¹ Kinrwa okhala wa nipuroni waka wowehaweha ni kikhalaka wa tjulu nipuro nossunka, ni kinkowehessessa wo wiira kimoone wa yoole Ayena ankelaaya okiirela, ni manan'na tjonkelaaka woneela nuttonka waka n'wo. ² Pwiya hokakhula ni ahiira: "Osunke ethonyeriyo, ni wantikhe wo wooniaa nthaapwani wo wiira yoole nkela ovira athyawaka assome. ³ Kontha woniheriya n'wo eri yoohoolo, ni wahimyatje wuumalelo ni, khin'hala ovonya. Pooti woona opitja, wanriihe; kontha, weekhueeli, enaawa ni khin'hala opitja. ⁴ Nkaweha! Yoole tjithu tjontjivelatja waya khatjiri tjooreera nthu owiikukhuliha; maasi nasariya n'khala nu wamini wawe. ⁵ Toko eviinyu tjihintharyaaya, vano inaatamu owikukhuliha khankhalela. Nttima nawe niri toko nookhua, hinkhala atjveliyaka. Yena nawithukumanihera elapo yoteene ni nawiikhupela athu oteene. ⁶ Va kiira, khanpankale tjithu n'ya yoohimiya wo matarawo, ntjipo nimotja nomatarawo wa yena, ni nkowiira: "Yoole nothukumaniha tjihiri tja wawe! Mpaka nihukuni onkela wunkela tjithu tjoolemela tjookophiya, we tjikussalya? ⁷ Va keera khaakhumenlale phiyaaruro ale anuulumakatja, ni ahivussa yaale anowoopopiha? We onawiikhaliha nlupatho wa yena ! ⁸ Kontha we ohin'nya elapo tjintji, athu ahanle anaahala owin'nyera. Kontha ohomwarissa ephome yintji ni ohokhala wuupuwelaka wo manan'na ohiloka nlaponi muu, ecittatte ni wa yaale ankhala. ⁹ Yoole nkela woonela nttima woopheela ophunya wo manan'na ohikhala wo vapuwani wawe, apheelaka ohela epuuru awe nipuro wo wiira alipihere matataawe onyala! ¹⁰ We onowupuwelela ehaaya wa puwani waa, kontha ohowinva athu entji, ni ohiithekela weeyova. ¹¹ Kontha maluku anaahala okhuwela wa cirini, nieviiga tjo tjaapwa tjinaahala owaakhula: ¹² Wa yoole nkela oteka epooma niiphome, ni akhalihaka eviila mapuro otampi! ¹³ Khinkhama wa Pwiya anakhotto wo wiira apoovo evare nteko wo mooro ni wo wiira elapo tjooteene tjikhale tjowootia wo pure? ¹⁴ Pooti okhala tjom'mo, elapo eri yootjarya wo tjuwelatja nuwaarya wa Pwiya, toko maatji enkhuneelaaya epahari. ¹⁵ Yoole nkela omwiirela nkhuaawe wiira avurye! We onomwinthela ntiitaawe, onkhanyenrihaka wiira ahapaliye, opheelaka omoonatja! ¹⁶ We onkootjarya ehaaya, wohikhala nttittimiho. Vano n'navaa ekhuahaa! Ovurye, ni othoonyihere ohuulihiya waa! Ekaalice yo m'matatani moono weelopwana ya Pwiya ehaana yuuviraka ni mahuviho onaahala ottiyenla waarya waa. ¹⁷ Enttevo epankiye oo Libano enawuukhuneela, ni winvakatjiya wo nama onahaala owoopopiha, kontha khureere omwarissa tja ephome ya apinaatamu, ni ohokumihenra enttevo elapo yeela, ecittati yeela ni apinaatamu. ¹⁸ Efaitani erinaaya ttontto oheemeliya wee? Kontha ole n'hemale wala non'hema ttontto oyuuma yowoosiya mwinthutjihi owootha; kontha yela nokhuluvela miteko tjo m'matatani wawe, okathi napankaawe anluku ohuuluma. ¹⁹ Ratta yoole nkela wiirela miri: Nkavuwa! Wala maluku ohuuluma: Nkavuwa! N'ya tjithun'ya tjin'nossomiha? Nkaweha! Ari owottiheriya ewooru ni parata, khaarina erooho. ²⁰ Kontha, Pwiya ri n'nupani wawe ye ttakattiifu! Elapo yoteene emaale ohoolo Wawe.