¹ Yanna, Festo guyú be guidxi, ne gudidi si chonna dxi, guye be de Cesarea ne yendabe Jerusalén. ² Sacerdote góla ne ca Judíu ni jma risáca bedanee cabe ca donda nuu lugia' Pablu, ne naduxu pe' gunineca laabe, ³ Ne laacabe gunaba cabe laabe ti favor ni suguu Pablu lu ti naxoo, Festo zabidxibe guedanee cabe Pablu Jerusalén ti ma ganda guuti cabe laabe lu neza. ⁴ Peru Festo bicaabi laacabe que Pablu naca ti ni daguyoo Cesarea, ne laapebe ma yaca guibiguetabe raqué. ⁵ "Nga runi, ca ni gánda," nábe laabe: "caquiiñe' che ca' raque ne laadú. Pa nuu xixa nadiiñe ne hombre ca, laatu naquiiñe' gudxiibatu donda lugiábe. ⁶ Festo que ñaana jma de xono o chii dxi, ne ora que zébe Cesarea, ne xti dxi que, guríbe lu bangu' ra ru'ya cabe pa xneza cayuni tobi, ne bicaa be laaca guedaneca Pablu. ⁷ Ora bedandabe, ca Judíu xti Jerusalén bizuhua ca' gaxa, ne laacabe bichiña cabe xtale donda ro' ni que sanda gului' cabe pa dxandi'. ⁸ Pablu guni' pur laa ne ná: " Naa que huayune nin ti ni nadxaba' ni udxii deche ca diidxa ni ma nexe' xti ca Judíu o ni udxii deche yu'du' o ni udxii deche César." ⁹ Peru Festo gucala'dxi ñeche ne ca Judíu laa, ne ora que laabe bicabi be Pablu ne guniibe: "¿ Racala'dxu quibalu' Jerusalén ti zacá naa guyube donda luguia lu' de ca ndi' raqué la?" ¹⁰ Ne ná Pablu: " Naa zuhuaa neza lú bangu' ra ru'ya cabe pa xneza cayuni tobi xti César ra naquiiñe' guyubi cabe xtonda'. Naa nin ti judiu que huayune nin ti ni nadxaba' laa, zacá casi ca lii nanadxichi lu'. ¹¹ Ne pa guayune ni cadi bia'si ne pa guayune xixa pur ni naquiiñe' gate', naa que zucaa ñee yú gate'. Peru pa gaxti' náca ni canítu de naa, guiruti' zanda gudii naa lu ná cabe. César nga gu'ya' pur Naa." ¹² Gudidi si guni' ne Cesar ca ni racané laa, bicabi be: " Cesar nga gu'ya' pur lii; zielu' ra nuu César." ¹³ Yanna, udidisi chupa, chona dxí, xaique guidxi Agripa ne Berenice yenda ca' Cesarea para chizaca lu' ca Festo. ¹⁴ Gudidisi guyúbe raque xtale dxí, Festo bedanebe ni cazaaca ne Pablo lú Xaique qué; ne guníbe: "Ti miati' biaanabe rari' pur Felix casi ti ni daguyoo. ¹⁵ Ora naa guyuaa Jerusalén, ca xaique xti ca sacerdote ne ca judíu gola bedanee cabe queja lugia hombre di', ne gunabacabe nusaba donda lugiábe. ¹⁶ Naa bicabé laacabe deque cadi zaqué biaa ca Romanu gúni, guiruti' rudiica' sin que guzuhuaa lú ca ni cudxiiba donda que lugia', ne ganda guyubi gaxa ca donda que íque. ¹⁷ Nga runi la', ora laacabe bedandácabe rari', naa que nibéza, xti dxí queca na gurie lu bangu' ra ruuyacabe pa xneza cayuni tobi, ne gunie guzu'bacabe xtiidxa' de guedanecabe hombre qué. ¹⁸ Ora ca ni cudxiiba donda que íquebe biásaca ne cugú cabe xjquejabe, guni' xpiaane' nin tobi de ca donda ni bichiñacabe lugiabe cadi tan naróbacanii. ¹⁹ Ne luxcar nge la', laacabe que ñenelizaacabe ne laabe de ni laabe canausiidibe ne de ti tal Jesús ni gúti' ne de ni Pablu canaguinii deque nabánii. ²⁰ Que ñana pia' xi ñune' para guyube gánna' de ndi', nge runi gunabadiidxa laabe pa zacaládxibe chebe Jerusalén ne guyubicabe pa napabe donda de ca ndi' raqué. ²¹ Peru ora Pablu gunába guidaguyoo dede dxí xaique xti ira guidxi roo guini' xi gacábe, naa bisendagune guieguyoobe de dxi naa guseenda laabe ra nuu César." ²² Agripa gudxibe Festo: "Ngaca naa racaladxe gucaadiaga hombre ca'." "Ixii," ne guni' Festo: "Lii sucaadiágu laabe." ²³ Ne saqué xti dxí qué, Agripa ne Berenice yendáca' zuchahuica'; laacabe guyúcabe ndani yoo ro' ne ca xaique xti ca hua'chu' ne ca hombre ni jma risaca ni seedaca de ndani guidxi. Ne de ora Festo huláqui xtiidxa, Pablu bedanecabe laa ra nuu cabé. ²⁴ Festo guni': "xaique ro' Agripa, ne giraxixe hombre ni nuu rari ne laanu, laatu cayúyatu hombre di'; de ira ni bidagulizaa de ca Judíu yegu'yacabe naa ndaani Jerusalén ne zaqueca rari', ne laacabe bicaacabe naa rídxi deque labe que naquiiñe' ibánirube jma. ²⁵ Peru naa gúna' deque laabe que ñunibe gaxti para ñuu xi pur laabe ñatibe. Peru purti nábe chebe neza lú xaique xti ca guidxi ro', naa guliee' guseendalaabe ra nuu. ²⁶ Peru que gápadia' gaxti ni hucaa ra nuu xaique xti ca guidxi ro'. Ndi runi, naa ma bedaniá laabe ra nuutu, ra nuu pioú, xaique ro' Agripa, ti ma naa gápa xiixa jma para gucaa de ni cazaaca di'. ²⁷ Purti cadi ruuya biaasi guseenda tobi ni daguyoo ne zaqueca que cuaque' xi pur caguiiba donda íquebe.