¹ Ti naaa racaladxe' gannatu pabia' naro'ba' nga guendarudxiilú huadide' runi laatu ne runi ca ni nuu Laodicea ne runi xtaleru' ni ca'rudi' guuya ca naa. ² Naa rune' guirá' ca dxiiñari' ti zaca chu' ladxido'tu gana para gueeda tu ne guenda nadxhii lisaa ra nuu guirá' guendarisaca xti' guendariene chaaui, lu guendarunibia' dxandi ni naga'chi' xti' Diuxi, ni naca Cristu. ³ Ra nuube nga ga'chi' guiraxixe guenda nu xpiani ne guendarunibia' Diuxi. ⁴ Cayabe' ndi' laatu ti zaca guiruti' gueedachite laatu ne gucuudxi laatu ne diidxa' naxhi. ⁵ Ti neca que guinnedia' ra nuutu, naa nuaania' laatu lu Espiritu. Rieche' ladxidua' cayuuya' cayunitu xneza ne nadipa' guenda runi cre' napatu Cristu. ⁶ Ne casica laatu gucuaatu Cristu Señor ndani ladxido'tu, zaqueca lasá ne laabe tobisi. ⁷ Laguzuhuaa dxiichi ra nuube, laguiniisi ra nuube, laguiana lu fe casica ma biziiditu ne lagudi xtale xquixhe ⁸ Lagataná ne laguuya' guiruti' guinaase laatu ne guintiicasi guendabiaani' biree ndaani' ique binni ne ni cadi dxandi', casi ca ma bia' binni guidxilayu casi raca ndaani' guidxilayú, ne cadi casi ná Cristu. ⁹ Ti laabe nga nabani be lu guirá ni naca diuxi. ¹⁰ Ne laatu ma guiza'tu ra nacanu tobi ne laabe. Laabe nacabe xa ique xti' guira ni nandxó' ne raca guirá ni naa be. ¹¹ Ne zaqueca laatu gucatu tobisi ne laabe ne ti seña ni cadi binni guidxilayúdi bi'ni' ra bigá ti ndaa de, laga lu seña xti Cristu. ¹² Laatu bigachinetu laabe ra biuunisabe, ne lúbe biasatu lade ca gue'tu' pur guenda runi cre' napatu lú guendanandxo' xti' diuxi, ni gundisa laabe lade ca gue'tu'. ¹³ Dxi laatu ma gue'tu' nacatu lu ca guendaruchee xtitu ne lu ra que nigá ti ndaa de laatu la? laabe bisibanibe laatu ne bixhiabe guiraxixe donda xtitu. ¹⁴ Bixhiabe ca ni cá lu gui'chi' nuzaabitu ne ca donda bidxiibacabe luguiatu. Bituubabecani ne bicaabecani lu yaga cruz. ¹⁵ Laabe gulebe guirá cami ne bica be ni lu cruz. Laabe bichia be ca xa ique ni nuuque, bisituibelúca neza lu xtale binni, ne laabe bire be nandisa nábe luguia ca pur yaga cruz que'. ¹⁶ Ngue runi la? cadi gudiiditu gudxiiba guiruti' donda iquetu runi ca ni rótu ne ni re'tu, runi ca dxi ra raca saa, ca dxi ra riree beeuhuiini' o ca dxi guendarizila'dxi'. ¹⁷ Guiráxixe ca ndi' nacasica bandá' xti' guirá ni zeeda, huaxa ni jmá risaca nga Cristu. ¹⁸ Cadi gudiiditu gueeda tuuxa binni ni racaladxi guenda nachaui ne guenda rusisaca xti ca angel cueechu laatu de ni ma nexhe' guicaatu. Binnica la? riu lu ca ni ma guuya ne ridxabi lu ca guenda rini' ique casi binni guidxilayu ¹⁹ Laabe la? cadi naazedibe ique. Dede ique ti cuerpu pur ca ra guiidi dxita ne ra guiidi bela ne dxita nga rica ni xtipa ne riana guiidi; ndi riniisi ne guenda riniisi rudii Diuxi. ²⁰ Ne pa laatu ma gutinetu Cristu lu ca ni raca ndaani' guidxilayú, ¿xi ñee ndi' nabanirutu sicasi ñaca cucaa cabe laatu guibanitu ndaani' guidxilayú ya': ²¹ cadi guicaadiou' nga, cadi godiou' nga, cadi canadiou' nga? ²² Guiraxixe ni raca ndaani' guidxilayúdi ma nexe giu'dxucani. casi ca ma bisaana ne ma bisiidi ca binni guidxilayu' ²³ Guiraxixe ca ni ma guta di la? rului' napa cani guenda nuxpiani xti ti religion ni laaca laa biini laa, ne guenda nachaui, ne guenda runi na cuerpu. Peru laacani que capa cani nin ti guendarisaca lugia ni rutidiladxi binni guidxilayú.