¹ تعليمات لتيموثاوس بَصَّحْ الْرُّوحْ رَاهْ يْبِيَّنْ بْصَرَاحَة بَلِّي كَايَنْ قُومْ رَايَحْ يَرْتَدُوا عْلَى الإِيمَانْ فَالْزْمَانْ الْتَالِي، يْتَبْعُوا أَرْوَاحْ مُضَلِّلَة و تَعَالِيمْ شْيْطَانِيَّة، ² تَدِيهُمْ مُوجَة الْتْنُوفِيقْ يَجِبُوهَا مُعَلِّمِينْ كَذَابِينْ عَنْدْهُمْ ضَمِيرْ مَكْوِي بَالْنَّارْ. ³ يْحَرْمُوا الْزْوَاجْ، و يْأَمْرُوا بَاشْ مَا يَاكْلُوشْ أَطْعِمَة خْلَقْهَا الله بَاشْ يَاكْلُوهَا الْمُؤْمِنِينْ أَلِّي عَارْفُوا الْحَقْ و شَاكْرِينْ. ⁴ عْلَى خَاطَرْ ڤَاعْ خَلِيقَة الله مْلِيحَة، و ماكَاشْ شِي مَمْنُوعْ إِذَا كْلاَهْ الإِنْسَانْ و هُوَ شَاكَرْ الله، ⁵ عْلَى خَاطَرْ يْوَلِي مْقَدَّسْ بْكَلِمَهْ الله و الْصْلاَةْ. ⁶ إِذَا فَهَمْتْ الْخُوتْ فِي هَادْ الْصْوَالَحْ، رَاكْ خَادِم صَألَحْ لَلْمَسِيحْ يَسُوعْ، تَتْغَذَى بَكْلاَمْ الإِيمَانْ و الْتَّعْلِيمْ الْصَّالَحْ أَلِّي تَبَعْتَهْ كِمَا يْلِيقْ. ⁷ و حْكَيَاتْ لَعْجَايَزْ الْقْدِيمَة، بَعَدْعْلِيهَا. دَرَبْ نَفْسَكْ فِي طْرِيڤ الْتَّقْوَى. ⁸ الْرِّيَاضَة الْبَدَنِيَّة تَنْفَعْ غِيرْ الْجَسَدْ. بَصَّحْ الْتَّقْوَى يَنْفَعْ لْكُلْ شِي، عْلَى خَاطَرْ عَنْدَهْ وَعْدْ لَلْحَيَاة دُورْكْ و الْحَيَاة أَلِّي مَمْبَعْدْ. ⁹ كَلِمَة الله صَادْقَة و تَسْتْهَلْ كُلْ وَادْ يَقْبَلْهَا. ¹⁰ عْلَى هَادْ الْشِي رَانَا نَعْيُوا و يْعَيْرُونَا، عْلَى خَاطَرْ حَطِينَا رَجَاءْنَا عْلَى الله الْحِي، أَلِّي هُوَ مْسَلَّكْ ڤَاعْ الْنَّاسْ، والْمُؤْمِنِينْ كْثَرْ. ¹¹ وَصِي بْهَادْ الْشِي و عَلَّمْ. ¹² مَا تْخَلِي حَتَّى وَاحَدْ يَسْتَهْزَى بصَغْرَكْ، بَصَّحْ كُنْ مْثَلْ لَلْمُومْنِينْ: فَالْكْلاَمْ، فَالْسِيرَة، فَالْمَحَبَّة، فَالْرُّوحْ، فَالإِيمَانْ، فَالْطَّهَارَة. ¹³ حَتَّى نْجِي و نَتْهَلَى فَالقْرَايَة و الْوَعْظْ و الْتَّعْلِيمْ. ¹⁴ مَا تَهْمَلْشْ الْمَوْهِبَة لِّي فِيكْ، أَلِّي تْمَدَّتْ لَكْ بَالْنُّبُوَّة و كِي حَطُوا عْلِيكْ الْشْيُوخْ الْيَدِينْ. ¹⁵ تْهَلَى بهَدَا. كُنْ فِيهْ، بَاشْ يْكُونْ الْتَفَوُقْ تَعَكْ بَايَنْ فِي كُلْ شِي. ¹⁶ مِيَّزْ رُوحَكْ ولَلْتَّعْلِيمْ و دَاوَمْ عْلِيهْ عْلَى خَاطَرْ إِذَا دَرْتْ هَكْدَا تْسَلَّكْ نَفْسَكْ و أَلِّي يَسَمْعُوكْ تَانِي.