¹ Pablu, ti apóstol xti Cristu Jesús casi ma gudixe Diuxi ne Timoteu bichinú, ² ca ni runi cre ca', ne ca bichinu ni que rixale' xti Cristu, ca ni nuu Colosas. Gaca gracia ne laatu ne guenda ratadxi xti Diuxi bixozenú. ³ Laadu cudídu xquixe Diuxi, bixoze xpixua'nanú Jesucristu, ne ira dxi rininedu Diuxi pur laatu. ⁴ Laadu ma bicádiagadu de enda runi cre xtitu lu Jesucristu ne de enda ranaxii ni nápatu para ca ni ma bireechú xti diuxi. ⁵ Laatu nápatu enda ranaxii di' purti nanatu xi cabezadxidxi laatu ne ma biree chu para laatu iba'. Laatu ma bicaadiagatu de ni cabezadxidxi laatu di' jma atra lu didxa ni dxandi', xti evangeliu', ⁶ ni laa ma beeda ra nuutu. Evangeliu di' cudini cuananaxi, ne caroobani interu naca guidxilayú. Laaca ndica cayunini lugiatu, de dxi laatu bicaadiagatuni' ne bisiiditu de guendanachahui xti Diuxi lu ni dxandi'. ⁷ Ndi nga evangeliu casi laatu biziiditu de Epafras, ni nadxiidu niruni nee laadu dxiiña', ninaca tobi de ni que rixale', ni runi xiiña Cristu ni rini' pur laadú. ⁸ Epafras ma gudxi laadu de guendaranaxii xti' lu Espíritu. ⁹ Ne pur guendaranaxii di', de dxi bicádiagadu ndi' que huabesadxidu de guinabadu pur laatu. Laadu de jma atrá sedanabadu que laatu guidxátu de endabiaani de ni racaládxibe, lu de guira guendariú xpiaani, ne guendariene guendaladxidoo. ¹⁰ Laadu de jma atra sedanabadu ti ma ganda laatu sátu xnéza lú Señor casi pe riuuladxibé. Laadu de jma atra sedanabadu que laatu gudiitu cuananáxi lu gira dxiiña sicarú, ne laatu guiniisitu lu guendariene xti Diuxi. ¹¹ Laadu guninedu Diuxi ti zacá laatu guidxátu xtipa lú ni laatu nanatu gúnitu casi ca gudi'xe xtipa xquendanandxoo be, ne lu de guira' gusuhua dxichitu ne que guireetu gana. ¹² Laadu ma gunabadu que laatu nayeche pe' guditu xquixe bixozenú, ni laa ma bi'ni laatu binni ma nána guindaa ne gudii ni racacaber ca ni runi cre lu biaani'. ¹³ Laabe ma bilá be laanu de ra runi mandar guendanacahui, ne ma bizeendabe laanu ra runi mandar xiiñibe ni nadxiibe. ¹⁴ Pur xiiñibe zanda guilánu, ne guixá xguendaruchee nu'. ¹⁵ Diuxi ni que ridúyanu nacapebe casica xiiñibe ni ridúyanu. laabe nga ba'du' lugola de guira de ni ma guya'. ¹⁶ Purti pur laabe nga guyá de iraxixe ni ma nuu, ca ni nuu iba' ne ca ni nuu guidxilayú, ca ni ridúyanu ne ca ni que ridúyanu. Gacaní ni ribi lu bangu ni risáca, xaique guidxi ro', xaique guidxi huiini, ca dxu', ne ni napa xixa guénda ndani guidxi, de guiraxixe ca ndi' pur laabe gúcacani ne para laabe. ¹⁷ Laabe maca nacabe ante chá guira ndi', ne pur laabe de guiraxixe ndi' nazenácani tobisí. ¹⁸ Ne Laabe nga ique xti cuerpu, yu'du'.Laabe nácabe ni bisulú ne ni niiru biása de lade ca ni ma gúti, nga runi Laabe nga niiru de lade guiraxixe ca ndi'. ¹⁹ Purti Diuxi biuládxibe que guira ni ma bindúxebe iquiiñe guibáni en Laabe, ²⁰ ne pur xiiñibe ma ganda guibigueta ra nu'be guiraxixe ni ma guya'. Diuxi nga bi'ni guenda ratadxí ladxidoo, ni zeeda pur rini ni bixhii lu cruz xtíbe. Diuxi bi'nibe guibigueta ra nu'be guiraxixe ni ma guya', gacani ni nuu ndaani guidxilayú o ca ni nuu iba'. ²¹ Dxiqué, ngaca laatu, gucatu binni ni que ñunibiaa Diuxi laa, ne gucatu binni guacananalaxi Diuxi lu guendabiaaní ne de ca guendanadxaba bi'nitu. ²² Peru yanna, laabe ma gucuaabe laatu xti tiru pur xcuerpubé de beela lu xquendaguitibe. Laabe bínibe ndi' ti ma gánda guchíñabe laatu nandxo', sin donda, ne sin gapatu reclamu ra nu'bé, ²³ pa laatu zátu lu guenda runi cre di', guianadxítu, ne gusuhuadxichitu, sinca guireechútu de ni laatu cabézatu gugaandatu ndaani Evangeliu di', ni laatu bicaadiagatu. Ndi Nga Evangeliu' ni ma bidiicabe gána guiraxixe binni ni guya' xaguete de iba'. Ndi nga Evangeliu ni pur laa,naa Pablu, guca tobi ni runi ni xiiñabe ²⁴ Yanna naa rieche' lu ca guendananá xtine' pur laatu, ne rusaa lu bela lade ni riaadxá de ca guendanana xti Cristu, ndi nga galan rúne' pur xcuerpu be', ni náca yu'du'. ²⁵ De yu'du' di nga naa nacá tobi de ca ni rusuuba xtiidxa xpixuaana', casi ca gudíxe Diuxi, ni naa ma hucuaa para laatu, ti gusaa xtiidxa Diuxi. ²⁶ Ndi nga dxandi' ni nagachi, ni bicaachicabe pur íza ni gudiidi lu naa xiñi xiñi ca bixózenu. Peru yanna ndi' ma zanda gu'ya' ca ni runi cre laabe. ²⁷ Ne para laacabe nga Diuxi biniládxi gánacabe pa bia' risáca guendanandxo' xti dxandi ga'chi lade ca ni cadi Judíu. Ndi nga que Cristu nabani lugiátu, ne ganadxichitu que laca zacaatu de lu guendanandxo ni nexe gueeda. ²⁸ Ndi nga Laabe, de ni laa cananidu. Laadu cusenda tidxidu iraxixe bini ne xtale guendabiaani, ti zacá laadu guchiñadu guira binni ma binisicha'hui ca' en Cristu. ²⁹ Pur ndi naa rune dxiiña ne ruchaya xtipa casi ca ná xtipabe, ni cayuni dxiiña luguiaya lu xtipa ro'.