الاصحاح 12
1
عْلَى هَدِي، حْنَا تَانِي عَنْدْنَا قَدْ اَلسْحَابَةْ نْتَاعْ اَلشْهُودْ لِي دَايْرِينْ بِينَا، مَلاَ نَتْخَلاَوْ عْلَى كُلْ شِي لِي ثْقِيلْ فَي حْيَاتْنَا وُخَاصَةً اَلدْنُوبْ لِي دَايَرْ بِنَا، وُنْجَاهْدُو صَابْرِينْ بَاشْ نَتْقَدْمُو لِلَحْيَاةْ اَلدَايْمَة لِرَاهِي قُدَامْنَا.
2
وُنْرَكْزُو عِينِينَا عْلَى رَايَسْ إِيمَانْنَا لِي هُوَ يَسُوعْ الْمَسِيحْ لِي بِيهْ يْكُونْ إِيمَانْنَا كَامَلْ، وُبْسَبَةْ اَلْفَرْحَةْ لِي كَانَتْ قُدَامَهْ، تْحَمَلْ عْلَجَالْنَا اَلْمُوتْ عْلَى عُودْ اَلصَلِيبْ لِي بِيهْ كَسَرْ اَللَعْنَةْ، وُدُرْوَكْ مْجَمَعْ عْلَى يَمِينْ عَرْشْ اللهْ.
3
مَلاَ خَمُو فَي لِي تْحَمَلْ لْعَدَاوَةْ تَاعْ اَلْمُذْنِبِينْ بَاشْ مَاتْعَيِوْشْ مَاتْفَشْلُوشْ فِي نْفُوسْكُمْ.
4
وَنْتُمْ مَزَالْ مَا جَاهَدْتُوشْ حَتَى لَلدَمْ، كِي رَاكْ تْحَارْبُو الْخَطِيَةْ،
5
وَاشْ! وَاقِيلاَ نْسِتُو تَعْلِيمْ اللهْ لِيْكَلَمْكُمْ بِهْ كَلِي رَاكُمْ وْلاَدَهْ: «يَاوَلْدِي مَاتَحْڤَرْشْ تَأْدِيبْ اللهْ، وُمَاتَزْعَفْشْ كِي يْوَبَخْ فِيكْ.
6
عْلَخَاطَرْ لِي يْحَبَهْ اللهْ يْأَدْبَهْ، وُيَضْرَبْ كُلْ وَاحَدْ لِيصَارْ وَلْدَهْ».
7
وَإِلاَ كُنْتُو تْحَمْلُو تَرْبِيَةْ اللهْ رَاحْ يَتْمَشَى مْعَاكُمْ كَلِي رَاكُمْ وْلاَدَهْ. مَلاَ شْكُونْ هُوَ اَلْوَلْدْ لِي مَأَدْبَهْشْ بُوهْ؟
8
بَصَحْ إِلاَ كُنْتُو مَاشِي مْأَدْبِينْ، وَلِي اَلنَاسْ ڤَاعْ يَتْشَرْكُو فِيهْ، مَلاَ رَاكُمْ وْلاَدْ غِيرْ شَرْعَيِينْ وُمَاشِي وْلاَدَهْ.
9
بْلاَمَا نَنْسَاوْ بَلِي اَلْأَبَاءْ اَلْجَسَدَيِينْ نْتَاعْنَا كَانُو يْأَدْبُو فِينَا وُكُنَا نَحْتَرْمُوهُمْ، مَلاَ مَاشِي لاَزَمْ نْقَدْرُو فَي اللَوَلْ بَابَاتْ اَلْأَرْوَاحْ، بَاشْ تْكُونْ لِينَا لَحْيَاةْ؟
10
عْلَخَاطَرْ أَبَائْنَا اَللَرْضَيِينْ أَدْبُونَا عْلَى حْسَابْ وَاشْ يْعَرْفُو لِوَقْتْ قْصِيرْ، بَصَحْ بُونَا لِي فَسْمَا أَدَبْنَا لْنَفْعَنَا، بَاشْ نَشْتَرْكُو مْعَاهْ فَي الْقَدَاسَةْ كِيمَا هُوَ مْقَدَسْ
11
وُڤَاعْ تَأْدِيبْ لِيْكُونْ دُرْوَكْ يَتَنْحَسَبْ تَاعْ اَلْحُزْنْ وُمَاشِي لَلْفَرْحَةْ، بَصَحْ فَى تَالِي رَاحْ يْمَدْ لَلِي فَاتُو مَنَهْ ثَمْرَةْ تَاعْ اَلْحَقْ وُالسَلاَمْ.
12
مَلاَ شَمْخُو عْلَى يَدِيكُمْ وُرَجْلِيكُمْ اَلْفَشْلِينْ بَاشْ يَتْقَوَاوْ،
13
وُخَلِيوْ رَجْلِيكُمْ يَتْمَشَاوْ فَي طْرِيڤْ مُسْتَقِيمَ، بَاشْ لَعْرَجْ يَبْرَّا فِيهَا وُمَايَتْعَثَرْشْ.
14
حَوْسُوا عْلَى لَهْنَا مْعَ ڤَاعْ اَلنَاسْ، وُلَقْدَاسَةْ لِي مَنْ غِيرْهَا وَاحَدْ مَا يَقْدَرْ يْشُوفْ اللهْ،
15
وُحَرْزُو رْوَاحْتِيكُمْ بَاشْ مَايَتَحْرَمْ تَا وَاحَدْ مَنْ نِعْمَةْ اللهْ، بَاشْ مَايَتَخْلَقْشْ اَلْحِقْدْ بِينَاتْكُمْ لِيَقْدَرْ يَنْجَسْ بَزَافْ اَلنَاسْ.
16
وُرَدُو بَالْكُمْ بَاشْ مَايْكُونْشْ فِيكُمْ لِي زْنَى وَلاَ لِي مَاحْتَرَمْشْ اللهْ كِيمَا دَارْ عِيسُو، لِي بَاعْ حَقَهْ عْلَجَالْ طَبْسِي مَاكْلَةْ.
17
وُرَاكُمْ تْعَرْفُو بَالشِي لِي صَارْ مْنَبَعْد، كِي بْغَا يُورَثْ اَلْبَرَكَةْ تَرْفَضْ، وُمَلْقَاشْ كِيفَاشْ يْتُوبْ حَتَى وَإلاَ كَانْ بْغَاهَا بَالدْمُوعْ.
18
عْلَخَاطَرْ مَاجِيتُوشْ لَجْبَلْ لِيَتَلْمَسْ لِي فِيهْ نَارْ شَاعْلَةْ، وُ الظَّلْمَةْ لِي مَضْبَبَةْ وُالزَوْبَعَةْ،
19
وُعْيَاطْ اَلْبُوقْ وُصُوتْ يَتْكَلَمْ، وُلِي سَمْعُو طَلْبُوا بَاشْ مَايْزِيدُوشْ يَسَمْعُو وَلاَ كَلِمَةْ.
20
عْلَخَاطَرْ مَاحْتَمْلُوشْ وَاشْ أَمَرْهُمْ بِهْ، «وُلُوكَانْ كَاشْ بْهِيمَةْ تَتَلْمَسْ الَجْبَلْ يَرَجْمُوهَا وُيْمَوْتُوهَا».
21
وُكَانْ اَلْمَنْظَرْ يْخَوَفْ حَتَى ڤَالْ مُوسَى: «أَنَا خَايَفْ وُنَرْجَفْ»
22
وُرَاكُمْ قْرَبْتُو لَجْبَلْ صَهْيُونْ، وُلَمْدِينَةْ اللهْ اَلْحَيّْ: أُورْشَلِيمْ تَاعْ اَلسَمَا، وُأُلُوفْ اَلْمَلاَيْكَةْ لِي دَايْرِينْ حَفْلَةْ،
23
وُكَنِيسَةْ اَللَوْلِينْ مَكْتُوبِينْ فَى السْمَا، لِعَنْدْ اللهْ لِي يْحَاسَبْ اَلْكُلْ، وُلَرْوَاحْ اَلنَاسْ اَلْكَامْلِينْ لِي يَتَقِيوْ اللهْ،
24
وُيَسُوعْ وَسِيطْ اَلْعَهْدْ اَلْجَدِيدْ، وُدَمْ لِيَتْرَشْ لِيَتْكَلَمْ خِيرْ مَنْ هَابِيلْ.
25
حَرْزُوا بَاشْ تْسَمْعُوا للهْ لِي يْكَلَمْكُمْ. عْلَخَاطَرْ إِلاَ كَانُوا هَدُوكْ مَاسَلْكُوشْ، كَانْ عْلَخَاطَرْ رَفْضْ يَسْمَعْ اللهْ عْلَى اللَرْضْ، مَلاَ حْنَا تَانِي مَانْسَلْكُوشْ إِلاَ رْفَضْنَا اللهْ لِي يْكَلَمْنَا مَنْ اَلسْمَا!
26
اَلْلِي صُوتَهْ زَعْزَعْ اَللَرْضْ فْي دَكْ اَلْوَقْتْ، وُدُرْوَكْ وْعَدْ وُڤَالْ: «خَطْرَةْ خْرَى رَاحْ نْزَلْزَلْ مَاشِي بَرْكْ اَللَرْضْ، بَصَحْ اَلسْمَا تَانِي»
27
وُكِي ڤَالْ «خَطْرَةْ خْرَا» حَابْ يْڤُولْ بَلِي رَاحْ يَنَحِي لِي يَتْزَعْزَعْ، وُلِي مَايَتْزَعْزَعْشْ يَخَلِيهْ ثَابَتْ.
28
وُعْلَى هَدْ اَلشِي رَاحْ يْكُونْ لِينَا مَلَكُوتْ لِمَا يَتْزَعْزَعْشْ، وُيْخَصْنَا نْشَكْرُو اللهْ وُنْبَيْنُولُو اَلْعِبَادَةْ نْتَاعْنَا لِيهْ بْكُلْ خُشُوعْ
29
وُتَقْوَى.عْلَخَاطَرْ «رَّبْنَا كِي النَارْ لِي تَاكُلْ».