wa Devidi, pesi mutensi mutubanda twabaami pe. ²⁶ Abo bantu mbakali abo bakavwiiya atala anguwe: Zabbadi mwana mulombe wa Simiti, mwanakazi mu Amoni; a Jehozabbadi mwana mulombe wa Similiti, mwanakazi mu Mowabbayiti. ²⁷ Lino milandu atala abana bakwe balombe, zisinsimi zipati zyakaambwa atala anguwe, akuyakululwa kwan'anda ya Leza, bona, tazilembedwe na mubu panduluzi mubbuku lyabaami. Amaziya mwana wakwe mulombe nguwakaba mwaami mubusena bwakwe.