¹ Wo manan'na yaayo, Bezalel ni Aoliabe anrwa ovara nteko, ni wakuta nthu ni nrima wo winthutjihiya wa yoole Muluku nvahalyaawe otjuwelatja wootjuwela oteka nipuro neettakattiifu, etharihenlaka tjoohimiya Yena tjuuvahalyaaweni wiira mpanke". ² Moises homwiihana Bazalel ni Aoliabe, ni athu antjuwela ohema wiira Pwiya aavahe otjuwelatja, nrimayooyo waari okuan'nya ni Yena wo wiira evare nteko. ³ Ayena ahaakhenlatja ni Moises ofeerta wooteene maIsraelita awanalyaaya wo wiira eteke lipuro neettakattifu. Apoovo yeera ewaanaka wa Moises ofeerta wo wivahenra owitjisu woteene. ⁴ Vano oteene yinthutjihiye, evaraka nsantuwaariyu ahohokolya wa nteko wavarayooyo. ⁵ Ayena ahomwiirela Moises: "Apoovo ayo aneera ewaanaka tjen'ye tjimphuanela wiira epanke nteko wa Pwiya onirumalyaawe". ⁶ Wo manan'na yaayo, Moises haleehera wo wiira hikhaletho nthu nowiiha ofeerta wiira etekeliye esantuaariyu. Vano apoovo ayo yaaheemelela owaana tjovahatjaya. ⁷ Ayena yahaana venti tjinene ekaruma tjovarenla nteko. ⁸ Wa yaale anamatjuwelatja ayena ahoteka etabernaakulo nikurtina khuumi tjopankiya niliinyu tjovevyaala ni eteciido tjoopipila, tjosafarawu ni tjoosseerya niitesenyu tjo makerubim. Phaari nteko wa Bezalel, namatjuwelatja ovara. ⁹ Erekamelo wa khula ekurtina yaari emeetru khuumi napiii ni ecentiimeetru yaari cithuiini, nii eyaatapuwelo emeetru emotja ni ecentiimeetru thamaaniini. Ekurtiina tjoteene tjaari enan'na emotja. ¹⁰ Bezalel holutta ekurtiina thanu ekina nikhuaaya, ni tjikhuayan'yo holuttakatja tho ni tjikinan'yo. ¹¹ Yena holutta niilaaso tjoopipila nkherekhere wo kurtiina wo mphuinko woopatjera, ni yena hopanka yaayo manan'naayo wa mphuinko wo nayeeli nkherekhere. ¹² Yena hopanka elaaso hanciini ekurtiina yopatjera ni hanciini nkherekhere wa mphuinko wo nayeeli tjiluttenliyaka ni tjikhuaaya. ¹³ Yena hopanka araame owooru ni holutta ekurtiina ni tjen'yo ni eholuttaana niitabernakulo. ¹⁴ Bezalel hopanka ekurtiina tjo mapururo opuri wiira ekhale toko etenda yo watabernaakulo; yena hopanka ekurtiina khuumi napiili. ¹⁵ Erekamelo wa kuta ekurtiina yaari meetru khuumi na thaaru n'nuusu, ni eyaatapuwelo yaari meetru mamotja ni ecentiimeetru naane. Wakuta ekurtiina wa tjeen'ye khuumi namotja yaari enan'na emotja. ¹⁶ Yena holutta ekurtiina thanu ekina niikhuaaya, ni ekurtiina sita nikhuaaya. ¹⁷ Yena hopanka malutte hanciini nkherekhere wa kurtiina wa mphaantti woopatjera, ni malutte hanciini nkherekhere tjo kurtiina mphantti wo piili. ¹⁸ Bezalel hopanka araame o bronze wiira alutte eteenda wo wiira ekhale yooteene. ¹⁹ Yena hopanka, wo wiira avathele etabernakulo, ovathela ni ettapala yo nama yoopintariya yoosheerya, watjulu waya, yaavatheliye ni ekouro yoovevyaala. ²⁰ Bezalel hopanka ethapua tjo wookoa atja tjo mpeku wiira etekeliye etabernakulu. ²¹ Marekamelo wa khuta ethaapua yaari emeetru matjesse, ni eyaatapuwelo yaari ecentiimeetru sapiini. ²² Tjahaavo ethaapua piili tjaaphiteerihiya wiira tjiluttenliye. Yena ahopanka ethaapua tjo ntabernaakulo yaala mananna. ²³ Phipankalyaawe manan'naal ethaapua tjo ntabernaakulo. Yena hopanka ethaapua ciriini wo mphantti wootjulu. ²⁴ Bezalel hopanka mithitteeryo arupaini tjo parata wiira tjikhale vathi waya ethapua. ni mithitteeryo tho miili vathi waya wakuta ethaapua wa mapuro wankelaaya oluttiya. ²⁵ Mphantti wo nayeeli wo etabernakulo, mpantti woohitto, yena hopanka ethaapua ciriini, ²⁶ ni mithitteeryo tjaya arupaini tjo parata. Tjahaavo mithitteryo vathi waya ethapua tjoopatjera, mithitteeryo miili vathi waya ethapua yootharenla yeeyo. ²⁷ Wa miphantti tjootabernakulo, onkhuma ntjuwa, Bezalel hopanka ethaapua sita. ²⁸ Yeana hopanka ethaapua piili tjo m'maloothoni tjo ntabernakulo. ²⁹ Ethapua n'ya tjaari tjookawanihiya wa elipiheriyo tjaya, tjaari tjooluttiya ntjulu waya wa tjithu tjorukureerya. Yaari manan'na yaayo malootho ottalivelana. Tjahaavo ethaapua naane, tjooluttiya ni mithitteeryo tjayan'yo tjo parata. ³⁰ Tjahaana khuumi nasita mithitteeryo tjaya n'yo, mithitteeryo miili tjoovathi ethaapua tjoopatjra, mithitteeryo miili tjoovathi waya wa ethaapua tjootharenla yeeyo, okelelaka vaale. ³¹ Bezalel hopanka eviiga tjo thapua tjo mipeeku, eviiga thanu wa ethaapua tjo wooru mphantti wo etabernakulo, ³² eviiga thanu wa ethaapua tja thipeeliye mphantti onkela ntjuwa. ³³ Yena hopanka eviiga yoovarenla ethapua, eyo, mphantti wootjulu, mphantti ni mphantti. ³⁴ Yena hottiyenla ethapua ni wooru. Yena hopanka ethu yoorukureerya ro wooru, wiira ekhale yoovarenlela wa eviga, hokhuneela tho ebaara n'yo ni wooru. ³⁵ Bezalel hopanka evewu yoteciido yoopipila, yossafarawu ni yoosheerya, ni eliinyu yoovevyaala, nii etesenyu tjo makerubim, nteko wana matjuwelatja wa nanteko. ³⁶ Yena hopankela evewu elipihero tjesse tjo thaapua tja mipeku, ni hokhuneela ni ewooru. Yena hopankatho nri wo wooru wa epilaare, ni hothipelatja ni mithitteeryo tjesse tjo parata. ³⁷ Yena hothomya eveu omakhumenloni wootendani. Yaari yoopankiya niteciido yoopipila, yossafarau ni yoosheerya, yoliinyu yoovevyaala, nteko wa namattotha. ³⁸ Yena hopankatho n'sowaalyuni epilaare thanu ni miri. Yena hokhuneela ntjulu waya ni miritjaya tjo wooru. Mithitteeryo tjaya thanu tjaari tjopankiya ni ebronze.