الإصحاح 28
1
وكِي سَلْكُوا لْ ڤَاوْ الْجَزِيرَة يْسَمُهَا مَالْطَة.
2
رَحْبُوا بِينَا أَهْلْهَا الْبَرَابِرَة بَحْنَانَة كْبِيرَة قْلِيلْ أَلِي يْدِرَهَا، عْلَى خَاطَرْ كَان الْنُو يْصَبْ والْحَالْ بَارَدْ شَعْلُوا نَارْعَلَى جَلْنَا.
3
وبُولُسْ لَّيَمْ بَزَافْ أَغْصَانْ و حَطْهَا فَالْنَارْ، و كَثْرَةْ الْحُمَانْ خَرْجَتْ لَفْعَى و تَعَلْڤَتْ عَلَى يَدَهْ.
4
وكِي شَافُوا الْبْرَابْرَة الْحِيَة مْعَلْڤَة بْيَدَهْ، ڤَالُوا وَاحْدٍينْ مَنْهُمْ : " لاَ بُدْ هَادْ الْرَّجَلْ قَاتَلْ، الْحَقْ تَبْعَهْ ومَا خَلَهْشْ يَحْيَا هُوَ أَلِي سْلَكْ مَنْ الْمُوتْ فَالْبْحَرْ".
5
وبُولُسْ نْفَضْ الْلَفْعَى لَنَارْ بْلَى مَا تْضَرَهْ
6
وهُمَا كَانُوا يَسَنَاوْ يَتْنَفَخْ ولاَ يْطِيحْ مِيَتْ عْلَى غَفْلَة. ومَلِي سَنَاوْ بَزَافْ ومَا صْرَى لَهْ حَتَّى شِي ضَرَهْ، بَدْلُوا رَايْهُمْ وڤَالُوا: " هُوَ إِلَهْ!".
7
وكَانْ ڤُدَامْ الْمْكَانْ أَلِي كُنَا فِيهْ حْوَاشْ تَعْ مُقَدَّمْ الْجَزِيرَة أَلِي أَسْمَهْ بُوبْلِيُوسْ. عْرَضْنَا وتْهَلَى فِينَا مُدَّة ثَلْثْ إِيَامْ.
8
وكَانْ بُو بُوبْلِيُوسْ مْكَسَلْ عْلَى فْرَشَهْ مْرِيضْ بَالْحُمَّى والإِسهَالْ. دْخَلْ عَنْدَهْ بُولُسْ و صَلَّى، وحَطْ يَدِيهْ عْلِيهْ وبْرَاهْ.
9
وكِي سَمْعُوا الْمَرْضَى أَلِي فَالْجَزِيرَة جَاوْلْعَنْدَهْ وبْرَاوْ.
10
و عْطَاوْنَا بَزَافْ هَدَايَا، وكِي ڤَلَعْنَا عْطَاوْ لْنَا الْشِي أَلِي نَحْتَاجُوهْ فِي سْفَارْنَا.
11
وبَعْدْ ثَلْثْ أَشْهُورْ ڤَلَعْنَا فِي بَابُورْ مَنْ الْإِسْكَنْدْرِيَّة مَرْسُومْ عْلِيهْ صُورَة الْزُوجْ تْوَامْ، أَلِي فَوَتْ الْمَشْتَى فِي مَالْطَا.
12
و هَوَّدْنَا لْسِرَاكُومَا وفَوَتْنَا ثَلْثْ إِيَّامْ.
13
ومَنْ تَمَا بَحْرْنَا حَتَّى وْصَلْنَا رِيغُونْ. وفَالْيُّومْ الْتَّالِي هَبَتْ رِيحْ جَنُوبِيَة، وْصَلْنَا لْبُوطِيُولِي فِي يُومِينْ،
14
وِينْ لْڤِينَا الْخُوتْ أَلِي طَلْبُوا مَنَا نْفَوْتُوا سَبْعْ إِيَّامْ عَنْدْهُمْ. وهَكْدَا وْصَلْنَا لْرُومَا.
15
وكِي سَمْعُوا الْخُوتْ أَلِي تَمَا بَخْبَرْنَا، خَرْجُوا يْلَڤِيوْنَا فْي فُورُنْ أَبِيُوسْ والْثْلاَثْ حْوَانِيتْ. كِي شَفْهُمْ بُولُوسْ شْكَرْ الله و تْشَجَّعْ.
16
وكِي دْخَلْنَا لْرُومَا سَلَمْ رَايَسْ الْمْيَّة بُولُسْ لْضَابَطْ الْعَسْكَرْ، وسْمَحْلَهْ يَسْكَنْ فِي دَارْ وَحْدَهْ مْعْ الْعَسْكْرِي أَعَسْ عْلِيه.
17
و بَعْدْ ثَلْثْ إِيَّامْ سْتَدْعَى بُولُسْ عُقَالْ الْيَهُودْ. كِي جَمْعُوا ڤَالْ لْهُمْ: "يَا خُوتِي، حَتَّى وِلاَ مَا دَرْتْ شِي ضَدْ الْشَّعْبْ ولاَ عْوَايَدْ جْدَادْنَا، حَبْسُونِي فِي أُورُشَلِيم وسَلْمُونِي لَرُومَانْ،
18
كِي حَاكْمُونِي بْغَاوْ يَطَلْڤُونِي، عْلَى خَاطَرْ مَا لْڤَاوْ حَتَّى شِي يَسْتَهَلْ الْمُوتْ.
19
وكِي مَا قَبْلُوشْ الْيَهُودْ، تْحَتَمْتْ نْطْلَبْ نَتْحَاكَمْ عَنْدْ قَيْصَرْ، بَصَحْ مَاشِي بَاشْ نَشْكِي عْلَى شَّعْبِي.
20
عْلَى هَادْ اَلسَّبَة أَلِي طْلَبْتْ نْشُوفْكُمْ ونَحْكِي مْعَكُمْ، رَانِي مَرْبُوطْ بْهَادْ الْسْلاَسَلْ عْلَى جَالْ رَجَاءْ إِسْرَائِيلْ".
21
وڤَالُوا لَهْ: "مَا وَصْلَتْنَا حَتَّى بْرِيَّة عْلِيكْ مَنْ الْيَهُودِيَّة، وحَتَّى وَاحَدْ مَنْ الْخُوتْ جَا وخَبَارْنَا ولاَ حْكَّى عْلِيكْ بْشِي مَاشِي مْلِيحْ.
22
بَصَحْ خِيرْ نَسَمْعُوا رَايَكْ، عْلَى خَاطَرْ رَانَا عَارْفِينْ بَلِي الْنَّاسْ رَاهِي تْقَاوَمْ هَادْ الْمَذْهَبْ فِي كُلْ مْكَانْ".
23
خَيْرُوا نْهَارْ يَتَلَڤَاوْ فِيهْ، وجَاوْ لْعَنْدَهْ لَدَارْ فِي شْحَالْ، وبْدَى يَشْرَحْ لْهُمْ ويَشْهَدْ بْمَلَكُوتْ الله، ويْقَانَعْهُمْ مَنْ شَرِيعَة مُوسَى والأَنْبِيَا بْأَمْرْ يَسُوعْ، مَنْ الْصْبَاحْ حَتَّى الْلِيلْ.
24
وقْتَنْعُوا وَاحْدِينْ بَالْشِي أَلِي ڤَالَهْ، ووَاحْدِينْ مَا أَمْنُوشْ.
25
رَوْحُوا وهُمَ مَاشِي مَتَفْقِينْ بِينَتْهُمْ، وكِي ڤَالْ بُولُس كَلْمَة وَاحْدَة: " بَصَحْ تْكَّمْ اَلرُّوحْ اَلْقُدُسْ جْدَادْنَا بَالْنَّبِي إِشْعِيَاءْ
26
أَلِي ڤَالْ: رُوحْ لْهَادْ الْشَّعْبْ وڤُالْ: تَسَمْعُوا ومَا تَفَهْمُوشْ، تْشُوفُوا ومَا تَعَقْلُوشْ.
27
عْلَى خَاطَرْ ڤَلْبْ هَادْ الْشَّعْبْ رَاهْ تَقْسَى، غَلْقُوا وَذْنِيهُمْ، وغَمْضُوا عِينِهُمْ. بَاشْ مَا يْشُوفُشْ بْعِينِهُمْ و مَا يَسَمْعُوشْ بْوَاذْنِيهُمْ ويَفَهْمُوا بَڤْلُوبْهُمْ ويَرْجْعُوا، وأَنَا نَشْفِيهُمْ.
28
و يْكُونْ مَعْرُوفْ عَنْدْكُمْ بَلِي سْلاَكْ الله رَاهْ وْصَلْ لَلْأمَمْ، وهُمَا يَسَمْعُولَهْ!".
29
وكِي ڤَالْ هَادْ الْشِي خَرْجُوا الْيَهُودْ مَنْ عَنْدَهْ وهُمَا يَتْجَادْلُوا بْعُنْفْ.
30
فَوَتْ بُولُسْ عَامِينْ كَامْلِينْ فِي دَارْ أَلِي كْرَاهْ لْرُوحَهْ. وكَانْ يْڤَابَلْ
ڤَاعْ أَلِي يَدَخْلُوا عَنْدَهْ،
31
يْبَشَرْ بْمَلَكُوتْ الله، ويْعَلَّمْ بْأَمْرْ اَلْرَّبْ يَسُوعْ الْمَسِيحْ بْجُرْأَة وبْلاَ مَانَعْ.