¹ Nganüy Teat Dios tandeac Mipoch nej masaj a Jonás micual Amitai, tandeac masaj: ² "Witiür carriür indüy Nínive, tiül nadamüy cambaj, at ijüquich quiaj mipoch Teat Dios, cos lapeay nengüy niüng sajlüy lananguiay cuane xeyay ngo majneaj teamarangüw." ³ Witiüt nganüy a Jonás mecuiür mexeotüy teombás TEAT tamb andüy Tarsis. Taw tiüt Jope nguiane taxeom noic müx laámb andüy Tarsis. Atquiaj ndoj tangüy ndom majtep timüx laámb andüy Tarsis, minquiaj nguiane ngo majaw NEJ TEAT. ⁴ Nganüy Teat Dios tüüch mamb noic nadamüy iünd andüy tindec at tarang noic nadamüy ndicoic. Atnej ajüic apquejweam a xeech müx najenjen miün. ⁵ Lambayajow xeyay nejawüw wüx müx at nop nop nejiw tapajüw minüt midiosüw nejiw. Tüjchiw tejyem omal a müx taloxiw tindec. Nganüy a Jonás taw tiüt andüy teomeaats müx alpeaam quiaj at tasap nej xeyay ameay. ⁶ Natang nejaw wüx müx tiün majaw nej at tasaj nej, "¿Cuane tenguial merang almemeay quiaja? ¡Witiür! ¡Ipaj minüt midios! Ngwa alndom marang midios majaw icoots at ngo mambiy icoots" ⁷ Meawanoj tendeacüw tesajayej nop alinop: "Macaron, majawaats marrajaats, atquiaj ndom majawaats jane neyac naél leaw teamamongochiiüts." Atquiaj tarrajüw matijpeaw, atquiaj tajaraw tajmiüc wüx ombás Jonás. ⁸ Nejiw tasajüw a Jonás ndoj miün, "Wüx monajneaj, isaj xicon jane neyac aag monteomeaats cam leaw teamamongochiiüts. ¿Ngün minajiüta, at nguiane erwiüna?" ⁹ Jonás tasaj nejiw, "Xique Hebreo xic; at satamüüch minüt Teat Dios, nej Teat Dios nacül tiül mbasacats, jane nerang a ndec at nerang nawaag iüt." ¹⁰ Quiaj xeyay mbayatoj a monxey at tasajüw a Jonás,"¿Cuane leaw lemerang quiaja? Nejiw a monxey lamajawüw nej tenguial acuiür mexeotüy teombás Teat Dios, cos nejay a Jonás landoj mandeac. ¹¹ Ndoj miün tasajüw a Jonás, "¿Cuane sanarang wüx imbás atquiaj xicona nawan wüx majlüy miün a ndec? Cos teamayac wüx apac a ndec deaám. ¹² Tasaj nejiw a Jonás, "Ixainguiün xic at iloxiün xic tindec. Ndoj quiaj apmajlüy miün a ndec apmeriowan wüx, cos lanajaw xique neyacás naél quiaj witiüt nadamüy ndicoic andüy wüx imbasan." ¹³ Nganüy naleaing, ajcüwa monxey monrang najiüt tatechiw napac mandilileaw andüyiw wüx iüt, ngome tatüchiw apac a ndec cos teamayac wüx apac xeyay wüx ombasüw nejiw. ¹⁴ Ndoj, tapajüw minüt TEAT at tapiüngüw, "Satüniün icueaj TEAT, sanguejriün xemalan, nde meaach nandeowan at nde majmiüc neseot ocueaj nandeow wüx xemalan, cos Ique, TEAT, lamerang atnej ique indiüm." ¹⁵ Quiaj taxainguiw a Jonás tamb maloxiw tindec atquiaj a ndec lombot. ¹⁶ Ndoj, ajcüwa monxey tatamüjchiw xeyay minüt TEAT. Tayacüw xeyay nichech mujchiw a TEAT at tayacüw mipochiw nejiw. ¹⁷ Nganüy, NEJ TEAT landoj lamayac nop nadamüy xeech cüet atquiaj ndom malaj a Jonás atquiaj Jonás tamongoch arej nüt arej ongwiiüts teomeaats a cüet.