¹ Simón Pedro, ni runi xhiiña ne naca apóstol xti Jesucristu, cani ma gucuá ca guenda runi cre ni guizaa sicarú di casi laadu ma gucuádu, guenda runi cre ra cayuni Diuxi xtinu xneza ne Jesucristu ni bilá laanu. ² Guendanandxó' ne guendaratadxii ladxidó' guidale para laatu bia guendabiani xti Diuxi ne xti Jesús Señor xtinu. ³ Guiraa xixé ni nandxó' ni zaa de Diuxi para guendanabani ne para gusisacanu laabe guacuanu cani pur guendabiani xtibe, Laabe guridxi be laanu ti guluí be laanu genda nandxó' ne guenda na'chahui xtibe. ⁴ De ca ndi la?, Laabe bidii be laanu ca didxa sicarú ne na rooba xtibe, ti zacá ganda laatu chuutu ndani guidxilayú xtibe, laga que laatu guiree tu de lu guendanadxaba ni rinanda binni ndaani guidxilayú di. ⁵ Nga runi, laguni xtipa ti ganda gunitu ni xneza pur gendarunicre xtitu, ne pur guenda runi xneza xtitu la? guendarunibiá. ⁶ Ne pur guenda runibiá la? la gucueza laatu, ne ra gucueza tu laatu la? cadi guidxagatu, ne ra cadi guidxagatu la? la guni ni na Diuxi. ⁷ Ne raguni tu ni na Diuxi la? la ganaxhí bichi, ne ra ganaxhí bichitu la? laganaxhí sá. ⁸ Pa napa tu ca ndi ne guiroba cani la? que zaca di tu casi tuxa ni pur gana si runibiá Señor Jesucristu. ⁹ Peru tu lá que gapa ca ndi la? ni nuu si gaxha ruuya; que ruuya. Ma bisiaanda pa biá ca donda yoxho xti. ¹⁰ Nga runi, biche ne bizana ca, laguni ni jmá biasi ti usihuinni tu dxandí uní' ne Diuxi laatu ne ulí' laatu. Pa laatu guni tu ca ndi la?, que ziaba di tu. ¹¹ Ne sicarí la?, ziu'tu ne ti guendanayeche ndaani ra runi mandar ni que zaluxe xti Diuxi ne Jesucristu ni bilá laanu. ¹² Zacaa que zusana dxie de usietenaladxe laatu ca ndi, necape nannatu de lacani ne necape zuhua' dxíchi lu ni dxandí yanna. ¹³ Riní ique de que biasi nga gataná tu ne gusietenaladxe laatu de ca ndi, laga nua rua rarí. ¹⁴ Purti ma nanna de que ma yaca chá de rarí, casi modo ma biluí Señor Jesucristu ni naa. ¹⁵ Zuune guiraa ni ganda ti guiraa dxi guietenaladxitu de ca ndi ora na ma ziá'. ¹⁶ Laadu que nandadi'du ca ni redasi ndani xiga ique tuxa ora laadu riní ne du laatu de ca guendanandxó' ne ra gueeda Señor Jesucristu. Sinuque bidu'ya pe du guendanandxó' xtibe. ¹⁷ Bisisaca Diuxi laabe ora binadiagabe riidxi xti ni na': "Ndi nga Xiiñe, ni nadxiee, ne ni rusieche naa." ¹⁸ Laadu binadiaga pe du diidxa ne zaa de ibá que, laga nuu ne du laabe lu dani ra uní Diuxi ni nandxó'. ¹⁹ Yanna huaxa ma nanna du de ca ni guní ca profeta que dxiqué. Cyuni tu xneza pa ulabi chahui tu ca ndi. Zeda gaca ni casi ti biani cuzani ra nacahui dede qué irá gueela ne biani xtigubidxa ni cuzani ndani ladxidóto. ²⁰ Niru guietenala'dxi tu ndi, de que cadi zeda si ca ndi tisi racaldxi ca profeta. ²¹ Purti nin tobi de ca ni guní ca profeta que chi gaca cani tisi zaqué na ca gaca cani. Sinuque, modo na Diuxi nga uní cabe cani purti Espíritu Santu gudxi ni laacabe.