الإصحاح 3
1
طْلَعْ بُطْرُسْ وْيُوحَنَّا فِي رَحْبَة لَلْهَيْكَلْ فْسَاعَةْ الَصْلاَة.
2
وْكَانْ وَاحَدْ الَرَاجَلْ أَعْرَجْ مَلِّي زَادْ كَانُوا يْجِيبُوهْ كُلْ يُومْ، وَ يْحَطُوهْ عَنْدْ بَابْ الْهَيْكَلْ الَلِّى يْسَمُوهْ "الْجَمِيلْ" بَاشْ يَطْلَبْ صَدَقَة مَالَنَّاسْ الَلِّى يَدَخْلُوا لَلْهَيْكَلْ.
3
وْمَلِّي شَافْ بُطْرُسْ وْيُوحَنَّا رَايْحِينْ يَدَخْلُوا لَلْهَيْكَلْ، طْلَبْ مَنْهُمْ صَدَقَة.
4
شَافُوا فِيهْ بُطْرُسْ وْيُوحَنَّا، وْڤَالُوالَهْ: "شُوفْ لِينَا".
5
وْهُوَ ڤْعَدْ يْشُوفْ فِيهُمْ وْيْقَارَعْ يَعْطُىوهْ شِّي حَاجَة.
6
وْڤَالَهْ بُطْرُسْ: "مَاعَنْدِي فَضَّة وَلاَ ذْهَبْ، الَلِّى عَنْدِي نَعْطِيهْلَكْ: بْأَسَمْ يَسُوعْ الْمَسِيح الَنَاصِرِي نُوضْ وَ مْشِي!".
7
وْشَدَّهْ مَنْ يَدَهْ لِيمْنَا وْنَوْضَهْ، تَمْ تَمْ تْصَڤْدَوا رَجْلِيهْ،
8
وْنَاضْ تَمْ تَمْ وَبْدَى يَمْشِي، وَدْخَلْ مْعَهُمْ لَلْهَيْكَلْ وْهُوَ يَمْشِي وْيْنَقَزْ وْيْسَبَحْ الله.
9
وْڤَاعْ الَنَّاسْ شَافُوهْ يَمْشِي وَيْسَبَحْ الله.
10
وْعَرْفُوا بَلِّي هُوَ الَلِّى كَانْ يَڤْعَدْ يَطْلَب صَدَقَة فْبَابْ الْهَيْكَلْ الْجَمِيلْ، وْحَكْمَتْهُمْ دَهْشَة وَتْحْيْرُوا مَالشِّي الَلِّى صَارْ لَهْ.
11
وْكِي كَانْ لَعْرَجْ الَلِّى بْرَا مَابْغَاشْ يْفَرَقْ بُطْرُسْ وْيُوحَنَّا، تْجَمَعُوا ڤَاعْ الَنَّاسْ فْالَمْكَان الَلِّى يْسَمُوهْ"رِوَاقْ سُلَيْمَانْ" وْهُمَا فْدَهْشَة.
12
مَلِّي شَافْهُمْ بُطْرُسْ ڤَالْ: "يَا إِسْرَائِيلِيُّونْ، عْلاَشْ رَاكُمْ مَتْعَجْبِينْ مَنْ هَادْ الَشِّي؟ عْلاَهْ تْشُفُوا فِينَا كَلِي بْقَوَتْنَا وَلَا التَقْوَى تَاعْنَا الَلِّى وَلَى هَادْ الَرَاجَلْ يَمْشِي؟
13
الله تَاعْ إِبْرَاهِيمْ وْإِسْحَاقْ وْيَعْقُوبْ، الله تَاعْ أَبَأْنَا، عْطَى الْمَجْدْ لَوَلْدَهْ يَسُوعْ، الَلِّى سَلَمْتُوهْ نْتُمَا وَنْكَرْتُهْ ڤُدَامْ بِيلاَطُسْ، وْهُوَ كَانْ بَاغِي يْطَلْڤَهْ.
14
وَنْتُمَا نْكَرْتُوا الْقُدُّوسْ الْبَارْ، وَبْغِتُوا يْطْلَڤْ لْكُمْ رَاجَلْ قَتَالْ.
15
وْرَايَسْ الْحَيَاةْ ڤْتَلْتُوهْ، الَلِّى نَوْضَهْ الله مَالْمُوتْ، وَحْنَا شَاهْدِينْ عْلِيهْ.
16
وْبَالْإيمَانْ بْأَسْمَاهْ، الَلِّى شْفَى هَادْ الَرَاجَل الَلِّى شَفْتُوهْ وْعَرْفُتُوهْ، وْبَالْإِيمَانْ بْأَسْمَاهْ الَلِّى عْطَاهْ الْصَّحَة وَنْتُمَا حَاضْرِينْ.
17
"وْدَرْوكْ يَا خَوْتِي رَانِي عَارَفْ بَلِّي دَرْتُوا هَادْ الَشِّي بْقَلَة الْمَعْرِفَة كِمَا الرِّيَاسْ تَاعْكُمْ.
18
كِيمَا سْبَقْ الله وْهْدَرْ مَنْ فَمْ الْأنْبِيَا تَاعَهْ، بَلِّي الْمَسِيحْ رَاحْ يَتْأَلَمْ، وْكُلْ هَادَا صْرَى نِيشَانْ.
19
تُوبُوا وْوَلِيوْ بَاشْ يَتَّمْحَاوْ ذْنُوبْكُمْ، بَاشْ تْجِي وْقَاتْ وِينْ يَفْرَجْ رَّبِي،
20
وْيَرْسَلْ يَسُوعْ الَلِّى بَشَرْكُمْ بِيهْ مَنْ قْبَلْ.
21
وَلِي الَسْمَا لاَزَمْ تَقَبْلَهْ، حَتَّى كُلْ شِي يَرْجَعْ، كِيمَا سْبَقْ وْڤَالْ الله مَالَلَّوَلْ بْفَمْ ڤَاعْ الْأنْبِيَا تَاعَهْ الْقِدِّيسِينْ.
22
مُوسَى ڤَالْ: الَرَّبْ إِلَهْكُمْ وَاحَدْ الَنَبِّي كِيمَا أَنَا رَايَحْ يَخْرَجْ مَنْ وَسطكُمْ، وْتَسَمْعُوا لَهْ فْكُلْ مَا يْڤُولْكُمْ .
23
وْكُلْ وَاحَدْ مَايَسْمَعْشْ لْدَاكْ الَنَبِّي يَتَڤْلَعْ مَنْ وَسْطْ الَشَعْبْ.
24
وْڤَاعْ الْأنْبِيَا الَلِّى هَدْرُوا ثَانِي، مَنْ وَقْتْ صَمُوئِيلْ، تْنَبْؤُا عْلَى هَادْ لِيَامْ.
25
نْتُمَا وْلاَدْ الْأَنْبِّيَا، وَوْلاَدْ الْعَهْدْ الَلِّى عَاهَدْ بِهْ الله أَبَاَءْنَا مَلِّي ڤَالْ لْإِبْرَاهِيمْ: بوْلاَدَكْ تْتْبَارَكْ ڤَاعْ الْعَايْلاَتْ الَلِّى فَالَدَنْيَا.
26
نْتُمَا الَلَّوْلِينْ عْلَى خَاطَر يَسُوعْ خْرَجْ مَنْ وَسْطْكُمْ، رَسْلَهْ الله يْبَارَكُمْ مَلِّي وَخَرْ كُلْ وَاحَدْ مَنْكُمْ مَالشَرْ الَلِّى كَانْ فِيهْ".