¹ وُفِي دِيكْ لِيَامَاتْ زَادُ عَدَدْ الْتَلاَمِيذْ بَزَافْ، الْيُونَانيِّينْ زَعْفُوا مالْعِبْرَانِيِّينْ خَاطَرْ مَا كَانُوشْ يْتْهَلاَوْ بالْهَجَلاَتْ تَعْهُمْ فخِدْمَة المَعُونَة تَاعْ كُلْ يُومْ. ² لَطْنَعْشْ عَيْطُوا لَتَلاَمِيذْ وڤَالُوا: "مَايْلِقْشْ نْخَلِيوْ كَلِمَة الله ونَخْدْمُوا طْوَابَلْ. ³ خَيْرُوا أَنْتُومَ يَا خَاوْتْنَا سَبْعَة رْجَال بِينَتْكُمْ، عَنْدْهُمْ شْهَدَة مْلِيحَة وُ مْعَمْرِينْ بالْرُوحْ الْقُدُسْ وُالْحِكْمَة، وُهُمَا يَتْهَلاَوْ بْهَادْ الْخِدْمَة. ⁴ وَحْنَا نْكَمْلُوا فالْصْلاَة وُ خِدْمَة الْكَلِمَة". ⁵ وَالْنَاسْ ڤَاعْ أَعْجَبْهُمْ الْحَالْ، خَيْرُوا أسْتِفَانُوسْ، رَاجَلْ مْعَمَرْ بالْإِيمَانْ و َالْرُوحْ الْقُدُسْ، وُفِيلبُّس وَبُرُوخُورُسْ وُنِيكَانُورْ وُتِيمُونْ وُبَرْمِينَاس وُنِيقُولاَوُس أَلِي جَا مَنْ أَنْطَاكْيَّا. ⁶ أَدْوْهُمْ عَنْدْ الْرُسُل، حَطُوا عْلِيهُمْ الْيَدِينْ. ⁷ ُوكَانَتْ كَلِمَة الله تَتَعْرَف، وَالْتَّلاَمِيذْ يْزِدُوا بْكَثْرَة فِي أُرْشَلِيمْ، وُنَاسْ كْثِيرَة مَنْ الْكَهَنَة كَانُوا يْاَمنُوا. ⁸ وُأسْتِفَانُوسْ كَانْ مْعَمَرْ بالْإِيمَانْ والْقُوَّة، كَانْ إِيْدِيرْ أَيَاتْ وعْجَايَبْ كْبِيرَة فِي وَسْطْ الْنَاسْ. ⁹ وُنَاضُوا وَحْدِينْ مَنْ الْمَجْمَعْ أَلِي يْسَمُوهْ مَجْمَعْ الْلِّيبَرْتِينِيّين وَالْقَيْرَوَانِيِّين وَ الْإِسْكَنْدَرِيِّين، وُمَنْ الْيَهُودْ تَعْ كِيلِيكِيَّا وْأَسِيَّا، يَحْكِيوْ مْعَ أسْتِفَانُوس. ¹⁰ وُمَاڤَدْرُشْ يَحَبْسُوا الْحِكْمَة وَ الرُّوحْ أَلِي كَنْ يَهْدَرْ بِيهُمْ. ¹¹ وُتَمَ دَّخْلُوا رْجَالْ يْڤُلُوا: "حْنَا سْمَعْنَاهْ يَهْدَرْ بَكْلاَمْ مَاشِي صحِيحْ عْلَى مُوسَى وَعْلَى الله". ¹² وُهَيْجُواالْشَّعْبْ والْشْيُوخْ وأَلِي يَكْتْبُوا، ورَاحُوا خَطْفُوهْ وَأَدَاوَهْ الْمَجْمَعْ، ¹³ وُجَابُوا شْهُودْ كَذَبِينْ يْڤُولُوا: "هَدْ الْرَاجَلْ مَاحَبَسْشْ مَنْ الْهَدْرَة بَكْلاَمْ مَاشِي صَاحْ عْلَى هَدْ الْمْكَانْ الْمقَدَسْ وَ عْلَى الْشَرِيعَة، ¹⁴ لِأَنَنَا سْمَعْنَاهْ يْڤُولْ: يَسُوعْ الْنَّاصِرِي هَدَا رَاحْ يْهَدَمْ هَادْ الْمْكَانْ، وُيْبَدَلْ لَعْوَيَدْ أَلِي خَلَهَلْنَا مُوسَى". ¹⁵ ڤَاعْ أَلِي كَانُوا مْجَمْعِينْ فَالْمَجْمَعْ شَافُوا فِيهْ، وُبَانْ لْهُمْ وَجْهَه مْنَوَرْ كِي لْمَلاَيْكَة.