1
Ja´uk me to ya me sk´an ja na stojol in to: ta slajibal k´a-al ya me xtal te bila chujk´ultisba.
2
Ta skaj te ants-winiketike te janax k´ux ya yay sba stukele, smulanej te tak´ine, stoyosba stukel nax, toy ba k´op, bol k´optewanejetik, k´axinte mantalik ta stojol smetatik, ma snaik yalel wokol, ma lekuk yat´elik.
3
Mayuk mach´a k´ux yayik, ma xju ta usteselik, jowil le muliletik, ma sna skomel sbaik, uts´iwanejetik, ma smulanik te bila smelelile.
4
Ja´ikme te ya x-ak´wanik ta k´abal, ma snopik te bila spasike, janax sk´anik te yich´ik ta ich´el ta muk´e, smulanejik te bila janax jelawen sbuts yot´anik yu´une ma ja´uk sk´anojik te Diose.
5
Ja´iki to jich yilel te bit´il yich´ojik ta muk te Diose, ja´ukmeto ya xchiknaj te ma jichuke. K´ejaba lok´el ta stojol te ants-winik te mach´a jich ya spas to.
6
Ay mach´atik te winiketike te ya x-ochik ta na-etik sok te ya sloleyik te antsetik te ma xtojobike. Jaik te antsetik te boltesbilikix yu´un te mulile sok te ya yak´sbaik ta nitel yu´un te cha-oxchajp´ te bila smulanike.
7
Ja te antsetik te yakik ta snopel, ja´ukmeto ma xju yu´unik te ya snabesbaik te smelelile.
8
Jich nix te bit´il te Janese sok te Jambrese la skontroinik te Moisese. Ja nix jichuk te lotil bijteswanejetike ya xjach skontroinik te bila smelelile. Jaik te winiketik to k´ax bolobenix te snopjibal yu´unike sok ya yak´ik ta ilel te mayuk nix-a te xch´unjel yot´anike.
9
Ja´ukmeto ma xjelawik xan-a. Melel ya xchiknaj ta ilel ta komon sitil, te jowilajel yu´unuke jich te bit´il cheb winiketike.
10
Yan te ja´ate ja t´unoj te bila la kak´bat anope, te jtalele, te bek yakon ta sle-ele, te xch´unjel jkot´ane, te bek jk´axem jwokol yu´une, te sk´uxul jkot´ane, te smalip´ jku´une,
11
te bit´il la jkich´ nutsele, te jwokole, sok te bila k´ax ta jtojol ta Antioqui-a, ta Iconio sok ta Listra. La jts´ik spisil te nutsele. Ja la skolteyonix lok´el te Kajwaltike.
12
Spisil te mach´atik ya sk´an lek ya xkuxinik ta stojol te Cristo Jesuse ya me yich´ nutsel.
13
Te ants-winik te ma lekik sok te cha lam yot´ane k´axemtoxan me ya xbolobik. Ya me yik´ik ba-el yantik ta ch´ayel. Melel jaik nix me yakik ba-el ta ch´ayel.
14
Ja´ukmeto yan te ja-ate, ja me xbajt´ ta wot´an te bila anopojike sok junuk me awot´an yu´un te bila ach´u´uneje. Melel ana-ojbey sba te mach´a la yak´bat anope.
15
Ja na-oj ta awalalilto te xch´ul sk´op te Diose. Ya me xju yu´un te yak´bat sbijil awot´an te jich ya xkolat ta swenta te xch´unjel awot´an te ja ta swenta te Cristo Jesuse
16
Spisil te bila ts´ibubile ta sjun te Diose lok´em tel ta yot´an. Ya xtu´un ta swenta b´ijuptesel, te yak´botik natik stojol banti ch´ayemotik, ya stojtesotik, sok toj ya skomotik.
17
Ja ta swenta te winik yu´un te Diose ya xju yu´un jich nix ts´akal ta spasel spisil lekil at´elil