الإصحاح 7
1
أمَا مَنْ صْوَالَحْ اَلْلِي كْتَبْتُو لِي عْلِيهَا. رَاهْ مْلِيحْ لَرَاجَلْ مَا يْمَسْ حَتَى شِي مْرَاة.
2
ولَكِنْ بَاشْ مَا يْكُونْشْ اَلزْنَا، خَاصْ كُلْ رَاجَلْ تْكُونْ عَنْدَهْ مْرَاتَهْ وكُلْ مْرَاة يْكُونْ عَنْدْهَا رَاجَلْهَا.
3
وخَاصْ لَرَاجَلْ يْمَدْ لَمْرَاة حَقْهَا فَالزْوَاجْ ، وخَاصْ لَلَمْرَاة تْمَدْ حَتَى هِيَ للَرَاجَلْ حَقَهْ فَالزْوَاجْ .
4
الَمْرَاة مَا عَنْدْهَاشْ اَلسُلْطَة عْلَى الْجَسَدْ تَاعْهَا لِأَنُو تَاعْ رَجَلْهَا. وَالرَاجَلْ حَتَى هُوَ مَا عَنْدُوشْ اَلسُلْطَة عْلَى الْجَسَدْ تَاعَهْ، هُوَ تَاعْ مَرْتَهْ.
5
وحَتَى وَاحَدْ مَا خَاصَهْ يَمْنَعْ لاَخَرْ مَنْ جَسَدْ تَاعَهْ مَنْ غِيرْ وِإلاَ كُنْتُو مَتَافْقِينْ عْلَى شِي وَقْتْ، بَاشْ يْكُونْ عَنْدْكُمْ وَقْتْ لَلصُومْ ولَلصْلاَةْ. ومَنْ بَعْدْ وَلِيوْ مْعَ بَعْضِيَاتْكُمْ بَاشْ مَا يْجَرَبْكُمْشْ اَلشِيطَانْ لِأَنَكُمْ مَا تْقَدْرُوشْ تَتْحَكْمُو فَي رْوَاحْكُمْ.
6
كِي نْقُولْكُمْ هَادَشِي مَاشِي بَاشْ نْسَيَفْ عْلِيكُمْ، ولَكِنْ بَاشْ نَنْصَحْكُمْ.
7
ورَانِي نَتْمَنَى يْكُونُوا ڤَاعْ اَلنَاسْ كِيمَا أَنَايَا. بَصَحْ كُلْ وَاحَدْ وَاشْ مَدَهْ الله مَنْ مَوْهِبَةْ، وَاحَدْ مَدَهْ حَاجَةْ ولاَخَرْ حَاجَةْ خْرَى.
8
بَصَحْ نْقُولْ لَلِي مَاشِي مْزَوْجِينْ وللْهَجَالاَتْ، رَاهْ خِيرْ لِيهُمْ يْقَعْدُو كِمَا أَنَايَا.
9
ولَكِنْ إِذَا مَا قَدْرُوشْ يَتْحَكْمُو فَي رْوَاحْهُمْ مْلِيحْ لِيهُمْ يَتْزَوْجُو، لِأَنُو اَلزْوَاجْ خِيرْ مَنْ لْحَرْقَة تَاعْ اَلشَهْوَةْ.
10
أمَا اَلْلِي مْزَوْجِينْ، رَانِي نْوَصِيهُمْ مَاشِي أَنَا بَصَحْ اَلرَبْ، بَاشْ مَا تْفَارَقْشْ الَمْرَاة مْعَ رَاجَلْهَا.
11
بَصَحْ إِلاَ تْفَارْقَتْ مْعَاهْ، خَاصْهَا تَقْعَدْ بْلاَ زْوَاجْ ولاَ تَتْصَالَحْ مْعَ رَاجَلْهَا، والرَاجَلْ مَا خَصَاهْشْ يَتْفَارَقْ عْلَى مَرْتَهْ.
12
واللَخْرِينْ، رَاهْ اَنَا اَلْلِي نْقُولْ لِيهُمْ مَاشِي اَلرَبْ :إِلاَ شِي خُو مُوْمِنْ عَنْدَهْ مْرَاة مَاشِي مُوْمِنَة وُبْغَاتْ تَقْعَدْ عَايْشَةْ مْعَاهْ، مَا خَاصَهْشْ يَتْفَارَقْ عْلِيهَا.
13
وِإلاَ شِي أُخْتْ عَنْدْهَا رَاجَلْهَا مَاشِي مُوْمِنْ وبْغَا يَقْعَدْ يْعِيشْ مْعَاهَا، مَا خَصَاهْشْ تَتْفَارَقْ عْلِيهْ.
14
الرَاجَلْ اَلْلِي مَاشِي مُوْمِنْ يَتْقَدَسْ بَمْرَاتَهْ، والَمْرَاة اَلْلِي مَاشِي مُوْمِنَة تَتْقَدَسْ بْرَاجَلْهَا، وِإلَا رَاهْ وْلاَدْكُمْ مَنْجُوسِينْ، ولَكِنْ دُرْوَكْ رَاهُمْ مْقَدْسِينْ عَنْدْ الله.
15
ولَكِنْ إلاَ هَادَاكْ اَلْلِي مَاشِي مُوْمِنْ هُوَ اَلْلِي طَلَقْ ، يَطْلَقْ ، الأَخْ وَلاَ الْأُخْتْ الْمُوْمِنَة مَاشِي لاَزَمْ عْلِيهُمْ يَبْقَاوْ فْهَادْ الزْوَاجْ . الله عَيَطْ لِيكُمْ بَاشْ تْعِيشُو فَإِلَهْنَا.
16
كِيفَاشْ تَعْرَفْ الَمْرَاة بَلِي رَاجَلَكْ يَسْلَكْ عْلَى يَدِيكْ؟ وِلاَ كِيفَاشْ يَعْرَفْ الَرَاجَلْ بَلِي مْرَاتَكْ تَسْلَكْ عْلَى يَدِيكْ؟.
17
خَاصْ كُلْ وَاحَدْ يْعِيشْ كِيمَا اَعْطَاهْ اَلرَبْ وكِمَا أَخْتَارَهْ الله، وهَكَا نَمَرْهُمْ فِي ٍڤَاعْ الْكَنَائِسْ.
18
اَلْلِي دْعَاهْ الله وهُوَ مْخَتَنْ مَا خَصَاهْشْ يْوَلِي كِيمَا مَاشِي مْخَتَنْ، والْلِي أَخْتَارْ الله مَاشِي مْخَتَنْ، مَا خَصُوشْ يَتْخَتَنْ.
19
مْخَتْنِينْ وِلاَ مَاشِي مْخَتْنِينْ مَاشِي مُهِمْ، اَلْلِي مُهِمْ نْدِيرْ وَاشْ يْوَصِينَا الله.
20
خَاصْ كُلْ وَاحَدْ يَقْعَدْ كِيمَا اخْتَارَهْ الله.
21
اَلْلِي اخْتَارَهْ الله كَانْ عَبْدْ مَايْهَمْشْ. ولَكِنْ إِذَ قْدَرْتْ تْوَلِي حُرْ مَا تْوَدَرْشْ اَلْفُرْصَة.
22
اَلْلِي اخْتَارَهْ اَلرَبْ وهُوَ عَبْدْ يْوَلِي حُرْ فَي الرَبْ، وهَكَا حَتَى اَلْلِي كَانْ حُرْ واخْتَارَهْ اَلرَبْ يْوَلِي عَبْدْ لَلْمَسِيحْ.
23
الله شْرَاكُمْ وخَلَصْ عْلِيكُمْ، مَا لاَزَمْشْ تْوَلُوا عَبِيدْ لَلنَاسْ.
24
خَاصْ كُلْ وَاحَدْ فِيكُمْ يَا خُوتِي يَقْعَدْ مَرْسِي قُدَامْ الله كِيمَا اخْتَارَهْ مَنْ قْبَلْ.
25
لْلِي يْخَصْ الْعَزِبَاتْ، مَا عَنْدِيشْ وْصِيَة خَاصَةْ بِيهُمْ مَنْ عَنْدْ اَلرَبْ، ولَكِنْ نَقْدَرْ نْمَدْ اَلرَايْ تَاعِي وتْقَدْرُو تْأَمْنُونِي عْلَى حْسَابْ اَلرَحْمَة لِعْطَانِي اَلرَبْ.
26
نْخَمَمْ بَلِي بَسْبَابْ اَلْوَقْتْ الصْعِيبْ اَلْلِي رَانَا فِيهْ، خِيرْ لَلْوَاحَدْ يَقْعُدْ كِيمَا هُوَ.
27
إِذَ كُنْتْ مْزَوَجْ بْلاَمَا تْقَلَبْ عْلَى الطْلاَقْ، وِإذَ كُنْتْ مَاشِي مْزَوَجْ بْلاَمَا تْقَلَبْ تَتْزَوَجْ.
28
ولَكِنْ إِذَ تْزَوَجْتْ مَاشِي مُذْنِبْ، والْعَازْبَة إذَا تْزَوْجَتْ مَارَاهِيشْ ذَانْبَة، ولَكِنْ يَلْقَاوْ مَشَاكِلْ فَي حْيَاتْهُمْ، وَانَا بْغِيتْ نْبَعَدْ هَادْ الْمَشَاكَلْ عْلِيهُمْ.
29
ونْقُولْ لِيكُمْ يَا الْخُوتْ مَا بْقَاشْ الْوَقْتْ، خَاصْ الَرْجَالْ اَلْلِي مْزَوْجِينْ يْكُونُوا كِيمَا مَاشِي مْزَوْجِينْ،
30
اَلْلِي يَبْكِيوْ كِيمَا اَلْلِي مَايَبْكِوْشْ، واَلْلِي يْفَرْحُو كِيمَا اَلْلِي مَايْفَرْحُوشْ، واَلْلِي يَشْرِيوْ كِيمَا لْلِي مَا يَمْلَكْ.
31
والْلِي يْخَدْمُو بَاشْ يَرَبْحُو هَادْ اَلدَنْيَا يْكُونْ كِيمَا اَلْلِي مَايْرَبْحُوشْ لِأَنُو هَادْ اَلدَنْيَا مَا تْدُومْشْ.
32
مَا بْغِيتْكُمْشْ تْرَفْدُو اَلْهَمْ، اَلْلِي مَاشِي مْزَوَجْ يَطْهَلَى فَي صْوَالَحْ تَاعْ اَلرَبْ وكِيفَاشْ يَرْضِي اَلرَبْ.
33
ولَكِنْ اَلْلِي مْزَوَجْ يَخَمَمْ فَي صْوَالَحْ تَاعْ اَلدَنْيَا وكِيفَاشْ يَرْضِي مْرَاتَهْ.
34
وهَاكَ حَتَى الَمْرَاة اَلْلِي مَاشِي مْزَوْجَةْ والْعَازْبَة تْخَمَمْ فَي صْوَالَحْ تَاعْ اَلرَبْ وكِيفَاشْ تْكُونْ مْقَدْسَةْ فَي الْجَسَدْ والرُوحْ، ولَكِنْ اَلْلِي مْزَوْجَة تْخَمَمْ فَي صْوَالَحْ تَاعْ اَلدَنْيَا وكِيفَاشْ تَرْضَي رَاجَلْهَا.
35
نْقُولْكُمْ هَادْ اَلشِي لِمَصْلَحَتْكُمْ، مَاشِي بَاشْ تْكُونْ بْلاَ فَايْدَةْ، ولَكِنْ بَاشْ تْخَدْمُو اَلرَبْ بْكُلْ حُرِيَةْ ومَنْ كُلْ قَلْبْكُمْ.
36
إذَا كَانْ وَاحَدْ يْشُوفْ بَلِي مَاهُوشْ قَادَرْ يَتْحَكَمْ فِي رُوحَهْ مْعَ خْطِيبْتَهْ، وُبَلِي لاَزَمْ يَتْزَوْجُو خَاصَهْ يْدِيرْ كِيمَا بْغَا ويَتْزَوْجُو، رَاهْ مَايَذْنَبْشْ.
37
ولَكِنْ اَلْلِي يْخَمَمْ فْي قَلْبَهْ ومَاشِي مَفْرُوضْ عْلِيهْ ويَقْدَرْ يَتْحَكَمْ فْي رُوحَهْ وقَرَرْ مَا يَتْزَوَجْشْ رَاهْ يْدِيرْ مْزِيَة.
38
اَلْلِي تْزَوَجْ مْلِيحْ، والْلِي مَا يَتْزَوَجْشْ خِيرْلَهْ بَزَافْ.
39
الَمْرَاة يَجْمَعْهَا اَلشَرْعْ بِرَاجَلْهَا مَادَامْ حَيْ، ولَكِنْ إذَا تْوَفَى تْوَلِي حُرَة بَاشْ تَتْزَوَجْ بَالْلِي بْغَاتْ مَنْ بِينْ الْمُوْمِنِينْ بَالرَبْ.
40
ولَكِنْ فْي رَايِ أَنَا، تَتْبَارَكْ كْثَرْ كِي تَقْعَدْ هَكَا، ونْضَنْ بَلِ حَتَى أَنَا عَنْدِي رُوحْ الله.