¹ Ala phamatjina aassaana aIsrael yaawaale elapo yowiigiipitu ni Jaco, khula ntthu niitthokwaawe: ² Ruben, Simeao, Levi ni Juda, ³ Issacar, Zebulon ni Benjamim, ⁴ Da, Naftali, Gade ni Aser. ⁵ Nloko naJaco nooteene yaari sapiini. Jose aari wiigiipitu. ⁶ Vano Jose, assihimaawe ooteene ni nikhoto nooteene yaahokhwa. ⁷ Atthu owiisrael yaari atthu ooyarana ventji ni yaari atthu oolipa; elapweeyo yaatjanre phaayena. ⁸ Vano, mwene onaanaano aahovuwa wiigiipitu, yooyo ahaatafiti muupuwelelo wa Jose. ⁹ Yena aahowiirela atthu: Mwaawehe atthu owiisrael; aritji entji ni oolipatja woovirikana nihi. ¹⁰ Nkawehatjani. Nikhale naayenatja. Weehikhale tjon'mo, anaahala wintjenrihanatja ni, yakhumenla ekhotto, anaahala otakaneela naawananiihu, an'hala owana nihi, ni anaahala ohiya elapo. ¹¹ Vano, ayenatja yaahaahelatja atthu yaavarihatja miteko tjuulupale. Atthu owiisrael yaateka epooma ni mapuro oweessatja tjitthu tja Farao: Pitom ni Remesses. ¹² Vano, atthu owiigiipitu weeraaya yaavarihaka miteko atthu owiisrael phaatepaaya wintjivihana ni yaanaavavarya. Vano, atthu owiigiipitu yaahantjera owoova atthu owiisrael. ¹³ Atthu owiigiipitu yaahaavariha nteko muulupale atthu owiisrael. ¹⁴ Ayenatja makhalelwaaya yaahaawaawela, nimiteko tjuulupale wowuupa epulooku nuuloko, ni wakhula enan'na tjmiteko tjon'mattani. ¹⁵ Woottharenlana, mwene owiigiipitu aahowiirelatja atthu yaayariha omahebreu; ntjinanaya amotjaayo yiihaniya Sifra, akhwaawaayo yiihaniya Pua. ¹⁶ Yena aahiira: Athiyanaayo mwaakhalihera wuuyarani, mwaaweheehe. Akhala nlopwana, n'mwiive; akhala nthiyana mun'hiye. ¹⁷ Vano anamayarihaale yaanomoova Nluku ni khaapankale phanka tjaahimyalyaawe mwene owiigiipitu. Ohiyavaa, yaahaahiya assilopwana akhalaka. ¹⁸ Mwene owiigiipitu aahowiihanatja anamayariha ni aahowiirelatja: Essiyani waahiyaka aasilopwana akhalaka? ¹⁹ Anamayariha yaahomwaakhula Farao: Athiyana ohebreu khaari phanka athiyana owiigiipitu; ayenatja anaayaratja namayariha hinaaya waaphwanhatja. ²⁰ Nluku aahaakhavihera anamayarihaale. Atthu yaahuunuwatja entji ni yaaholipatja tjinene. ²¹ Mwaha wowoova waanamayariha, Nluku aahovaha omutji. ²² Farao aahowiirela atthwaawe ooteene: Mwaarihele n'maatjini assilopwana ooteene an'hala oyariya, massi assithiyana mwaahiye akhale.