الاصحاح 13
1
خَلِيوْ لْمَحَبَةْ بِينْ اَلْخُوتْ تْكُونْ ثَابْتَةْ فِيكُمْ.
2
وُمَا تَنْسَاوْشْ تْضِيفُو الَنَاسْ اَلْبَرَانِيَةْ، عْلَخَاطَرْ بَعْضْ اَلنَاسْ ضَيْفُو اَلْمَلاَيْكَةْ وُمَاعَرْفُوشْ.
3
تْفَكْرُو لِي رَاهُمْ فَي الْحَبْسْ كَلِي رَاكُمْ مْعَاهُمْ، وُتْفَكْرُو اَلْلِي يَتْعَذْبُوا كَلِي رَاكُمْ تَتْعَذْبُو مْعَاهُمْ.
4
لاَزَمْ كُلْ وَاحَدْ يَحْتَرَمْ اَلزْوَاجْ، وُلاَزَمْ تْكُونْ اَلْعَلاَقَةْ بِينْ اَلزَوْجْ وَالزَوْجَةْ نْقِيَةْ، بَصَحْ لِي يَزْنُو وُلِيْفَسْدُو رَاحْ يْعَاقَبْهُمْ اللهْ.
5
مَاتْخَلِيوْشْ مَحَبَةْ دْرَاهَمْ تْخَسَرْ حْيَاتْكُمْ وُعْلاَقَتْكُمْ بَاللهْ، بَصَحْ كُونُو قَانْعِينْ بَالْلِي عَنْدْكُمْ، عْلَخَاطَرْ اللهْ ڤَالْ: «مَانْخَلِيكْشْ وُمَانَنْسَاكْشْ».
6
وَحْنَا نْڤُولُوا وَاثْقِينْ: «مَاعَنْدِي مَنْ وِينْ نْخَافْ عْلَخَاطَرْاَلرَّبْ هُوَ لِيْعَاوَنْنِي، وَاشْ رَاحْ يْدِيرْ الَبْنَادَمْ؟»
7
تْفَكْرُوا اَلنَاسْ لِي رَشْدُوكُمْ وُهَدْرُولْكُمْ عْلَى كَلِمَةْ اللهْ. شُوفُو لَحْيَاتْهُمْ فَي الْإِيمَانْ بَاشْ تَشَبْهُوهُمْ وُتَتْعَلْمُو مَنْهُمْ.
8
يَسُوعْ اَلْمَسِيحْ هُوَ لْأَمْسْ وَالْيُومْ وُلِلَبْدَا.
9
مَاتْخَلُوشْ اَلتَعَالِيمْ اَلْغَالْطَةْ وُلَغْرِيبَةْ تْجَرْ فِيكُمْ، عْلَخَاطَرْ مْلِيحْ أَنُو اَلْقَلْبْ يْكُونْ ثَابَتْ بَالنِعْمَةْ، وُمَاشِي بْعَادَةْ وَلاَ طْعَامْ لِي مَانْفَعْشْ لِي كْلاَوْ مَنْهَا.
10
وُحْنَا عَنْدْنَا «مَذْبَحْ»، وُلِي يْخَدْمُو فَي الْهَيْكَلْ مَاعَنْدْهُمْشْ اَلْحَقْ يَكْلُو مَنَهْ.
11
وُالْحَيَوَانَاتْ اَلِي بْدَمْهَا يَدْخَلْ رَايَسْ اَلْكَهَنَةْ لَلْمَوْضِعْ «اَلْمُقَدَسْ بَزَافْ»، رَاحْ تَتَذْبَحْ بَرَّا الْخِيَامْ.
12
عْلَى هَدِي حَتَى يَسُوعْ بَاشْ يْقَدَسْ اَلشَعْبْ بْدَمَهْ، تْأَلَمْ بَرَّا بَابْ لَمْدِينَة.
13
مَلاَ لاَزَمْ نْخَرْجُو لِيهْ بَاشْ نْرَفْدُو اَلْعَاْر نْتَاعَهْ.
14
عْلَخَاطَرْ مَاعَنْدْنَاشْ مْدِينَةْ فْي هَدْ اَلدَنْيَا، وُرَانَا نْحَوْسُو عْلَى لَمْدِينَةْ اَلدَايْمَةْ.
15
وُبَالْمَسِيحْ، خَصْنَا نْجِيوْ كُلْ خَطْرَةْ عَنْدْ اللهْ ذَبِيحَةْ عِبَادَةْ، يَعْنِي بَالْفُمْ لِيْسَبْحَهْ وُلِيَشْهَدْ لَهْ.
16
وُمَاتَنْسَاوْشْ تْدِيرُو اَلْخِيرْ وُتْسَاعْدُو اَلْمَغْبُونِينْ، عْلَخَاطَرْ بْهَدْ اَلشِي لِي يَفْرَحْ اللهْ.
17
سَمْعُو لَلْمَسْؤُولِينْ نْتَاعْكُمْ وُدِيرُوا بَكْلَامْهُمْ، عْلَخَاطَرْ رَاهُمْ يَسَهْرُو عْلَجَالْ فَايْدَتْكُمْ اَلرُّوحِيَةْ وُرَاحْ يَتْحَسْبُو عْلَى دَكْ اَلشِي، وُبَالْفَرْحَةْ يْدِيرُو اَلْخَدْمَةْ تَاعْهُمْ بْلاَ مَا يْشَتْكِيوْ، وُلُوكَانْ مَاتْسَمْعُولْهُمْشْ مَاتْسَتْفَادُو وَالُو.
18
صَلِيوْ عْلَجَالْنَا، عْلَخَاطَرْ رَانَا مَتْيَقْنِينْ بَلِي اَلضَمِيرْ نْتَاعْنَا رَاهْ صَالَحْ، وُنَبْغِيوْ نْدِيرُو كُلْشِي مْلِيحْ فَي حْيَاتْنَا.
19
وُرَانِي نَطْلَبْ مَنْكُمْ تْصَلِيوْ كْثَرْ بَاشْ نْوَلِى عَنْدْكُمْ بَالْخَفْ.
20
وُرَّبْ إِلَهْنَا لِي حْيَا مَنْ اَلْمُوتْ رَاعِينَا وُسِيدْنَا يَسُوعْ اَلْمَسِيحْ، بَدَمْ اَلْعَهْدْ اَلدَايَمْ،
21
بَاشْ يَخَلِيكُمْ قَادْرِينْ تْخَدْمُو اَلْأَعْمَالْ اَلصَالْحَةْ لِتْكَمَلْ اَلْمَشِيئَةْ نَتَاعَهْ، لِي يَخْدَمْ فِيكُمْ وَاشْ لِي يَرْضِيهْ بَالْمَسِيحْ، اَلْلِي عَنْدُو اَلْعَزْ لِلَبْدَا. أَمِينْ.
22
وُنَطْلَبْ مَنْكُمْ يَاخُوتِي تْقَبْلُو كَلِمَةْ اَلتَشْجِيعْ بَالصْبَرْ، عْلَخَاطَرْ رَاهْ قْلِيلْ وَاشْ كْتَبْتَلْكُمْ.
23
حَبِيتْ نَخْبَرْكُمْ بَلِي رَاهْ خُونَا تِيمُوثَاوَسْ خْرَجْ مَنْ اَلْحَبْسْ، لِي رَاحْ قْرِيبْ نْجِي مْعَاهْ نْشُوفْكُمْ.
24
سَلْمُو عْلَى ڤَاعْ اَلْمَسْؤُولِينْ تَاعْكُمْ وُعْلَى ڤَاعْ اَلْخُوتْ اَلْقِدِيسِينْ. رَاهْ يَسَلْمُو عْلِيكُمْ لِي هُمْ مَنْ إِيطَالْيَا.
25
نِعْمَةْ اللهْ تْكُونْ مْعَكُمْ ڤَاعْ. آمِينْ.