الإصحاح 6
1
عْلاَهْ وَاحَدْ مَنْكُمْ يْشَارَعْ عَنْدْ الْحُكَامْ اَلْلِي مَاشِي مُوْمِنِينْ، ومَا يْرُوحْشْ عَنْدْ الْمُوْمِنِينْ.
2
وَاشْ مَا تْعَرْفُوشْ بَلِي الْمُوْمِنِينْ غَادِي يْحَكْمُو عْلَى الدَنْيَا، وَاشْ مَا تْقَدْرُوشْ تْحَكْمُو عْلَى الصْوَالَحْ اَلصْغَارْ؟.
3
وَاشْ مَا تْعَرْفُوشْ بَلِي حْنَا اَلْلِي غَادِي نْحَكْمُو عْلَى الْمَلاَيْكَة؟ فَمَاعْلَبَالَكْ صْوَالَحْ تَاعْ هَادْ اَلدَنْيَا.
4
كِي يْكُونْ بِينَاتْكُمْ شَرْعْ فَالصْوَالَحْ تَاعْ هَادْ اَلدَنْيَا ، وَاشْ غَادِي تْمَدُوهَا لَلْقُضَاةْ اَلْلِي مَا عَنْدْهُمْشْ قِيمَةْ عَنْدْ اَلْكَنِيسَة؟.
5
نْقُولْكُمْ هَادْ اَلشِي بَاشْ نْحَشَمْكُمْ! مَاكَانْشْ وَاحَدْ فِيكُمْ حَكِيمْ اَلْلِي يَقْدَرْ يَحْكَمْ بِينْ خَوْتَهْ؟.
6
أُوبَصَحْ أَخْ يْحَاكَمْ خُوهْ عَنْدْ اَلْحُكَامْ اَلْلِي مَاشِي مُوْمِنِينْ؟.
7
اَلْعِيبْ تَاعْكُمْ كْبِيرْ، عَنْدْكُمْ شَرْعْ مْعَ بَعْضِيَاتْكُمْ، عْلاَشْ مَا تْصَبْرُوشْ لَضُلْمْ؟ عْلاَشْ مَا تْخَلُوشْ مَنْ حَقْكُمْ؟.
8
بَصَحْ نْتُمْ تْضَلْمُو وُتَدِيوْ حَقْ لَخْرِينْ، خُوتْكُمْ الْمُوْمِنِينْ!
9
وَاشْ مَا تْعَرْفُوشْ بَلِي اَلضَالِمِينْ مَا يْوَرْثُوشْ مَمْلَكَة الله؟ مَا تْغَلْطُوشْ رْوَاحْكُمْ، رَاهْ لاَ لِيَزْنُو، ولاَ اَلْلِي يْعَبْدُو الْأَصْنَامْ، ولاَ اَلْلِي يْفَسْدُو، ولاَ الرْجَالْ لِيْفَسْدُو مْعَ بَعْضِيَاتْهُمْ.
10
ولاَ اَلْخِيَانْ، ولاَ اَلطَامْعِينْ، ولاَ اَلسَكْرَانِينْ، ولاَ اَلْلِي يْسَبُو، ولاَ اَلْخَطَافَا، حَتَى وَاحَدْ مَنْهُمْ مَاغَادِي يَوْرَثْ مَمْلَكَةْ الله.
11
هَكَا كَانُو شِي وَحْدِينْ مَنْكُمْ. بَصَحْ رَاكُمْ تْغَسَلْتُو وَتْقَدَسْتُو ، ووَلِيتُو مَقْبُولِينْ عَنْدْ الله بْإِسْمْ اَلرَبْ يَسُوعْ الْمَسِيحْ وبَالرُوحْ إِلَهْنَا.
12
"كُلْشِي حْلاَلْ لِي"، بَصَحْ مَاشِي كُلْشِي يَنْفَعْ." كُلْشِي حْلاَلْ لِي"، بَصَحْ مَا تْوَلِيشْ حَاجَة تَتْسَلَطْ فِيَا.
13
اَلْمَاكْلَة لَلْكَرْشْ والْكَرْشْ لَلْمَاكْلَةْ، والرَبْ يَهْلَكْ هَاذِي وهَادِيكْ، بَصَحْ الْجَسَدْ مَاشِي لَزْنَا، رَاهْ لَرَبْ والرَبْ لَلْجَسَدْ.
14
والله اَلْلِي خَلَ يَسُوعْ يْقُومْ مَنْ الْمُوتْ غَادِي حْنَا تَانِي يْخَلِينَا نْقُومْ بَالْقُوَة تَاعَهْ.
15
وَاشْ مَا تْعَرْفُوشْ بَلِي الْجَسَدْ تَاعْكُمْ طَرَفْ مَنْ الْمَسِيحْ؟ وَاشْ نَقْدَرْ نَدِي طَرَفْ مَنْ جَسَدْ الْمَسِيحْ ونْرَدْهُمْ طَرَفْ مَنْ جَسَدْ تَاعْ وَاحْدَة زَانِيَة؟ حَاشَا!.
16
وَاشْ مَا تْعَرْفُوشْ بَلِي اَلْلِي يْعَاشَرْ وَحْدَة زَانِيَةْ يْوَلِي هُوَ وَيَاهَا جَسَدْ وَاحَدْ؟ لِاَنَ الله يْقُولْ "غَادِي يْوَلِيوْ فَي زُوجْ جَسَدْ وَاحَدْ".
17
أمَا لِيَلْصَقْ مْعَ الرَبْ غَادِي يْوَلِي هُوَ وَيَاهْ رُوحْ وَاحَدْ.
18
اَهَرْبُوا مَنْ اَلزْنَا. كُلْ ذَنْبْ يْدِيرَهْ بْنَادَمْ رَاهْ مَا يَتْحَسَبْشْ عْلَى الْجَسَدْ تَاعَهْ، بَصَحْ اَلْلِي يَزْنِي يَذْنَبْ فْي حَقْ جَسَدْ.
19
وَاشْ مَا تْعَرْفُوشْ بَالْلِي اَلْجَسَدْ تَاعْكُمْ هِيَ اَلسَكْنَى تَاعْ اَلرُوحْ اَلْقُدُوسْ اَلْلِي فِيكُمْ وَاَلْلِي مَدَهْ لِيكُمْ الله . وَنْتُمْ مَاشِي تَاعْ رْوَاحْكُمْ .
20
رَبِي شْرَاكُمْ بَسُومَة غَالِيَةْ أَعْطِيوْ اَلْعَزْ لله بَالْجَسَدْ تَاعْكُمْ وارْوَاحْكُمْ.