¹ Profeta ni cadi dxandí beeda ca ndani guidxi, maistru ni cadi dxandí, zeeda ca ra nuu tu. Laacabe' naga'chi Zeda gusiidi cabe ma adxe' para guxhia cabe, nee laacabe zaní cabe que runibia' cabe Maistru ni guzii' laacabe. laacabe cayedane cabe naguenda ti guenda Hrinitilú para laacabe. ² Xtale sinanda guenda que iquiñe xti cabe, ne gúni laacabe zagu di binni neza ni dxandí. ³ Ne guenda racaladxi gapa xtale bidxichi laacabe zabee cabe bidxichi de laatu ne didxa hrusiguii'. Guenda riabaná xti cabe que zandaa gueeda; guenda hrinitilú xticabe que hrasi. ⁴ Diuxhi que nuzianda donda xti ca angel ni bichee ca. Laga nga la? bizeenda be laaca xhaguete ra nú gabia' para guzaana be laaca liibi ca xhaguete ra nacahui dede dxi ganda dxi guiaba na' ca. ⁵ Ninca que nizianda be donda xti binni bibaani dxiqué, laga nga la? gupa be Noe, tobi hombre ni naca ni rui' de ni jneza, laa ne xcadxe binni, dxi laabe bedaneebe ti guenda hrilaahua ndani guidxilayu' xti ca ni que ruzuuba ca didxa. ⁶ Diuxhi Laaca bisihuiinibe Sodoma ne Gomorra de bizaana be la nizi dee, ne bizabaná be laaca para guinitilú ca, casi ti ejemplu de ni sazaaca ca ni que ruzuuba didxa. ⁷ Peru Lot ni runi jneza, ni guyu' xtale guenda nagundu pur jmodo nabani ca binni ni que gapa ca ley, lu ca guenda que iquiiñe , Diuxhi bilá laabe. ⁸ Pue hombre ni biini jneza ca, bibaabi be ti dxi ne xti dxi laade ca, cutiidi be yuuba xquenda be ni runi jneza pur guira ni cayuya be ne cayunadiaga be. ⁹ Xhaiquenu nana xhi jmodo gulá ca hombre nachaui de lu ca gueda nagana, ne xhi jmodo guzaana be ca ni que runi jneza para guiabaná ca dxi ganda Juiciu. ¹⁰ Ndi nacani jmá ru pe para ca ni zizaaru ca lu ni cadi jneza ni racaladxi guenda binni guidxilayu xti ca, ne que rulabi ca guenda runi mandar. Laaca que hrunilú ca ne que hruna ca. Laaca que ridxibi ca' cú'dí ca ca ni nandxo'. ¹¹ Ca Angel napa ca jmá naróba xtipa ne guenda nandxo', peru laaca que redanédi ca juiciu de guenda rigu dí luguia cabe ra lú xhaiquenu. ¹² Peru ca Maní nada'gu xpiani ca di' guya'ca para guinaaze cabe laaca ne gunitilú cabe laaca. ¹³ Laacabe sacaa cabe ni guiaxha pur cani nadxaba ni biini cabe. Laacabe rinnixpiaani cabe de que ca ni que iquiiñe neca lidxi. laacabe naca cabe ni namucu ne napa cabe guenda ruche'. Laacabe riuladxi cabe ca ni riuli'si sicaru laga cayeche ne cabe laatu. ¹⁴ ndani guie' lú cabe puru gunaa' ni riu ne ni cadi xheela si dxa'. Que ridxa cabe de guenda ruche'. Gúni laacabe ca guenda ni cadi zuhua chaui runi ni nadxaba, ne ladxido' cabe ma biziidi gacaladxi gapa xtale. Naca cabe xhiiñi di'! ¹⁵ Laacabe ma bizaana cabe neza chahui. Bire'chu cabe ne sinanda cabe neza xti Balam, xhiiñi Beor, ni gunaxhii quixhe cabe laa pur ni cadi jneza. ¹⁶ Peru Gudindené cabe laa pur ca guenda ruche' xti. Ti burru ni que rini' bizulu guni' ne ridxi xti binni ne bicueza guenda huati xti profeta que'. ¹⁷ Ca hombre di' naca ca casi ra rida' nisa ni que gapa nisa. Naca cabe casi ti zaa ni ti bii yo'xho zine'. Naro'ba guelacahui caya'apa para laacabe . ¹⁸ Laacabe rini' huatisi' cabe ne guenda naro', laacabe. Runi cabe de que xcadxi binni guiaba lu ca guenda ruche pur ca ni que iquiiñe runicabe. Laacabe runi cabe guche' ca binni ni racaladxi ca guxhoñe ca de lade ca ni ruche' ra bibaani ca. ¹⁹ rabi cabe laaca saca ca' guenda rilá, peru laape cabe liibi cabe lu ni cadi jneza, ti purtu tobi hombre liibi lu na intiisi ni runibe ni ná. ²⁰ Tutiica ni guxhoñe de lu ca guenda que iquiiñe xti guidxlayu pur guenda runibia' de xhaiquennu ne ni rulá laanu jesucristu, ne oracá ribigueta lu ca guenda que iquiiñe cá xti tiru. ²¹ Jmá jneza ñaca para lacabe que ñunibia' cabe neza ni nachaui, que ñunibia' cabe laa ne guixhale cabe de lu ca guenda runi mandar ni nandxo' ni gucua cabe. ²² Didxagola di' dxandi ni para laacabe: "Bi'cu ribigueta laaca ra bidxi'ba. Bihui ni ma biha'ri ribigueta ndani beñe."