¹ Nlopwana n'motja onihimo naLevi aahonthela nthiyana n'motja onloko naLevi. ² Athiyanaale yaahorupala ni yaahonýara mwaana nlopwana. Athiyanaale woonalyaaya wiira aari nlopwana oophwanela, ayena yaahonvitha myeeri miraru. ³ Massi, wahipheelalyaayatho onvitha, yaahon'hela ntthuttuni. Ni yaahomweessa nmaatjini yaavira. ⁴ Mwaamun'naya aahokhala nttayinttayi wiira awehe enkoomwiiraneela. ⁵ Mwaana aFrao aahorwa omuro wiira arape, anantekwaawe wiiraaya arwaaka nmaatjini. Yena aahoona etthuttu ni aahonruma nantekwaawe wwira akusse. ⁶ Watthukulalyaawe, aahomoona mwaana. Ohoolowaya mwaana iira unlaka. Yena nrimaawe aari nimwaanoole ni aahiira: Olamwaanoola anthiyana ohebreu. ⁷ Vano, mwanrokorawe mwaanoole aahomwiirela mwaana aFarao: Kinrweeleke nthiyana oopheela wookhaliherani mwaanoola? ⁸ Mwaana aFarao aahaakhula: Orweeke. Vano, mwanthiyanoole aahorwaa ni aahaawaana anumwaane mwaanoole. ⁹ Mwaana aFarao aahowiirela anumwaane mwaanoole: Munkusse mwaanoola nkuunuwihere; kinaahala woolivani. Vano, athiyanaale yaahonkussa ni yaahomwaamwiha. ¹⁰ Mwaanoole wuunuwalyaawe, ayena yaahonwiihera mwaana aFarao ni mwaanoole aahokhala awawe. Ayena yaahonvaha ntjina naMoises, yiraka: Kontha kinkumihale nmaatjini. ¹¹ Moises wuunuwalyaawe, yena aahorwaa waaweha atthwaawe ni aahoona miteko tjuulupale tjaavarihiyaaya. Nihuku nimotja, aahomoona ntthu owiigiipitu amwaattaka n'heperi, ntthu onssovwaawe. ¹² Yena aahoweha nphantte ni nphantte ni, woonalyaawe wiira khaavo aarivo, aahomwiiva nlopwanoole ni aahonvitha vanpuussuni. ¹³ Aahohokolya nihuku nikhwaawe ni aahowoona aheperi eeli yaattakanaka. Yena aahomwiirela yoole aakolokotjale ekhotto: On'mwaattelani nkhwooyo? ¹⁴ Massi nlopwanoole aahomwaakhula: Tupani ookhalihale nkhulupale wala nphuki wahi? Onpheela okiiva phanka tjimwiivalyaa olevale? Vano, Moises aahoova ni aahuupuwela: Kipankaleni, weekhweeli aatjuweliya naakhwaawe. ¹⁵ Farao wiiwalyaawe moolumwaala, aahopheela omwiiva Mises. Massi Moises aahotthawa okowiipitha elapo yoMidia. Wookmalyaawe waattamenla emuro. ¹⁶ N'hakheli ooMidia aahaana assaana assithiyana saapa. Yaahowaatja orika maatji, ni yaahotjaliha wiira tjiwurye enama tjaathumwaane. ¹⁷ Ahakheli yaahowa wiira yaakumihatje assithiyanaale, massi Moises aahowaakihatja. Vano, aahowuriha enamatjaya. ¹⁸ Assithiyanaale warwaatjalyaaya waReuel, athumwanaya, yena aahaakohatja: N'hokolyaatjeraleni wowaakuvyaatja? ¹⁹ Ayenatja yaahaakhulatja: Nlopwana n'motja noonaakiha. Yooyo honivaha maatji niinamatjihu. ²⁰ Yena aahaakoha assaanaawe: Yena rivai? Mun'hiyatjenreni? N'mwiihane nilye nkhayi. ²¹ Moises aahaamini okhala ninlopwanoole, ni aahonvaha mwaamwanawe Zipora wiira anthele. ²² Ayena yaahonýara mwaana, ni Moises aahonvaha ntjina naGerson, iiraka: Kinkhala elapo yoottayi. ²³ Onavirale owakathi mwintji, mwene owiigiipitu aahokhwa. Atthu owiisrael yaahothamala mwaha wonteko weepottha. Ayenatja yaahokhuwelatja, ni okhuwelawaya waahophiya waNluku mwaha wokiriritjaya. ²⁴ Nluku wiiwalyaawe okhuwelawaya, aahowaana waataana ni Abraao, ni Isaque ni Jaco. ²⁵ Nluku aahaaweha atthu owiisrael ni aahiiwa mikuthakuthotjaya.