الفصل 15
1
صْبَاحْ تْشَاوْرُ ِرِياَسْ الكَهَنَة وْ شُيُوخ و الكَتبَة وْ كُلْ الخَدَامِينْ تَاعْ المُجَمَعْ. رَبْطُو يَسُوعْ و دَاوَه ْعَنْدْ بِيلاَطُسْ.
2
سَقْسَاه ْ بِيلاَطُسْ: "اَنْتَ هُوَ مَلِكْ اليَهُودْ؟". جَاوْبَهْ وْ ڤَالَهْ:"أَنْتَ ڤُلتْ".
3
وكَانُو رِيَاسْ الكَهَنَة يَشْكيِوْ عْلِيهْ بَزَّافْ.
4
سَقْسَاهْ بِيلاَطُسْ خَطَرَةَ وَحَدْ أُخْرَى ڤَالَهْ :"مَتْرَدْشْ عْلِيهُمْ ؟ شُوفْ شْحَالْ رَاهُمْ يَشْكِيوْ عْلِيكْ!".
5
تْعَجَبْ بِيلاَطُسْ خَاطَرْ يَسُوعْ مَبْغَاشْ يْرَدْ عْليِهُمْ.
6
كَانْ يَطْلَقْ لْهُمْ كُلْ عِيدْ وَاحَدْ مْنْ المَحْبُوسِينْ ، أَلِي يَبْغِيوَهْ .
7
وْ كَانْ أَلِي يْسِمِوُهْ بَارَابَاسْ مَحْبُوسْ مْعَ صْحَابَه ْ،عْلَى خَاطَرْ قْتيِلَة أَلِي دَارُوهَا فِي رَحْبَة نْهَارْ دَارُو َفوْضَى.
8
وْبْدَاوْ النَاسْ إِتَّوْغُو أُو يَطَلْبُو مْنَهْ إِدِيرْ كِي مَا كَانْ إِدِيرْلْهُمْ دَايَمْن.
9
جَاوْبْهُمْ بِيلاَطُسْ وْ ڤَالْ:"تَبْغُوا نَطْلَڤْ لْكُمْ مَلِكْ اليَهُودْ؟".
10
عْلَى خَاطَرْ كَانْ عَارَفْ بَلِّى رِيَاسْ الكَهَنَة سَلْمُوهْ غِيرْ بْالَحْسَدْ.
11
رِِياَسْ الكَهَنَة هَيْجُو النَاسْ بَاهْ يْطْلَڤْ لْهُمْ بَارَابَاسْ.
12
جَاوْبْهُمْ بِيلاَطُسْ وْ ڤَالْ لْهُم ْ:"شَا رَاكُمْ بَاغْيِينْ نْدِيرْ بْهَذَا أَلِي تْسَمُوهْ مَلِكْ اليَهُودْ؟".
13
عَيْطُو مَرَّة خْرَى :"صْلْبَوهْ".
14
ڤَالْهُمْ بِيلاَطُسْ :"شَا دَارْ مْنْ شَّرْ؟". زَادُو تْوَاغْ :"أَصَلْبَهْ".
15
بِلاَطُسْ بْغَى يْدِيرْ لَنَاسْ شَا رَاهُمْ بَاغْييِنْ. أَطْلَقْ لْهُمْ بَارَابَاسْ ، أُو سَلَمْ لْهُمْ يَسُوعْ مِينْ جَلْدُوهْ بَاشْ يَصْلْبُوهْ .
16
أَدَاوَهْ العَسْكَرْ لْدَاخَلْ الدَارْ أَلِي هِيَ دَارْ الوِلاَيَة، و تْلاَيْمَتْ الكَتِيبَة.
17
لَبْسُولَهْ أَرْجْوَانًا أُو ضَفْرُولَهْ إِكْلِيلْ تَع ْالشُوكْ أُو حَطُوهْ عْلَى رَاسَهْ،
18
أُو بْدَاوْ يَسْلْمُو عْليِهْ ڤْايْليِنْ:"سَلاَمْ يَا مَلِكْ اليَهُودْ!".
19
وكَانُوا يَضْرْبُوهْ بْمَطْرَقْ عْلَى رَاسَهْ، ويَدْفْلُو عْلِيهْ، ويَسْجْدُو ڤُدَامَهْ.
20
مْنْ بَعْد ْمَا أَسْتَهْزَاوْ بِيهْ، ڤْلَعولهْ الأَرْجْوَانْ و لَبْسُولَهْ حْوَايْجَه ْ،مَمْبَعْدْ أَدَوَاهْ بَاهْ يَصْلْبُوهْ.
21
جَابُولَهْ وَاحَدْ الرَاجَلْ كَانْ مْوَلِّي مْا لْخْلَا ،هُوَ سَمْعَانْ القَيْرَوَانِي بُو أَلِكْسَنْدَرْ سَوَوُوفُسَ،بَاشْ يَرْفَدْ الصَليِبْ.
22
أَدّاوَهْ "للجُلْجُثَة" ليِ مَعْناَهَا "جُمجُمَة".
23
وْ أَعْطَاوَهْ الخَمْرْ مْخَلْطَة بَالمَّرْ بَاشْ يَشْرَبْ، وْهُوَ مَبْغَاشْ.
24
كِي صَلْبُوهْ بْدَاوْ يَڤَْسْمُوا قَشَهْ وْ يْقُولُوا شْكُونْ يَدِي هَاذِي شْكُونْ يَدِي هَدَا.
25
عْلَى السَاعَة الثْلاَتَ صَلْبُوهْ.
26
فُوڤْ الصَلِيبْ كَانْ مَكْتُوبْ:"مَلِكْ اليَهُودْ".
27
صَلْبُو مْعَاهْ زُوجْ سَرَاقِينْ ،وَاحَدْ مْنْ جِهَةْ لِيْمِينْ وْ لاَخُرْعْلَى اليِسْرَة.
28
هَكْدَا صْرَى ڤَاعْ شَا كَانْ مَكْتُوبْ مَقْبَلْ:"حَسْبُوهْ بِينْ الَمذْنُوبيِنْ"
29
وْكَانْ لِي يْفُوتْ يْزَعَّقْ عْلِيهْ، إِيحَرْكُو رِيسَانْهُمْ أُو يْقُولُوا:"أَنْتَ أَلِي قُلْتْ أَنْهَدَمْ الهَيْكَلْ أُو نَبْنِيهْ فِي ثَلاَثَةْ إِيَامْ!
30
أَيَا سَلَّكْ رُوحَكْ وهَوَدْ مْالصَليِبْ".
31
حَتَى رِيَاسْ الكَهَنَة و الكَتَبَة كَانُوا يَسْتَهْزَاوْ بِيهْ ، وْيڤُولُوا:"سَلَّكْ لُخْرِينْ وْ مَقْدَرْشْ إِسَلَّكْ رُوحَهْ".
32
يهَوَّدْ الَمسِيحْ مَلِكْ إِسْرَائِيلْ مْنْ الصَليِبْ، بَاهْ أَنْشُوفُوهْ وْنْآمْنُوا! ". ولِي كَانُو مَصْلُوبِينْ ڤُدَامَهْ إِيْعَايْرُوا فِيهْ.
33
وْ عْلَى السَاعَة السَتَّة ، كَانَتْ الضَلْمَة ِ فَي ڤَاعْ اللَّرْضْ حَتَّى السَاعَة التَّسْعَة.
34
وْ عْلَى السَاعَة التَسْعَة تَوَّغْ يَسُوعْ بْصُوتْ عَالِي ڤَاَلْ: "إِلْوِِي ،إِلْوِي ،لِمَا شَبَقتَنِي؟" لِّي مَعْنَاهْ :رَبِي ، رَبِي عْلاَهْ خَلتِْنيِ؟
35
وْ جْمَاعَة مَلِّي كَانُوا حَاضْرِينْ كِي سَمْعُوهْ ڤَالُوا:"رَاهْ إِعَيَّطْ لْ إيليَّا".
36
جَا وَاحَدْ عَنْدَهْ عَمَرْ إَسْفَنْجَة بْلِْخْلْ دَارْهَا فُوڤْ قَصْبَة وْ سْقاَهْ وْڤَالْ:"خَليِوْ نْشُوفُو إَلىَ يْجِي إِيلِيَّا وْ يْهَوْدَهْ".
37
تَوَّغْ يَسُوعْ بْصُوتْ عَالِي وْسَلَّمْ الرُوحْ.
38
فِي هَدَاكْ الوَقْتْ تْڤَطَعْ لَحْجَابْ تَاعْ الهَيْكَلْ عْلَى زُوجْ، مْنْ الفُوڤْ حَتَى لَتحْتْ.
39
كِي شَافْ لْقَايَدْ تَاعْ لَمْيَة عَسْكْرِي أَلِي كَانْ وَاقَفْ مْقَابْلَهْ بَلِّي تَوَّغْ بْهَدَاكْ التْوَّاغْ وْسَلَمْ الرُوحْ ، ڤَاَلْ:"بَالْحَقْ هَذَا هُوَ وَلْدْ الله ! "
40
وْ كَانُوا ثاَنِي نْسَا إِشُوفُوا مَنْبْعِيدْ، كَانَتْ مَرْيَمْ المَجْدَلِيَّة ،ومَرْيَمْ أُمْ يَعْقُوبْ الصْغِيرْ ويُوسِي، أُوسَالُومَة،
41
لِّي كَانُوا يْتَبْعُوهْ ويَخْدْمُوا مْعَاهْ كِكَانْ فَالجَليِلْ. وْنْسَا وَحَدْخْرِينْ لِّي جَاوْ مْعَاهْ لاُرْشَليِمْ.
42
فْالَعْشِيَة كِكَانُوا يَْوجْدُوا لَسْبْتْ،
43
جَا يُوسَفْ لِّي مْنْ الَرَّامَة،لِهُوَ عُضْوْ مْلِيحْ فِي الْمَجْلِسْ الأَعْلَى ،كَانْ هُوَ ثَانِي يَسَّنَى مَلَكُوتْ الله، تْشَجَعْ ورَاحْ عَنْدْ بِيلاَطُسْ طْلَبْ جَسَدْ الَمِسيحْ.
44
تْعَجَبْ بِيلاَطُسْ عْلَى خَاطَرْ يَسُوعْ مَاتْ بْالْخَفْ. عَيَّط ْلْقَايَدْ مْيَة عَسْكْرِي و سَقْسَاهْ :"عَنْدَهْ بَزَّافْ مَلِّي مَاتْ؟".
45
كي عْرَفْ مْنْ قَايَدْ مْيَةْ عَسْكْرِي ،عْطَى جَسَدْ المَسِيحْ لْيُوسَفْ .
46
وْشْرَى لَهْ ْكفَنْ ، هَوْدَاهْ مْالصَليِبْ كَفنَهْ بَالكَتَانْ ، وْ دَفْنَهْ فِي قْبَْركَانْ مَحْفُورْ فْالَحْجَرْ و بَلَّعْ َلقْبَرْ بَحْجَرْكْبِيرْ.
47
و كَانَتْ مَرْيَمْ المَجْدَلِيَّة و مَرْيَمْ أًمْ يُوسِي إِشُوفُو وِينْ يَدَفْنُوهْ.