¹ Pakupinda ntsiku zitanhatu, Djeso adatola kuna Iye Pedro, Tiago na mubale watche Juwau, ese woga wadakwira na iwo mubango liraphu. ² Iye adatsandusiwa pamberi pawo; nkope Iyatche idaetimira ninga dzuwa, ese nguwo zatche zidaetimira ninga tchibveko. ³ Wonani kuti wadaswikirha na Mozisi na Elia, atchilanga na Iye. ⁴ Napenepo, Pedro adati kuna Djeso: "Tchangamire, zvirimuche kuti tigare pano. Mungati mulikuda, ndilonze matendi matatu: Libodzi lanu Tchangamire, libodzi laMozisi, ese libodzi laElia". ⁵ Iye patche nanga atchirikulanga khuti libodzi lidawafukiza, ese wadabva pfala libodzi ritchiuya na khuti, litchiti: "Uyu ndiye Mwana Wangu wakudiwa, Wakuti anandifantsisa. Kuna Iye ndinabva". ⁶ Pawo wapfunzi wadamubva, wadagwa nankope zawo pantsi ese wakana urtchi uzinji. ⁷ Napenepo Djeso adauya ese adakhuya kuna iwo futi adawati: "Mukani ese lekani kurtcha". ⁸ Ese iwo wadalingisa futi awalibe kuwona munhu, kunza kwa Djeso. ⁹ Pawo wakati walikudzidzika mubango, Djeso adawatumira, atchilanga: "Hamusabvunzi wenango zvipangizo izvi, kuswikira kuti Mwana Wamunhu amusiwa pakati pawanyakufa". ¹⁰ Wapfunzi Watche wadabvunzisa kuna Iye, atchilanga: "Thangweranyi wanembi wanalanga kuti Elia anadikana auye pakutanga?". ¹¹ Djeso adadaira ese adati: "Elia ndizvo atchadzauya ese atchadzamusira zvinhu zvense. ¹² Napenepo Ine ndirikukubvunzani: "Elia adiuya, apo iwo hawana kumudziwa; kunza kwaizvi, mudaita zvanumukada kuna iye. Zvibodzi bodzizvo, Mwana Wamunhu anabonera sawasawa mumanja mwawo". ¹³ Napenepo wapfunzi wadatetekeresa kuti Iye akalanga pamusana paJuwau, Munyiki. ¹⁴ Pawo iwo wadaswika paduze na mbumba, mwamuna mubodzi adauya, adagodama pamberi paDjeso, atchiti: ¹⁵ "Tchangamire, itani ntsisi kuna mwana wangu, iye ananfai ese alikuboera maningi. Kazinji iye anagwa pamoto, ese kenango kazinji anagwa mumadzi. ¹⁶ Ine ndamuwisa kuna wapfunzi Wanu, apo iwo awana kumulapa". ¹⁷ Djeso atchidaira adati: "Dzinza lakutsaika futi wakukutu, kuswikiralini ndirinamwe? Kuswiriralini nditchikupirirani? Uyisani muphaleyo kuna ine". ¹⁸ Djeso adabata dimoni ese iro lidabuda kuna muphaleyo, adalapiwa panguwa eneyo. ¹⁹ Napenepo wapfunzi wadaenda kuna Djeso pakundu ese wadati: "Thangweranyi ife atiribe kukwanisa kulibudisa?" ²⁰ Djeso adati kuna iwo: "Ndithangwe lakutenda kwanu kudoko; napenepo ndizvo ndirikukubvunzani: deka munakutenda ninga mbeu idokodoko iya mulumbi, mungadakwanisa kubvunza kuna bango iri: 'Buda pano ndoko apo'. Futi iro lingadafundukira. hapalibe zvingada gundika. ²¹ [Apo muchobo uyu wadimoni halibudi, kunza kwamunamato na kuzvinyima zvakurja. (Zvakutewezera zvamuche zvakale zvinatowezera mukati mwa 21.) ²² Pawo watchiri kuGalilea, Djeso adati kuna wapfunzi watche: "Mwana Wamunhu alikuperekiwa mumanja mwawanhu; ²³ iwo watchaenda Kamuulaya apo, pantsiku iyatchitatu, Iye anadzamuka". Wapfunzi wadagala wakutsurukwara kukuru. ²⁴ Pawo iwo wadaswika paKafernaumi, wadafedzera kuna Pedro walongosi wamisonko nazvinyadzimunhu zviwiri, ese wadamubvunzisa: "Mupfunzisi wako hapereki musonko?" ²⁵ Iye adadaira: "Ande iye anapereka". Apo patche Pedro adapinda munyumba, Djeso adamutchenjeza, atchiti: "Ukufunganyi, Simawu? Nswawani wakulu wapantsi watchitambira musonko? Iya wana wawo kana iya wanyakuuya?" ²⁶ Patche Pedro adati: "Kwawanyakuuya," Djeso adati kuna iye: "Napenepo wana wako wadalekererha kuti wapereke. ²⁷ Apo, kuitira kuti ndireke kuwatuka, ndoko kubala, thusa mbedzo, ese ntsomba iyakutanga iyako iwe unamedza, ibate futi ivule mulomo. Unasanganiza siriva libodzi. Libate ese lipereke kuna mulongosi wamusonko kuna ine na kuna iwe".