الإصحاح 2
1
وْ كِي لْحَڤْ يُومْ الْخَمْسِينْ كَانُوا مْعَ بَعْضْ بْنَفْسْ وَحْدَة،
2
وْعَلَى غَفْلَة سَمْعُوا صُوتْ مَالَسْمَا كِيمَا رِيحْ قَوْيَة وَتْعَمْرَتْ ڤَاعْ الَدَّارْ الَلِّى كَانُوا مْجَمْعِينْ فِيهَا،
3
وْبَانَتْ لْهُمْ لْسَانَاتْ تَشْبَهْ لَنَّارْ وْنْحَطُوا عْلَى كُلْ وَاحَدْ مَنْهُمْ.
4
وَتْعَمْرُوا ڤَاعْ بَالْرُوحْ الْقُدُسْ، وْبْدَاوْ يَهَدْرُوا بْلُغَاتْ وَحَدُ خْرِينْ كِمَا مَدَّلْهُمْ الَرُوح بَاشْ يَنَطْقُوا.
5
وَتْعَمْرُوا ڤَاعْ بَالْرُوحْ الْقُدُسْ، وْبْدَاوْ يَهَدْرُوا بْلُغَاتْ وَحَدُ خْرِينْ كِمَا مَدَّلْهُمْ الَرُوح بَاشْ يَنَطْقُوا.
6
وْكَانُوا يْهُودْ رْجَالْ أَتْقِيَا مَنْ كُلْ بْلاَدْ تَحْتْ الْسْمَا سَاكْنِينْ فِي أُرْشَلِيمْ.
7
كِي سَمْعُوا دَاكْ الْصُوتْ، جْتَمْعُوا الَنَّاسْ وَتْحَّيْرُوا، عْلَى خَاطَرْ كُلْ وَاحَدْ كَانْ يَسْمَعْهُمْ يَهَدْرُوا بْلُغْتَهْ،
8
كِيفَاشْ كُلْ وَاحَدْ فِينَا رَاهْ يَسْمَعْ الَلُغَة الَلِّى تَوْلَدْ بِيهَا؟
9
فَرْتِيُّونْ وْمَادِيُّونْ وْعِيلاَمِيُّونْ، وْنَاسْ مَسْبُوطَيمَا، وْالْيَهُودِيَّة وْكَبْدُوكِيَّة وْبُنْتُسْ وْأَسْيَّا
10
وْفَرِيجِيَّة وْبَمْفِيلِيَّة وْمَصْرْ، وْ الَلِّى مَنْ جِهَةْ لِيبْيَا فَالْقَيْرَوَانْ، وْالَرُومَانِيُّونْ الَسَاكْنِينْ فْدِيكْ الْجِهَة يَهُودْ وْبَرَانِيِّينْ،
11
كِرِيتِيُّونْ وْعْرَبْ، نَسَمْعُهُمْ يُهَدْرُوا بْلُغَتْنَا عْلَى عَجَائِبْ الله!".
12
وْتْحَيْرُوا الَنَّاسْ وْخَافُوا ڤَالُوا بِينَاتْهُمْ: "وَاشْ رَاهْ صَارِي هْنَا؟".
13
وْكَانُوا وَاحَدْ خْرِينْ يَسْتَهْزَاوْ ڤَالُوا: "رَاهُمْ سَكْرَانِينْ".
14
ووْقَفْ بُطْرُسْ مْعَ لَحْدَاشْ تِلْمِيذْ وَرْفَدْ صَوْتَهْ وْڤَالْ لْهُمْ: "يَا رْجَالْ الْيَهُودْ وْ الَلِّى سَاكْنِينْ فِي أُرْشَلِيمْ، عَرْفُوا هَادَا الَشِّي وْسَمْعُوا لَكْلاَمِي،
15
عْلَى خَاطَرْ هَادُوا مَارَاهُمْشْ سَكْرَانِينْ كِيمَا رَاكُمْ حَاسْبِينْ، رَاهِي تْلاَثَة تَاعْ لَعْشِيَّة.
16
بَصَّحْ هَادَا الَلِّى ڤَالَهْ يُوئِيلْ الَنْبِي:
17
يْڤُولْ الله: وَيْكُونْ فْلِيَامْ الَلَّخْرَة أَنِي نْفَرَغْ مَنْ رُوحِي عْلَى ڤَاعْ الَنَّاسْ، وْيَتْنَبَأْ وْلاَدْكُمْ وَبْنَاتْكُمْ، وْشُبَانْكُمْ يشُفُوا رُوؤَّى، وَشْوَابِينْكُمْ يْنُمُوا.
18
وَعْلَى رْجَالْ وَنْسَا الَلِّى يَخَدْمُونِي نْفَرَغْ مَنْ رُوحِي فْدِيكْ لِيَامْ وْيَتْنَبْئُوا.
19
وَنْدِيرْ مُعْجِزَاتْ مَنْ فُوقْ الَسْمَا وْ مُعْجِزَاتْ خْرَى فَالَلَّرْضْ : دَمْ وْنَارْ وْبْخَارْ دُخَانْ.
20
تَرْجَعْ الَشَمْسْ ظَلْمَة وْلَقْمَرْ دَمْ، قْبَلْ مَا يْجِي نْهَارْ الَرَّبْ الْعَظِيمْ
21
وَالَكْبِيرْ وْيْكُونْ ڤَاعْ الَلِّى يَدْعِي بْأَسَمْ الَرَّبْ يَسْلَكْ.
22
يَارْجَالْ تَاعْ إِسْرَائِيلْ سَمْعُوا لْهَادْ لَكْلاَمْ: يَسُوعْ الَنَاصِرِي رَاجَلْ بِيَّنْ لْكُمْ بِيهْ الله قُوَاتْ وْمُعْجِزَاتْ وْأَيَاتْ دَارْهُمْ الله بْيَّدَهْ فْوَسْطْكُمْ، كِيمَا رَكُمْ عَارْفِينْ.
23
وْكِيمَا كَانْ فَحْسَابْ وْالْخُطَة تَاعْ الله مَالَلَّوَلْ ،دِيتُوهْ بْيَدِكُمْ الَلِّى مْعَمْرَة ذْنُوبْ صْلَبْتُوهْ وْقْتَلْتُوهْ.
24
الله نَوْضَاهْ وْغْلَبْ حَتَّى الْمُوتْ، الَلِّى مَا قَدْرَاتْشْ تَحَكْمَهْ.
25
عْلَى خَاطَرْ دَاوُدْ ڤَالْ فِيهْ: كُنْتْ نْشُوفْ رَّبِي ڤُدَامِي فْكُلْ وَقْتْ، رَاهْ عَلَى لِيمِينْ تَاعِي بَاشْ مَا نَتْزَعْزَعْشْ.
26
عْلَى بِيهَا فْرَحْ ڤَلْبِي وْلُغْنَى خْرَجْ مَالْسَانِي، حَتَّى الْجَسَدْ تَاعِي غَادِي يَرْتَاحْ وْيَسَنَى الله.
27
عْلَى خَاطَرْ مَا خَلِتْنِيشْ بِينْ الْمُوْتَى، وْمَا خَلِيتْشْ الْقُدُوسْ تَاعَكْ فْالَقْبَرْ.
28
وَرِّيتْلِي طَرْڤَانْ الْحَيَاةْ وْرَاحْ تْعَمَرْنِي فَرْحَة ڤُدَامْ وَجْهَكْ.
29
يَا خَوْتِي، خَلُونِي نْڤُولْكُمْ بْكُلْ حُرِيَة عْلَى أَبُونَا دَاوُدْ بَلِّي مَاتْ وْنَدْفَنْ، وْقَبْرَهْ مَازَالَّهْ عَنْدْنَا حَتَّى لْهَادْ الَنْهَارْ.
30
إِلاَ دَاوُدْ كَانْ نْبِي، وْكَانْ عَارَفْ بَلِّي الله وَعْدَهْ وْحْلَفْ لَهْ ،بَاشْ مَالَنَسْلْ تَاعَهْ غَادِي يَخْرُجْ الَلِّى يَڤْعَدْ عْلَى كُرْسِي الْعَرْشْ تَاعَهْ.
31
سْبَقْ شَافْ وْهْدَرْ عْلَى قِيَامَةْ الْمَسِيحْ، بَلِّي مَا يَقْعَدْشْ بِينْ الْمُوتَى وْالْجَسَدْ تَاعَهْ مَايَفْسَدَشْ.
32
يَسُوعْ هَادَا نَوْضَهْ الله مَالْمُوتْ، وْحْنَا كُلْنَا شْهُودْ عْلِيهْ.
33
وْالَلِّى تَرْفَعْ بِيْمِينْ الله، وْشَّدْ وَعْدْ الْرُوحْ الْقُدُسْ مَنْ الْأَبْ، وْفَرَغْهْ كِيمَا رَاكُمْ تْشُوفُو وْتَسَمْعُوا دَرْوَكْ.
34
عْلَى خَاطَرْ دَاوُدْ مَاطْلَعْشْ لَسْمَا، وْهُوَ بْرُوحَهْ يْڤُولْ: ڤَالْ الَرَّبْ لْرَّبِي: أَڤعَدْ عَلِيمِينْ تَاعِي
35
حَتَّى نْحَطْ عَدْيَانَكْ تَحَتْ رَجْلِيكْ.
36
بَاشْ ڤَاعْ نَّاسْ إِسْرَائِيلْ يَتْقَنْعُوا بَلِّي الله هُوَ الَلِّى دَارْ يَسُوعْ هَادَا، الَلِّى صْلَبْتُوهْ نْتُمَا، رَبَّا وَمَسِيحًا".
37
كِي سَمْعُوا هَادْ لَكْلاَمْ حَسُوا مَنْ قْلُوبْهُمْ، وْڤَالُوا لْبُطْرُسْ وْلْڤَاعْ الَرُسُلْ: "شَا لاَزَمْ نْدِيرُوا يَا خَوَتْنَا؟".
38
ڤَالْهُمْ بُطْرُسْ: "تُوبُوا وْكُلْ وَاحَدْ مَنْكُمْ يَتْغَطَسْ بْإِسْمْ يَسُوعْ الْمَسِيحْ بَاشْ الَذْنُوبْكُمْ تَنْغْفَرْ، وْتْقَبْلُوا عْطِيَّة الْرُوحْ الْقُدُسْ.
39
عْلَى خَاطَرْ هَادْ الْوَعْدْ لِكُمْ وْلَوْلاَدْكُمْ وْڤَاعْ الَلِّى رَاهُمْ بْعَادْ، ڤَاعْ الَلِّى يَدْعِي الَرَّبْ إِلَهْنَا".
40
وْكَانْ بُطْرُسْ يْشَجَعْهُمْ بكْلاَمْ آخَرْ بَزَّافْ وْ كَانْ يَشْهَدْ لْهُمْ وَيْبَشَرْهُمْ وَيْڤُولْ: "بَعْدُوا مَنْ هَادْ الْجِيلْ لَمْعَوَجْ".
41
قَبْلُوا كْلاَمَه بَالْفَرْحْ، وَتْغَطْسُوا، وْآمْنُوا فْدَاكْ الَنْهَار ڤْرِيبْ مَنْ ثْلْثَة أَلَفْ وَاحَدْ.
42
كَانُوا مْدَاوْمِينْ فَالْتَعْلِيمْ تَاعْ الَرُّسُلْ، وَالشَرِكَة بِينَتْهُمْ، وْڤَسْمُوا الْكَسْرَة، وَالْصْلاَة.
43
وْرَاحْ خُوفْ مَنْ كُلْ وَاحَدْ، وْكَانَتْ مُعْجٍزَاتْ وْآيَاتْ كْثِيرَة تَصْرَى عْلَى يَدْ الَرُّسُلْ.
44
وَ الَلِّى آمْنُوا كَانُوا معَ بَعَضْ، وْكَانُوا يَشْتَرْكُوا فْكُلْ حَاجَة.
45
كَانُوا ثَانِي يْبِيعُوا أَمْلاَكْهُمْ وْصْوَالَحْهُمْ وَيَڤَسْمُوهَا بِينَتْهُمْ كُلْ وَاحَدْ كِيمَا يَحْتَاجْ.
46
وْكَانُوا دِيمَا يْرُحُوا لَلْهَيْكَلْ بْرُوحْ وَاحْدَة. وْكَانُوا يَڤَسْمُوا الكَسْرَة فَالْدْيَارْ، وْكَانُوا يَاكْلُوا بَالْفَرْحْ وْبْطِيبَةْ الْڤَلُوبْ،
47
يْسَبْحُوا الله، وْكَانْ لْهُمْ نِعْمَة عَنْدْ ڤَاعْ الَنَّاسْ. وْكَانْ الرَّبْ كُلْ يُومْ يْزِيدْ الَنَّاسْ لَلْكَنِيسَة بَاشْ يَسَلْكُوا.